Android ဖုန်းပေါ်က သီချင်းကို Windows 10 ကတစ်ဆင့် ထိန်းချုပ်နိုင်

Windows သုံးစွဲသူဆိုရင် Your Phone app သိမှာပါ။ Your Phone ကို အသုံးပြုပြီး Android ထုတ်ကုန်နဲ့ ကွန်ပျူတာကို ချိတ်ဆက်နိုင်ပြီး ဖုန်းပြောနိုင်တဲ့ လုပ်ဆောင်ချက်တွေ ပါဝင်ပါတယ်။ အခုဆိုရင် Your Phone မှာ update အသစ်တွေ ပါဝင်လာတယ်။ Microsoft က Your Phone app အတွက် သီချင်းပိုင်း ထိန်းချုပ်ခွင့်ပြုခဲ့ပြီး Windows ကနေ Android ဖုန်းပေါ်က သီချင်းဖွင့်တာကို ထိန်းချုပ်လာနိုင်မှာပါ။

အခု feature ကိုလွန်ခဲ့တဲ့တစ်ပတ်က ကြေညာပြီး Windows 10 ကွန်ပျူတာ ကနေ Android စမတ်ဖုန်းက သီချင်းဖွင့်တာ၊ ပိတ်တာကို တိုက်ရိုက် ထိန်းချုပ်နိုင်ပါတယ်။ Spotify ကလည်း Connect ဆိုတဲ့ဝန်ဆောင်မှုနဲ့ အလားတူပုံစံမျိုး ထောက်ပံ့ထားပါတယ်။

Windows 10 ရဲ့ Your Phone app အတွင်းမှာ သီချင်းဖွင့်တာ၊ ခဏရပ်တာနဲ့ သီချင်းကျော်တာ ပြုလုပ်နိုင်သလို သီချင်း သတင်းအချက်အလက်၊ အယ်လ်ဘမ်ဓာတ်ပုံနဲ့ service ကိုလည်း မြင်တွေ့ရပါမယ်။ Your Phone ကို YouTube Music, Google Play Music, Spotify, Pandora, Amazon Music, Xiaomi Music နဲ့ Google Podcast တွေနဲ့ တွဲဖက်အသုံးပြုနိုင်ပါတယ်။

အခုလုပ်ဆောင်ချက်ကို အသုံးပြုမယ်ဆိုရင် Windows ပေါ်က Your Phone app ဗားရှင်း 1.20051.93.0 နဲ့ Android ပေါ်မှာဆိုရင် Your Phone app 1.20051.113.0 ဗားရှင်းကို ထည့်သွင်းထားဖို့ လိုပါတယ်။

စိုးထက်
Ref: 9to5Google