တရုတ်နိုင်ငံ၏ စမတ်ဖုန်း သုံးစွဲသူဦးရေ သန်း ၅၂၀ နီးပါးရှိလာ

china.jpg

တရုတ်နိုင်ငံ၏ လက်ရှိစမတ်ဖုန်း သုံးစွဲသူဦးရေသည် ၅၁၉.၇ သန်းရှိကြောင်း Emarketer မှ ထုတ်ပြန်ခဲ့သည့် အချက်အလက် သစ်အရသိရသည်။

ထို့အပြင် တရုတ်စမတ်ဖုန်း သုံးစွဲသူဦးရေသည် ၂၀၁၅ ခုနှစ်တွင် ၅၇၄.၂ သန်းအထိ မြင့်တက်လာဖွယ်ရှိပြီး ၂၀၁၈ ခုနှစ်တွင် သန်း ၇၀၀ ကျော်အထိ ရှိလာနိုင်ကြောင်း Emarketer မှဖော်ပြခဲ့သည်။

တရုတ်နိုင်ငံ၏ ထိပ်တန်း search engine ဖြစ်သော Baidu က နိုင်ငံအတွင်း Android အသုံးပြုသူ ဦးရေ ၃၈၆ သန်းရှိကြောင်း မကြာသေးမီက ပြောကြားခဲ့သည်။ ထို့အပြင် ဈေးနှုန်းသက်သာသည့် ပြည်တွင်းထုတ် Android ဖုန်းများဖြစ်သော Xiaomi, Coolpad နှင့် Huawei တို့ကြောင့် စမတ်ဖုန်း ဝယ်ယူသူအများစုက Google ၏ operating system ကို ဦးစားပေး ရွေးချယ်လာခဲ့ကြခြင်း ဖြစ်သည်။

အိန္ဒိယ၏ မိုဘိုင်း ဈေးကွက်သည်လည်း အလျင်အမြန် တိုးတက်လျက်ရှိသောကြောင့် စောင့်ကြည့်ရမည့် ဈေးကွက်တစ်ခု ဖြစ်ကြောင်း Emarketer  မှဆိုခဲ့သည်။ အဆိုပါ အဖွဲ့၏ သီးခြားအစီရင်ခံစာ တစ်ရပ်အရ ၂၀၁၆ ခုနှစ်တွင် အိန္ဒိယသည်  အမေရိကန်ကို ကျော်တက်ကာ ကမ္ဘာ့ဒုတိယ အကြီးဆုံး စမတ်ဖုန်းဈေးကွက် ဖြစ်လာနိုင်ကြောင်း ဖော်ပြခဲ့သည်။ ထိုအချိန်တွင် အိန္ဒိယနိုင်ငံ၏ စမတ်ဖုန်း သုံးစွဲသူဦးရေ သန်း ၂၀၀ ကျော်ရှိလာမည်ဟု သိရသည်။

Ref: TechInAsia