ရေဆင်းစိုက်ပျိုးရေး တက္ကသိုလ် ဝင်ခွင့် လျှောက်ထားမှုမှာ ယခင်နှစ်များထက် ငါးဆ ပိုများ

နေပြည်တော်ကောင်စီ နယ်မြေရှိ ရေဆင်းစိုက်ပျိုးရေး တက္ကသိုလ်သို့ ယခုပညာသင်နှစ်၌ ကျောင်းသား လျှောက်ထားမှုမှာ ယခင်နှစ်များထက် ငါးဆပိုမိုများ ပြားလာကြောင်းရေဆင်း စိုက်ပျိုးရေး တက္ကသိုလ် ပါမောက္ခ ဒေါက်တာမျိုးကြွယ်က ပြောသည်။

ထို့ကြောင့် မြန်မာနိုင်ငံတွင် ကွန်ပျူတာတက္ကသိုလ်၊ ဆေးတက္ကသိုလ်များ တိုးချဲ့လာသလို စိုက်ပျိုးရေး တက္ကသိုလ်များလည်း တိုးချဲ့ ဖွင့်လှစ်ရန် လိုအပ်လာပြီ ဖြစ်ကြောင်း ယင်းက ဆက်လက်ပြော ကြားသည်။ ပြည်ထောင်စု အစိုးရ အနေဖြင့် လက်ရှိတွင် မြန်မာပြည် အထက်ပိုင်းရှိ စစ်ကိုင်းတိုင်း ဒေသကြီးဘက်တွင် စိုက်ပျိုးရေး တက္ကသိုလ် ထပ်မံတည်ဆောက် ရန်စီစဉ်နေသော်လည်း  ဘတ်ဂျက် လိုအပ်ချက်ကြောင့် အခက်အခဲ ဖြစ်ပေါ်နေကြောင်း သိရသည်။

“ကျွန်တော်တို့ ရေဆင်းစိုက်ပျိုးရေး တက္ကသိုလ်က သင်ကြားပေးနိုင်တာက ကျောင်းသားသုံးရာလောက် ရှိပေမယ့် ဒီနှစ်ပညာသင်နှစ်မှာ လာလျှောက်ထားတာက သုံးထောင်ဖြစ်နေတော့ ကျောင်း သားဦးရေ ခြောက်ရာပဲ လက်ခံ သင်ကြားပေးနိုင်ပါတယ်။ အဓိကကတော့ ကိုယ်ပိုင် အုပ်ချုပ်ခွင့်ရ တိုင်းရင်းသား ဒေသက ကလေးတွေ၊ လယ်သမား သားသမီးတွေကိုပဲ ဦးစားပေးလိုက်ရတယ် ” ဟု ဆိုသည်။

အဆိုပါ နေပြည်တော်ရေဆင်း စိုက်ပျိုးရေးတက္ကသိုလ်တွင် လက်ရှိအချိန်၌ ဆရာ၊ ဆရာမပေါင်း ၁၈၀ ကျော်ဖြင့် သင်ကြား ပေးလျက်ရှိပြီး ယခုနှစ်တွင် ကျောင်းသားဦးရေ ခြောက်ရာကျော်ကို လက်ခံ သင်ကြားပေးနေကြောင်း သိရသည်။ အဆိုပါ တက္ကသိုလ်အား ၁၉၂၄ ခုနှစ်မှ စတင်ပြီး ဖွင့်လှစ် ပညာသင်ကြားပေးခဲ့ရာ နှစ်ပေါင်း ၉၀ နီးပါးရှိခဲ့သော်လည်း စိုက်ပျိုးရေး တက္ကသိုလ်ဆင်း ကျောင်းသား တစ်သောင်းကျော် အထိသာ မွေးထုတ်ပေးနိုင်ခဲ့သဖြင့် မြန်မာနိုင်ငံ၏ လိုအပ်ချက်နှင့် နှိုင်းဆပါကအလွန် နည်းပါး သေးကြောင်း ဒေါက်တာမျိုးကြွယ်က ထပ်မံပြောကြားသည်။

အဆိုပါ တက္ကသိုလ်တွင် လာမည့်ပညာသင်နှစ်၌ ဂျပန်နိုင်ငံမှ ကန်ဒေါ်လာ ၁၀.၈ သန်း အကူအညီဖြင့် သုတေသနဓာတ်ခွဲခန်း ကိုးခုကို ဆောက်လုပ်သွားမည် ဖြစ်သည်။ ဂျပန်နိုင်ငံတက္ကသိုလ်မှ ပညာရှင်များ ကိုယ်တိုင်လာရောက် သင်တန်းပေးပြီး နည်းပညာများကို သင်ကြားပေးမည်ဖြစ်၍ ယခုပညာသင်နှစ်ကတည်းက အဆိုပါ အဆောက်အဦးများကို ဆောက်လုပ်လျက်ရှိကြောင်း သိရသည်။