လာမည့်နှစ်တွင် Samsung TV များ၌ PlayStation ဂိမ်းစက်မလိုဘဲ PlayStation ဂိမ်းများ ကစားနိုင်မည်

10418917_10152592122297825_156043299149798274_n.jpg

Samsung စမတ်တီဗီများတွင် PlayStation ဂိမ်းစက်မလိုဘဲ PlayStation ဂိမ်းများ ကစားနိုင်ရန်အတွက် Sony နှင့် Samsung တို့ ပူးပေါင်းခဲ့ကြောင်း သိရသည်။

အမေရိကန်နှင့် ကနေဒါရှိ Samsung ၏ အင်တာနက်ချိတ်ဆက်နိုင်သော တီဗီကို သုံးစွဲသူများသည် လာမည့်နှစ်ဝက်အတွင်း PlayStation Now ဝန်ဆောင်မှုကို အသုံးပြုနိုင်ဖွယ်ရှိသည်။

PlayStation Now သည် PlayStation ဂိမ်းစက်တစ်ခု မလိုဘဲ ဂိမ်းများကို Web မှ တီဗီထံသို့ stream လုပ်ကာ ကစားစေနိုင်မည် ဖြစ်သည်။ ထို့အတွက် Sony Dualshock ဂိမ်းခလုတ်တစ်ခုကိုသာ လိုအပ်မည် ဖြစ်ပြီး ၎င်းခလုတ်ကို တီဗီတွင် တပ်ဆင်ရုံဖြင့် PS3 ဂိမ်း ၂၀၀ ကျော်အနက်မှ နှစ်သက်ရာကို ရွေးချယ်ကစားနိုင်မည် ဖြစ်သည်။

ဂိမ်းများကို cloud မှ stream လုပ်ကာ ကစားနိုင်မည် ဖြစ်သောကြောင့် ၎င်းဂိမ်းများကို download ပြုလုပ်ရန် မလိုပေ။ ထို့အပြင် အဆိုပါဂိမ်းများကို အွန်လိုင်းမှ သူငယ်ချင်းများနှင့် ကစားနိုင်သလို cloud တွင် save လုပ်ထားနိုင်သောကြောင့် နောက်တစ်ကြိမ် ပြန်ကစားသည့်အခါ အစမှ ပြန်လည်ကစားရန် မလိုအပ်ပေ။ Streaming ဖြင့် ကစားရသောကြောင့် ဂိမ်းကစားစဉ် နှောင့်နှေးမှုဖြစ်ခြင်းက ပြဿနာတစ်ရပ် ဖြစ်နိုင်သောကြောင့် လျင်မြန်သည့် အင်တာနက်ချိတ်ဆက်မှု ရှိရန် လိုအပ်မည်ဟု သိရသည်။

အဆိုပါ ဝန်ဆောင်မှုသစ်ကို ထောက်ပံ့ပေးမည့် ရက်အတိအကျအား Sony မှကြေညာထားခြင်း မရှိသလို ၎င်းဝန်ဆောင်မှုကို အမေရိကန်နှင့် ကနေဒါ ပြင်ပတွင် ရရှိနိုင်မည့် အချက်အလက်များကိုလည်း ကုမ္ပဏီမှ ထုတ်ဖော်ပြောကြားခဲ့ခြင်း မရှိပေ။

Ref: CNET