ပြည်ပမှ ဝင်ရောက်လာသည့် ဆက်သွယ်ရေး အော်ပရေတာများက Conference Call ဝန်ဆောင်မှုကို ပေးအပ်

ပြည်ပမှ ဝင်ရောက်လာသည့် ဆက်သွယ်ရေးအော်ပရေတာ နှစ်ခုဖြစ်သော Ooredoo နှင့် Telenor  သည် တစ်ပြိုင်နက်တည်း မိုဘိုင်းဖုန်း  ၅ လုံးနှင့် ချိတ်ဆက်၍ အသံ ပြောဆိုမှု ပြုလုပ်နိုင်သည့် Conference Call   ဝန်ဆောင်မှုကို ပေးအပ်ခဲ့ကြောင်း သိရသည်။

Conference Call ဆိုသည်မှာ မိုဘိုင်းနံပါတ်တစ်ခုကို ခေါ်ဆိုပြီးသည့်နောက် မိုဘိုင်းဖုန်းပြောဆို နေစဉ်အတွင်း Add Call ကိုနှိပ်၍ အခြားသော မိုဘိုင်းနံပါတ်တစ်ခုကို ခေါ်ဆို၍ အပြန်အလှန် ချိတ်ဆက် အသုံးပြုနိုင်ခြင်း ဖြစ်သည်ဟု သိရသည်။ Conference Call ၌ မိုဘိုင်းဖုန်း နံပါတ် ၅ ခုအထိ ထပ်မံချိတ်ဆက်၍ပြောဆိုနိုင်ပြီး ထပ်မံ ချိတ်ဆက်၍ အသံခေါ်ဆိုလိုသော မိုဘိုင်းဖုန်းနံပါတ်များကို Merge Call နှိပ်၍ ဆက်လက် အသုံးပြုနိုင် သည်ဟု Telenor ကကြေညာထားသည်။

Conference Call အတွက် ကျသင့်ငွေကို Add Call ပြုလုပ်သူမှ ချိတ်ဆက်လိုက်သည့် မိုဘိုင်းဖုန်းလိုင်း အရေအတွက် aပါ် မူတည်၍  အသုံးပြုခဲ့သည့် မိုဘိုင်းဖုန်းလိုင်း တစ်လိုင်းချင်းစီ၏ ကျသင့်သော မိနစ်အလိုက် ငွေကြေးကို ပေးဆောင်ရမည်ဟု ဝန်ဆောင်မှု ပေးအပ်ထားသည့် ဆက်သွယ်ရေးအော်ပရေတာက ဆိုသည်။

အဆိုပါ ဝန်ဆောင်မှုကို Ooredoo နှင့် Telenor ကပေးအပ်ထားခြင်း ဖြစ်သော်လည်း Add Call  ပြုလုပ်သည့် အခါ မြန်မာ့ဆက်သွယ်ရေးလုပ်ငန်း၏ မိုဘိုင်းဖုန်း နံပါတ်များကိုလည်း ချိတ်ဆက် အသုံးပြုနိုင်သည်ဟု သိရသည်။ အဓိကအားဖြင့် တစ်ပြိုင်နက်တည်း အသံခေါ်ဆိုမှုပြုလုပ်၍ စကားပြောဆိုရန် လိုအပ်ပါက အဆိုပါ ဝန်ဆောင်မှုကိုအသုံးပြုရန် အသင့်တော်ဆုံး ဖြစ်သည်ဟုလည်း မိုဘိုင်းဖုန်းလိုင်းအသုံးပြုသူများက ဆိုရှယ် မီဒီယာ၌ မှတ်ချက်ပြုခဲ့ကြသည်။

အော်ပရေတာများ အနေဖြင့် Conference Call အပြင် အခြားသော ဝန်ဆောင်မှုများဖြစ်ကြသည့် Call  Watting၊ Voice Mail စသည့် ဝန်ဆောင်မှုများအပြင် အခြားသော ဝန်ဆောင်မှု များကို ပေးအပ်ထားသော်လည်း အသုံးပြုသူများ အနေဖြင့် ဝန်ဆောင်မှု အသစ်များကို အသုံးပြုသူ နည်းပါးနေသေးသည်ဟု သိရသည်။