ရန်ကုန်ကို Smart City ဖြစ်စေရေး အားလုံးပူးပေါင်း ပါဝင်ရန်လို

ရန်ကုန်ကို Smart City ဖြစ်စေရေး အားလုံးပူးပေါင်း ပါဝင်ရန်လိုအပ်ကြောင်း ရန်ကုန်တိုင်းဒေသကြီး ကရင်တိုင်းရင်းသား လူမျိုးရေးရာဝန်ကြီးဌာန၊ ပြည်သူ့ဆက်ဆံရေး ဝန်ကြီးဌာနနှင့် ဟိုတယ်နှင့် ခရီးသွားလာရေးဝန်ကြီးဌာန ဝန်ကြီး နော်ပန်းသဉ္ဇာမျိုးက ပြောပါတယ်။

ဇန်နဝါရီ ၁၃ ရက်က ကျင်းပခဲ့တဲ့ Smart City နှင့် အနာဂတ်ရန်ကုန်ဆွေးနွေးပွဲမှာ ပြောကြားခဲ့တာ ဖြစ်ပါတယ်။ “အဆင့်မြင့် နည်းပညာတွေကိုသုံးဖို့၊ စမတ်ဖုန်းတွေကို သုံးဖို့ဆိုရင် သက်လတ်ပိုင်း၊ သက်ကြီးပိုင်းတွေက အင်မတန်ကြောက်ရွံ့တာမျိုးတွေရှိတယ်၊ ပြည်သူတွေဘက်က ပြုပြင်ပြောင်းလဲမှုတွေ လုပ်ဆောင်ရမှာဖြစ်သလို အစိုးရပိုင်းကလည်း အခြေခံ အဆောက်အဦပိုင်းဆိုင်ရာ လုပ်ဆောင်ရမှာတွေရှိတယ်၊ Smart City လို့ဆိုလိုက်တာနဲ့ နည်းပညာတစ်ခုတည်းကို တန်းမမြင်ဘဲနဲ့ အရာအားလုံးကိုမြင်မိပါတယ်၊ ပြည်သူတွေရဲ့ ပူးပေါင်းပါဝင်မှုအတွက် အစိုးရတစ်ရပ်က ပြည်သူတွေကို ပူးပေါင်းပါဝင်အောင် ဘယ်လောက်အထိ လှုံ့ဆော်နိုင်မလဲဆိုတာ အရေးကြီးပါတယ်” လို့ ပြောကြားခဲ့ပါတယ်။

အစိုးရဝန်ကြီးဌာနမှာရှိတဲ့ ဝန်ထမ်းတွေအနေနဲ့ အိုင်စီတီနည်းပညာဆိုင်ရာကို ဘယ်လောက်အထိ ရင်းနှီးနေပြီလဲ၊ နိုင်ငံက ဘယ်လောက်အထိ အဆင်သင့်ဖြစ်ပြီလဲ ဆိုတဲ့အချက်ကို Smart City အကောင်အထည် ဖော်မယ့်နေရာမှာ တွေ့လာရမှာဖြစ်ကြောင်း၊ အကောင်အထည် ဖော်တဲ့နေရာမှာ အစိုးရနဲ့ပြည်သူနှစ်ရပ်လုံး ပူးပေါင်းပါဝင်ဖို့ လိုအပ်မှာဖြစ်ကြောင်း ပြောကြားခဲ့တာဖြစ်ပါတယ်။ လက်ရှိမှာ ရန်ကုန်ကို Smart City အဖြစ် အကောင်အထည်ဖော်ဖို့ Smart Nation အဖြစ်ဆောင်ရွက်ဖို့ လုပ်ငန်းရှင်တွေ၊ ပညာရှင်တွေက ရန်ကုန်တိုင်းဒေသကြီးအစိုးရအဖွဲ့နဲ့ လာတွေ့ကြတာမျိုးတွေ ရှိတယ်လို့ သိရပါတယ်။

“Smart City ဆိုတဲ့နေရာမှာ ကျွန်မတာဝန် ထမ်းဆောင်ရတဲ့ နှစ်နှစ်တာကာလပတ်လုံးမှာ ခဏခဏ ကြားနေရပါတယ်၊ Smart City လုပ်မယ်၊ Smart Nation လုပ်မယ်၊ အဲဒါလုပ်ဖို့ ရန်ကုန်တိုင်းကို ဘယ်လိုလုပ်ရမလဲ ဆိုပြီး လုပ်ငန်းရှင်ပေါင်းများစွာ၊ ပညာရှင်ပေါင်းများစွာ ကျွန်မတို့ ရန်ကုန်တိုင်းဒေသကြီး အစိုးရအဖွဲ့နဲ့ လာတွေ့ကြတာရှိပါတယ်” လို့ ထည့်သွင်းပြောကြားခဲ့ပါတယ်။

Smart City အဖြစ် ရန်ကုန်ကို အကောင်အထည်ဖော်ဖို့နေရာမှာ နံပါတ်တစ်အနေနဲ့ အခြေခံအဆောက်အဦ လိုအပ်မှာဖြစ်ကြောင်း၊ လမ်းတံတား အိုးအိမ်အဆောက်အဦတွေ Hardware ပိုင်းဆိုင်ရာ အခြေခံအဆောက်အဦ တွေအပြင် ဒီဂျစ်တယ်ပိုင်းဆိုင်ရာ နည်းပညာပိုင်းရာ အခြေခံအဆောက်အဦတွေလည်း လိုအပ်လာမှာဖြစ်ကြောင်း ပြောကြားခဲ့ပါတယ်။

ထွန်းထွန်း