B.Tech မှ B.E ပေါင်းကူးဝင်ခွင့်စာမေးပွဲ ကျင်းပမည်

MB.jpg

သိပ္ပံနှင့် နည်းပညာဝန်ကြီးဌာန အောက်ရှိ နည်းပညာတက္ကသိုလ်၊ ကောလိပ်နှင့် သိပ္ပံများတွင် ဖွင့်လှစ် သင်ကြားလျက်ရှိသော B-Tech သင်တန်းများ၏ အတန်းတင် စာမေးပွဲများတွင် အောင်မြင်ပြီး တစ်ဆင့်မြင့် သင်တန်းများသို့ ဆက်လက် တက်ရောက်ခွင့် မရခဲ့သော ကျောင်းသား၊ ကျောင်းသူများအားလုံး အတွက် ပေါင်းကူး ဝင်ခွင့်စာမေးပွဲ ကျင်းပမည်ဖြစ်ကြောင်း သိရသည်။

ဝင်ခွင့်အရည်အချင်းစစ် စာမေးပွဲဖြေဆိုခွင့် လျှောက်လွှာများနှင့် မိမိတို့ ဖြေဆိုရမည့် ဘာသာရပ်အလိုက် Scope များကို မိမိတို့ B.Tech သင်တန်း အောင်မြင်ခဲ့သည့် နည်းပညာတက္ကသိုလ်၊ ကော လိပ်၊ သိပ္ပံများတွင် ၂၀၁၅ ခုနှစ် ဇန်နဝါရီလ ၁၂ ရက်မှ စတင်ရယူနိုင်ပြီး B.Tech ဘွဲ့လက်မှတ်မူရင်း (သို့မဟုတ်) အောင်မြင်ကြောင်း ထောက်ခံစာ၊ နိုင်ငံသားစိစစ်ရေးကတ်ပြား (မိတ္တူ)၊ အကျင့် စာရိတ္တ ကောင်းမွန်ကြောင်း ကိုယ်တိုင်ဝန်ခံချက်နှင့် မိဘအုပ်ထိန်းသူများ၏ ဝန်ခံချက်၊ တစ်လအတွင်း ရိုက်ကူးထားသော ပတ်စ်ပို့အရွယ် ရောင်စုံဓာတ်ပုံ ၄ ပုံ တို့နှင့်အတူ ၂၀၁၅ ခုနှစ်၊ မေလ ၂၉ ရက် နောက်ဆုံးထားပြီး လျှောက်ထားရမည် ဖြစ်သည်။ ပေါင်းကူးဝင်ခွင့် သတ်မှတ်ချက်များအတိုင်း လျှောက်လွှာတင်ထားသည့် စာမေးပွဲဖြေဆိုမည့် သူများသည် မိမိတို့ လျှောက်လွှာတင်ထားသည့် နည်းပညာ တက္ကသိုလ်၊ ကောလိပ်နှင့် သိပ္ပံများတွင် ဝင်ခွင့်အရည်အချင်း စာမေးပွဲကို ၂၀၁၅ ခုနှစ် ဇွန်လ ၂၇ ရက်တွင် အင်္ဂလိပ်စာဘာသာရပ်ကို နံနက် ၉ နာရီမှ မွန်းတည့် ၁၂ နာရီအထိ လည်းကောင်း၊ သက်ဆိုင်ရာဘာသာရပ်ကို ဇွန်လ ၂၈ ရက်တွင် နံနက် ၉ နာရီမှ မွန်းတည့် ၁၂ နာရီအထိလည်းကောင်း ဖြေဆိုရမည်ဖြစ်သည်။

အသေးစိတ် ထပ်မံသိရှိလိုပါက ကျောင်းသားရေးရာဌာန၊ စက်မှုနှင့် သက်မွေးပညာဦးစီးဌာန (ရုံးချုပ်) နေပြည်တော်၊ ဖုန်း-၀၆၇-၄၀၄၁၈၂ နှင့် သက်ဆိုင်ရာ နည်းပညာ တက္ကသိုလ်များ၊ ကောလိပ်နှင့် သိပ္ပံများတွင် ဆက်သွယ် မေးမြန်းစုံစမ်းနိုင်သည်။