Browser ballot screen ကို ရပ်ဆိုင်းခဲ့သည့် Microsoft

aa-browser-3-zaw2.png

ဥရောပသမဂ္ဂသည် ၂၀၀၉ ခုနှစ်၌ Microsoft browser လွှမ်းမိုးထားချိန်တွင် သုံးစွဲသူများ browser များကို ရွေးချယ်အသုံးပြုနိုင်ရန် စီစဉ်ပေးခဲ့သည်။ သို့သော်လည်း ယခုအခါတွင် ဥရောပသမဂ္ဂနှင့် Microsoft တို့၏ သဘောတူညီချက်သည် ပျက်ပြယ်သွားပြီ ဖြစ်သည်။

၂၀၀၉ ခုနှစ်က ဥရောဂသမဂ္ဂတွင် Microsoft သည် Windows နှင့်အတူ Internet Explorer browser ကိုသာထည့်သွင်းထားပြီး browser ဈေးကွက်အတွက် မညီမျှမှုဖြစ်ပေါ်အောင် ပြုလုပ်နေမှုအပေါ် အကြိတ်အနယ် ဆွေးနွေးခဲ့ကြသည်။ ထို့နောက်ဆွေးနွေးမှု၏ ရလဒ်အဖြစ် ဥရောပသမဂ္ဂရှိ အဖွဲ့ဝင်များက “browser ballot ” ဟုခေါ်သည့် ဝက်ဘ်ဆိုက်ကို လွှင့်ခဲ့သည်။ Microsoft သည် ဥရောပသမဂ္ဂနှင့် အပြန်အလှန် သဘောတူညီချက်များအရ သုံးစွဲသူများသည် Windows တွင်ပါဝင်သော Internet Explorer ထက် အသုံးပြုလိုသည့် browser ကို ကိုယ်တိုင်ရွေးချယ်နိုင်ရန် အစီအစဉ်တစ်ခု လုပ်ဆောင်ပေးခဲ့သည်။ ၎င်း EU Browser Ballot ဆိုက်တွင် ယခုဝက်ဘ်ဆိုက်ကို ၂၀၀၉ ခုနှစ် ဒီဇင်ဘာလက ဥရောပသမဂ္ဂဆုံးဖြတ်ချက်နှင့် အညီ Microsoft မှ ဖန်တီးပေးခဲ့ကြောင်း၊ ယခုအခါတွင် ဥရောပသမဂ္ဂမှ ပြဋ္ဌာန်းထားသော စည်းကမ်းများ ပြည့်မြောက်သွားပြီ ဖြစ်သောကြောင့် Microsoft အနေဖြင့် ယခုဝက်ဘ်ဆိုက်ကို ဆက်လက်ထိန်းသိမ်းတော့မည် မဟုတ်ကြောင်း၊ Web browser များအကြောင်း သိလိုသူများ သို့မဟုတ် အခြား browser များကို download ပြုလုပ်လိုသူများအနေဖြင့် သက်ဆိုင်ရာ Web browser များသို့သာ တိုက်ရိုက်သွားရောက်ကြရန် တိုက်တွန်းကြောင်း ဆိုသည့်စာသားကို တွေ့မြင်ရမည် ဖြစ်သည်။

ထိုစဉ်က Microsoft နှင့် ဥရောပသမဂ္ဂတို့ စာချုပ်ချုပ်ဆိုခဲ့ရာတွင် ဥရောပသမဂ္ဂက ကုမ္ပဏီ၏ browser ဈေးကွက်ရှယ်ယာ ၇၀ ရာခိုင်နှုန်း ရယူထားမှုအပေါ် ထောက်ပြပြောဆိုခဲ့သည်။ သို့ရာတွင် ယခုလက်ရှိ အချိန်၌ ဥရောပတွင် Internet Explorer ဈေးကွက်ရှယ်ယာ ၁၈ ရာခိုင်နှုန်းမှ ၂၅ ရာခိုင်နှုန်းသာ ရှိတော့သည်။ Google ၏ Chrome browser ကမူ ဥရောပတွင် ဈေးကွက်ဝေစု ၅၀ ရာခိုင်နှုန်းရှိလာကြောင်း StatCounter ကုမ္ပဏီမှ ဖော်ပြခဲ့သည်။

Ref: CNET