၂၀၁၅ ခုနှစ်တွင် ခရက်ဒစ်ကတ် ထုတ်လုပ်ခွင့် ပြန်လည်ရရှိ ရန် ပြည်တွင်းဘဏ် လုပ်ငန်းရှင်များ မှေá

shutterstock_29251765.jpg

ပြည်တွင်းဘဏ်လုပ်ငန်း စီးဆင်းလည်ပတ်မှုတွင် ဆယ်စုနှစ် တစ်စုကျော်ကြာ ရပ်တန့်ခဲ့သည့် ခရက်ဒစ်ကတ် (Credit Card) များကို ပြန်လည် ထုတ်လုပ်နိုင်ရန် အတွက် ပုဂ္ဂလိကဘဏ်များသည် ဗဟိုဘဏ်၏ ခွင့်ပြုချက်ကို စောင့်ဆိုင်း နေကြသော်လည်း ယခုအချိန် အထိခွင့်ပြုချက် မကျသေးကြောင်း စုံစမ်းသိရသည်။

ပုဂ္ဂလိက ဘဏ်လုပ်ငန်းများသည်  ခရက်ဒစ်ကတ်များ ပြန်လည် ထုတ်လုပ်နိုင်ခွင့်ကို ၂၀၁၄ ခုနှစ် မကုန်မီ အချိန်အတွင်း ရရှိနိုင်ရန် မျှော်လင့်ခဲ့ကြသော်လည်း ယင်းအကြွေးဝယ်ကတ်များကို လာမည့် နှစ်မှသာ ခွင့်ပြုပေးဖွယ် ရှိကြောင်း ဘဏ်လုပ်ငန်း ကျွမ်းကျင်သူအချို့က သုံးသပ် ပြောကြားသည်။

မြန်မာနိုင်ငံတော် ဗဟိုဘဏ်သည် ပြည်တွင်းဘဏ်လုပ်ငန်း အတွက် ခရက်ဒစ်ကတ်များကို ပြန်လည်ခွင့်ပြုပေးရန် အတွက် ပြည်တွင်း ဈေးကွက် စီးပွားရေးစနစ် အခြေအနေကို လေ့လာ ဆန်းစစ်နေခြင်းကြောင့် ယခုကဲ့သို့ ကြာမြင့် နေခြင်းဖြစ်နိုင်ကြောင်း  အထက်ပါ ဘဏ်လုပ်ငန်း ကျွမ်းကျင်သူများက ဆိုကြသည်။

“ဗဟိုဘဏ်အနေနဲ့ ခရက်ဒစ်ကတ်တွေ ပြန်ခွင့်ပြုဖို့ကိစ္စမှာ ပြည်တွင်းစီးပွားရေး အခြေအနေကိုလည်း သေသေချာချာ လေ့လာဆန်းစစ်မှုတွေ လုပ်ရပါသေးတယ်။ အခုဆိုရင် မြန်မာနိုင်ငံမှာ အီလက်ထရွန်နစ် စနစ် ငွေပေးချေရေး ကတ်တွေက ပြန်ပြီး ခေတ်စားလာနေပြီဆိုတော့ ခရက်ဒစ်ကတ်တွေ ပြန်လာမယ်လို့မျှော်လင့်ပါတယ်”ဟု ပုဂ္ဂလိကဘဏ်လုပ်ငန်း တစ်ခု၏ တာဝန်ရှိသူတစ်ဦးကဆိုသည်။

ပြည်တွင်းဘဏ်လုပ်ငန်း စီးဆင်းလည်ပတ်မှုတွင် အီလက်ထရွန်နစ်စနစ် အကြွေးဝယ်ခွင့်ကတ်များအား ပြန်လည်ထုတ်ဝေ၊ သုံးစွဲနိုင်ရန် အတွက် မြန်မာနိုင်ငံငွေချေရေး အဖွဲ့အစည်းဖြစ်သည့် Myanmar Payment Union တွင်ပါဝင်သည့် ဘဏ်လုပ်ငန်းလုပ်ကိုင်နေသူများက  ဗဟိုဘဏ်သို့  ယခုနှစ်အစောပိုင်းက တရားဝင်စာတင်ပြထားကြောင်း သိရသည်။

ထို့ကြောင့် မြန်မာနိုင်ငံတော် ဗဟိုဘဏ်အနေဖြင့် ခရက်ဒစ်ကတ်များ ထုတ်လုပ်ခွင့်အတွက် စီးပွားရေးကျွမ်းကျင် ပညာရှင်၊ ဘဏ်လုပ်ငန်း ကျွမ်းကျင်ပညာရှင် အစရှိသူများနှင့် ညှိနှိုင်း ဆောင်ရွက်မှုများ ပြု လုပ် နေခြင်းကြောင့် ယခုကဲ့သို့ အနည်းငယ် နှောင့်နှေးနေခြင်း ဖြစ်ကြောင်း အထက်ပါ တာဝန်ရှိသူက သုံးသပ် ပြောကြားသည်။

ပြည်တွင်းဘဏ်လုပ်ငန်း လည်ပတ်မှုတွင် အကြွေးဝယ်ကတ်များ ဖြစ်သည့် ခရက်ဒစ်ကတ်များကို ပြန်လည် အသုံးပြုလာနိုင်မည် ဆိုပါက မြန်မာနိုင်ငံ၏ အီလက်ထရွန်နစ် ငွေပေးချေရေးကတ်ကို သုံးစွဲမှုမှာ လက်ရှိထက် ပိုမိုကျယ်ပြန့်လာနိုင်မည် ဖြစ်ကြောင်း ပုဂ္ဂလိကဘဏ်လုပ်ငန်းရှင်တချို့က သုံးသပ်ပြောကြားသည်။

ယခုလက်ရှိအချိန်တွင် ပြည်တွင်း ဘဏ်လုပ်ငန်းများ၏ အီလက်ထရွန်နစ် ငွေပေးချေရေးကတ်များ ဖြစ်သည့် MPU ကတ်များအပြင် နိုင်ငံတကာသုံး ငွေပေးချေရေး ကတ်များဖြစ်သည့် Visa,  Master,  CUP, JCB အစရှိသည့် ကတ်များကို အသုံးပြုနိုင်နေပြီ ဖြစ်သည်။

သို့သော် အဆိုပါကတ်များသုံး စွဲမှုတွင် နည်းပညာပိုင်းဆိုင်ရာ အားနည်းချက် အချို့ကြောင့် မည်သည့် အချိန်တွင် ဖြစ်စေ အလွယ်တကူ အသုံးပြုနိုင်ခြင်း မရှိသေးကြောင်း ယင်းကတ်သုံးစွဲသူ အချို့က ဝေ ဖန် ပြောကြားသည်။

အဆိုပါ ခရက်ဒစ်ကတ်များကို ဘဏ်လုပ်ငန်းစီးဆင်း လည်ပတ်မှုတွင်ပြန်လည် သုံးစွဲခွင့်ရလာပါက ဘဏ်လုပ်ငန်း လုပ်ကိုင်သူများသည် အဆိုပါကတ် ထုတ်လုပ်မှုနှင့်သုံးစွဲမှုများကို စနစ်တကျ ဂရုစိုက် ရမည် ဖြစ်ကြောင်း ဘဏ်လုပ်ငန်းကျွမ်းကျင်သူအချို့က သတိပေး ပြောကြားသည်။

မြန်မာနိုင်ငံတွင် လွန်ခဲ့သည့် ဆယ်စုနှစ်ဝန်းကျင်က ခရက်ဒစ်ကတ်များကြောင့် ပြည်တွင်းဘဏ်လုပ်ငန်း ပြိုလဲမှုများဖြစ် ပေါ်ခဲ့သဖြင့် အဆိုပါ ကတ်သုံးစွဲမှုကို ဗဟိုဘဏ်က ခွင့်ပြုလာမည်ဆိုပါက စနစ်တကျ ထိန်းချုပ် သွားရန် လိုအပ်ကြောင်း အထက်ပါပုဂ္ဂိုလ်များက သုံးသပ်ပြောကြားသည်။