ပြည်ပမှ မိုဘိုင်းဖုန်းနှင့် ဆက်စပ်နည်းပညာ ထုတ်ကုန် တင်သွင်းမှု ၂၀၁၅ တွင် နှစ်ဆကျော် မြင့်တကá

IMG_5935.jpg

မြန်မာနိုင်ငံသို့ မိုဘိုင်းဖုန်းနှင့် ဆက်စပ်ပစ္စည်းများ တင်သွင်းမှု ပမာဏသည် ယခုနှစ်အတွင်း မြင့်တက်လျက် ရှိနေပြီး လာမည့်  ၂၀၁၅ ခုနှစ်အတွင်း၌ ယခုလက်ရှိ ပမာဏထက် နှစ်ဆကျော် မြင့်တက်လာနိုင်ကြောင်း ပြည်တွင်း အခြေစိုက် မိုဘိုင်းဖုန်း စီးပွားရေး လုပ်ကိုင်နေသည့် လုပ်ငန်းရှင်များက ခန့်မှန်းသုံးသပ် ကြသည်။

ပြည်တွင်းသို့ စမတ်ဖုန်းနှင့် Tablet များအပြင် မိုဘိုင်းဖုန်းနှင့် ဆက်စပ်ပစ္စည်း တင်သွင်းမှုများက အခြားနည်းပညာ ထုတ်ကုန် ပစ္စည်းများထက် ပိုမိုများပြား လာမည်ဖြစ်ကြောင်း အထက်ပါ လုပ်ငန်းရှင်များက တညီတညွတ်တည်း ပြောကြားသည်။

ရန်ကုန်၊ မန္တလေးနှင့် လူနေထူထပ်သည့် မြို့ကြီးများတွင် စမတ်ဖုန်း အသုံးပြုသူနှုန်း သိသိသာသာ မြင့်တက်လာခြင်းကြောင့် ယခုကဲ့သို့ မိုဘိုင်းဖုန်းနှင့် ဆက်စပ်ပစ္စည်း တင်သွင်းမှု ပမာဏ တိုးတက်လာရခြင်း ဖြစ်ကြောင်း ရန်ကုန်အခြေစိုက် မိုဘိုင်းဖုန်း ဝန်ဆောင်မှုဆိုင် ဖွင့်လှစ်ထားသူ အချို့ကပြောသည်။

မြန်မာနိုင်ငံ၏ မိုဘိုင်းဖုန်း တင်သွင်းမှုသည် လာမည့်နှစ်တွင် နှစ်ဆအထိ မြင့်တက်လာမည်ဟု Microsoft ကုမ္ပဏီ၏ တာဝန်ရှိသူ အချို့က ယခုနှစ်လယ်ပိုင်းက ပြည်တွင်း၌ ပြုလုပ်ခဲ့သည့် သတင်းစာ ရှင်းလင်းပွဲ တစ်ခုတွင် သုံးသပ်ပြောကြား ခဲ့သေးသည်။

နယ်စပ်ဒေသ များမှနေ၍ မြန်မာနိုင်ငံ အတွင်းသို့ မိုဘိုင်းဖုန်းနှင့် ဆက်စပ်ပစ္စည်းများ တင်သွင်းမှုသည် ပြီးခဲ့သည့် ၂၀၁၁-၁၂ ဘဏ္ဍာနှစ်မှ စတင်ကာ တဖြည်းဖြည်းချင်း မြင့်တက်ခဲ့ပြီး  လာမည့်နှစ်များတွင် ဆက်လက်မြင့်တက် နိုင်ဖွယ်ရှိကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ စုံစမ်းသိရသည်။

မြန်မာနိုင်ငံ၏ အင်တာနက် အသုံးပြုသူ စုစုပေါင်း ရာခိုင်နှုန်း၏ နှစ်ဆယ့်ငါး ရာခိုင်နှုန်းသည် မိုဘိုင်းဖုန်း အသုံးပြုသူများ ဖြစ်လာလိမ့်မည်ဟု နိုင်ငံခြား ဆက်သွယ်ရေး ကုမ္ပဏီမှ ဈေးကွက်ကျွမ်းကျင် သူများက သုံးသပ် ပြောကြားသည်။

“ဒီနှစ်ထဲမှာ မိုဘိုင်းဖုန်းနဲ့ တခြားဆက်စပ် ပစ္စည်းတွေ ပိုဝင်လာတယ်။ ဆက်သွယ်ရေး အော်ပရေတာတွေ အပြိုင်အဆိုင် ဖြစ်လာပြီး နောက်ပိုင်း မိုဘိုင်းဖုန်းနဲ့ ဆက်စပ်ပစ္စည်းတွေ ပြည်တွင်းကို ဝင်ရောက်လာတဲ့ နှုန်းကပိုမြင့်တက်လာတဲ့ သဘောပါ။ လာမယ့်နှစ်တွေဆို ဒီထက်ပိုပြီး တိုးတက်လာတော့မှာပါ” ဟု လူကြီးမင်း မိုဘိုင်းဖုန်းနှင့် ဝန်ဆောင်မှု ဆိုင်မှ တာဝန်ရှိသူတစ်ဦးက သုံးသပ်ပြောကြားသည်။

ရန်ကုန်၊ မန္တလေး အစရှိသည့် မြို့ကြီးများ အပါအဝင် အခြားနယ်မြို့များရှိ မိုဘိုင်းဖုန်း ရောင်းချသည့် စီးပွားရေး လုပ်ငန်းများ၏ ပြီးခဲ့သည့်လ အနည်းခန့်မှ စတင်ကာ ဈေးကွက်မြှင့်တင်ရန် အတွက် ကြိုတင်ပြင်ဆင်မှုများ ပြုလုပ်နေကြပြီ ဖြစ်သည်။

မြန်မာနိုင်ငံ၌ မိုဘိုင်းဖုန်း အသုံးပြုနိုင်သူ ၁၇ သန်း ရှိလာပြီဖြစ်ပြီး ယင်းအနက်မှ ထက်ဝက်ခန့်သည် မိုဘိုင်းဖုန်းဖြင့် အင်တာနက် အသုံးပြုသူများ ဖြစ်ကြကြောင်း ဆက်သွယ်ရေးနှင့် သတင်းအချက်အလက်၊ နည်းပညာ ဝန်ကြီးဌာနမှ သိရသည်။