မာ့ခ်ဇူကာဘတ်ကို ကာကွယ်ရန် သက်တော်စောင့် ၁၆ ယောက် ခန့်အပ်ထား

zucker3_3504360b.jpg

Facebook ကို တည်ထောင်သူ မာ့ခ်ဇူကာဘတ်သည် အွန်လိုင်းမှတစ်ဆင့် ခြိမ်းခြောက်ခံရပြီးနောက် ကယ်လီဖိုနီးယားရှိ နေအိမ်တွင် သက်တော်စောင့် ၁၆ ယောက်ကို ခန့်အပ်ခဲ့ကြောင်း သိရသည်။

မာ့ခ်ဇူကာဘတ်သည် ဆီလီကွန်တောင်ကြားရှိ ငယ်ရွယ်သော ဘီလီလျံနာများအနက် တစ်ဦးဖြစ်ပြီး အွန်လိုင်းမှတစ်ဆင့် message များရရှိပြီးနောက် လုံခြုံရေးကို တိုးမြှင့်လိုက်ကြောင်း သတင်းတစ်ခုတွင် ဖော်ပြထားသည်။ “သူ့ (မာ့ခ်ဇူကာဘတ်) အိမ်မှာ အစောင့်တွေရှိပါတယ်” ဟု သတင်းရင်းမြစ်တစ်ခုက Page Six သို့ ပြောကြားခဲ့သည်။ ထို့အပြင် မာ့ခ်ဇူကာဘတ်၏ သက်တော်စောင့် ၁၆ ယောက်သည် ပါလိုအယ်တိုအနီးရှိ ပေါင်ဆယ်သန်းတန် နေအိမ်တွင် လုံခြုံရေး တာဝန်ယူထားကြောင်း သတင်းရင်းမြစ်က ပြောကြားခဲ့သည်။

“လူသန်းပေါင်းများစွာနဲ့ ထိတွေ့ဆက်ဆံနေရတာပါ။ CEO တွေအားလုံးက ခြိမ်းခြောက်မှုတွေ ခံရပါတယ်။ သူတို့က ဒီကိစ္စကို အလေးအနက်ထားပါတယ်” ဟု ဆီလီကွန်တောင်ကြား ရင်းမြစ်တစ်ခုကလည်း Page Six သို့ပြောဆိုခဲ့သည်။

ထိုခြိမ်းခြောက်မှုများသည် တစ်ခါတစ်ရံတွင် မိသားစုဝင်များကိုလည်း ပစ်မှတ်ထားကြောင်း သတင်းရင်းမြစ်တစ်ခုက ပြောကြားသွားခဲ့သည်။ သမီးရည်းစား ပြတ်စဲခြင်းနှင့် လင်မယား ကွာရှင်းမှုများတွင် Facebook သည် အဓိက အကြောင်းပြချက်အဖြစ် ရှိနေသောကြောင့် ၎င်းကို သဘောမကျသည့် လူများစွာ တိုးပွားလျက်ရှိကြောင်း သိရသည်။

Hart Scales & Hodges Solicitors ရှိ မိသားစုဆိုင်ရာ ဥပဒေကျွမ်းကျင်သူ အမ်မာပတယ်က Facebook သည် လင်မယားများ ကွာရှင်းမှုအတွင်း ကြားလူအဖြစ် ပါဝင်နေကြောင်း ပြောကြားခဲ့သည်။

ယခုအခါတွင် ဇူကာဘတ်သည် စံချိန် ကန်ဒေါ်လာ ၄၇.၁ ဘီလီယံအထိ ပိုင်ဆိုင်ပြီး အမေရိကန်ရှိ အသက် ၄၀ အောက် ဒုတိယအချမ်းသာဆုံးပုဂ္ဂိုလ်ထက် ၄ ဆကြွယ်ဝနေသည်။

၎င်းသည် နေအိမ်အတွင်း လုံခြုံရေး အစီအမံအတွက် ကန်ဒေါ်လာ သန်း ၃၀ ကျော် သုံးစွဲခဲ့ကြောင်း သတင်းများက ဖော်ပြခဲ့ကြသည်။

မာ့ခ်ဇူကာဘတ်၏ လုံခြုံရေး အစီအစဉ်နှင့်ပတ်သက်၍ အိမ်နီးနားချင်းများက မပျော်မရွှင်ဖြစ်လျက်ရှိကြောင်း သိရသည်။

သက်တော်စောင့်များသည် ကားများကို တရားမဝင်ရပ်ထားကြောင်း အိမ်နီးချင်းများက ပြောဆိုခဲ့သည်။ ဒေသတွင်း ကားပါကင်အာဏာပိုင်များထံသို့ ကားများနှင့်ပတ်သက်၍ အစီရင်ခံသွားရန် ကြိုးပမ်းလျက်ရှိကြောင်း Buzzfeed မှ ဖော်ပြခဲ့သည်။

ဇူကာဘက်တ်၏ ပြောရေးဆိုခွင့်ရှိသူကမူ ကားရပ်နားမှုများကို တရားမဝင်ပြုလုပ်ခြင်းမရှိဟု ငြင်းဆိုခဲ့သည်။

Ref: Telegraph