၂၀၁၆ ခုနှစ်အတွင်း စမတ်ဖုန်း အများဆုံးဝယ်ယူမည် ဟုဆို

LG-V10.jpg

အီလက်ထရောနစ် နည်းပညာပစ္စည်းများအနက် စမတ်ဖုန်းကို ၂၀၁၆ ခုနှစ်အတွင်း အများဆုံး ဝယ်ယူသွားမည်ဟု Catalyst မှ ကောက်ယူခဲ့သည့် စစ်တမ်း၌ ဖော်ပြထားသည်။

စစ်တမ်းတွင် Desktop ကွန်ပျူတာကို ဝယ်ယူလိုသည်ဟု လူဦးရေ ၃ ရာခိုင်နှုန်းက ဖြေဆိုထားပြီး Laptop ကွန်ပျူတာကို ၁၂ ရာခိုင်နှုန်းက ဝယ်ယူမည်ဟု ဖြေဆိုထားသည်။ အဆိုပါ ဖြေဆိုမှုများအနက် စမတ်ဖုန်းဝယ်ယူမည်ဟု ဖြေဆိုထားသူအရေအတွက်သည် ၃၂ ရာခိုင်နှုန်းရှိပြီး ဖြေဆိုမှုအားလုံး၏ ရာခိုင်နှုန်း အများဆုံး ဖြစ်သည်။

စစ်တမ်းကောက်ယူမှုတွင် အလုပ်အကိုင်နှင့် ဝင်ငွေအဆင်ပြေမှုများအကြောင်းကို ထည့်သွင်းကောက်ခံခဲ့ပြီး ၂၀၁၅ ခုနှစ်၏ အလုပ်အကိုင်နှင့် ဝင်ငွေအဆင်ပြေမှုကို ၈၈ ရာခိုင်နှုန်းက ကောင်းမွန်သည်ဟု ဖြေဆိုခဲ့ပြီး ခန့်မှန်းအားဖြင့် ၂၀၁၆ ခုနှစ်တွင် ၉၇ ရာခိုင်နှုန်းခန့် ကောင်းမွန်လာမည်ဟု သိရသည်။

“ဒီနှစ်တွေထဲမှာ အလုပ်အကိုင်နဲ့ ဝင်ငွေအရ ကောင်းမွန်တယ်လို့ ဖြေကြတယ်။ နောက်နှစ်ထဲမှာ ဘာပစ္စည်းဝယ်မလဲလို့ ကောက်တဲ့စစ်တမ်းထဲမှာ စမတ်ဖုန်းအများဆုံးဝယ်မယ်လို့ ဖြေထားကြတယ်” ဟု Catalyst မှ မန်နေဂျင်းဒါရိုက်တာ ဦးအောင်သူရက ပြောသည်။

၂၀၁၆ ခုနှစ်အတွင်း ဝယ်ယူလိုသည့် ပစ္စည်းစာရင်းတွင် ကင်မရာ၊ ကားနှင့် မော်တော်ဆိုင်ကယ်အပြင် အခြားသော ပစ္စည်းများလည်း ပါဝင်ပြီး အချို့သော ပစ္စည်းများကို ဝယ်ယူလိုသူ အရေအတွက်မှာ ၁ ရာခိုင်နှုန်းခဲ့သာ ရှိခဲ့သည်ဟု သိရသည်။

အဆိုပါစစ်တမ်းကို Catalyst က လူဦးရေ ၁၁၁ ယောက်ကို ကောက်ယူခဲ့ခြင်းဖြစ်ပြီး အသက် ၁၈ နှစ်မှ ၃၅ နှစ်အတွင်းရှိသော အမျိုးသမီး ၅၅ ယောက်နှင့် အမျိုးသား ၅၆ ယောက်တို့ကို ရန်ကုန်၊ မန္တလေးနှင့် နေပြည်တော်မြို့များ၌ ကောက်ယူခဲ့ခြင်းဖြစ်သည်။

“ စစ်တမ်းကို ဝင်ငွေ ၄ သိန်းကနေပြီးတော့ ၁၀ သိန်းကြားရှိတဲ့ လူတွေဆီက ကောက်ယူခဲ့တာပါ” ဟု ဦးအောင်သူရက ပြောသည်။