ရန်ကုန်နည်းပညာတက္ကသိုလ်နှင့် MOU ရေးထိုးထားသော နိုင်ငံပေါင်း ၃၀ ခန့်ရှိ

wwwpanoramiocom.jpg

ရန်ကုန်နည်းပညာတက္ကသိုလ်နှင့် MOU ရေးထိုးထားသော နိုင်ငံပေါင်း ၃၀ ခန့်ရှိကြောင်း သိရသည်။

တက္ကသိုလ်အချင်းချင်း ပူးပေါင်း၍ အပြန်အလှန် ပညာရေးဆိုင်ရာ အစီအစဉ်များကို ဆောင်ရွက်လျက်ရှိသည်ဟု သိရသည်။ အထက်ပါတက္ကသိုလ်ပေါင်း ၃၀ ဝန်းကျင်တွင် MOU ရေးထိုးထားခြင်းပေါင်း ၁၀၀ နီးပါးခန့်ရှိသည်ဟု ရန်ကုန်နည်းပညာတက္ကသိုလ် (YTU) မှ Prof .ဒေါက်တာအေးမြင့် (Rector) က ပြောသည်။

“YTU အနေနဲ့ MOU ထိုးထားတဲ့နိုင်ငံပေါင်း သုံးဆယ်လောက်ရှိပြီ။ MOU ပေါင်းက ၁၀၀ နီးပါးလောက် ရှိပါပြီ။ ဂျပန်တက္ကသိုလ်နဲ့က ပိုပြီး Update ဖြစ်မယ်။ PHD အစီအစဉ်၊ Master အစီအစဉ်တွေ လုပ်နေတယ်။ ဒုတိယ Update ဖြစ်တာကတော့ နယ်သာလန်ဖြစ်ပါတယ်” ဟု ပြောကြားသည်။

အခြားတက္ကသိုလ်များနှင့်လည်း ညှိနှိုင်းနေခြင်းများရှိကြောင်း သိရသည်။

“မနေ့ကဆို ပြင်သစ်နိုင်ငံက တက္ကသိုလ်နဲ့ ချိတ်ဆက်ဖို့လည်း ပဏာမ ညှိနှိုင်းပြီးဖြစ်ပါတယ်။ အသေးစိတ်ညှိနှိုင်းပြီး MOU ထိုးတဲ့အဆင့် နောက်ပိုင်းဆောင်ရွက်မှုတွေ အများကြီးရှိလာမှာပါ။ နိုင်ငံပေါင်း သုံးဆယ်အပြင် နောက်ထပ်တိုးချဲ့မယ့် နိုင်ငံတွေအများကြီးရှိတယ်” ဟု ဆက်လက်ပြောကြားသည်။

MOU ထိုးခြင်းမှာ ဝန်ကြီးဌာနခွင့်ပြုချက်ဖြင့် ထိုးထားခြင်းဖြစ်ပြီး လာရောက်ကမ်းလှမ်းထားခြင်း အများအပြားရှိကြောင်း သိရသည်။

ရန်ကုန်နည်းပညာတက္ကသိုလ်နှင့်ဆန်ဒနီနည်းပညာတက္ကသိုလ်တို့ ပူးပေါင်း၍ နည်းပညာမြင့် အစီအစဉ်များ ဆောင်ရွက်သွားရန် Yangon Technological University (YTU) နှင့် University of Technology Sydney (UTS) တို့ နားလည်မှုစာချွန်လွှာ ရေးထိုးခြင်းကို ဖေဖော်ဝါရီ ၃ ရက်တွင် YTU ၌ ပြုလုပ်ခဲ့သည်။ နှစ်ဖက်ကျောင်းသားများ အပြန်အလှန် လာရောက်သင်ကြားခြင်း (Exchange Program) ကဲ့သို့သော အစီအစဉ်များ ပါဝင်မည်ဖြစ်ကြောင်းသိရသည်။ YTU အနေဖြင့် နိုင်ငံတကာကျောင်းသားများကို လက်ခံကာ သုတေသနပြုလုပ်ခြင်း အစရှိသော ဆောင်ရွက်ချက်များ အကောင်အထည်ဖော်နေကြောင်း သိရသည်။