အပြည်ပြည်ဆိုင်ရာ Gateway တည်ဆောက်ခြင်းနှင့် ပတ်သက်၍ MIDO မှ အကြံပြုလွှာပေးပို့

12507285_1228444010504458_5549082558948367578_n.jpg

ဆက်သွယ်ရေးညွှန်ကြားမှု ဦးစီးဌာနမှ အကြံပြုရန် ဖိတ်ခေါ်ထားသော International Gateway နှင့်ပတ်သက်၍ နည်းပညာဆိုင်ရာ အရပ်ဖက်အဖွဲ့အစည်းတစ်ခုဖြစ်သော MIDO မှ အကြံပြုလွှာများ ပေးပို့ခဲ့ကြောင်း သိရသည်။

LIRNE Asia အဖွဲ့နှင့်ပူးပေါင်း၍ MDIO က အကြံပြုချက်များ ပေးပို့ခဲ့ခြင်းဖြစ်ပြီး အဆိုပါ အကြံပြုချက်များ၌ မူကြမ်းတွင်ပါဝင်သော အချက်အလက်များသည် နည်းပညာနှင့် ဈေးကွက်တို့၏ တိုးတက်မှုအတွက် အဓိကမကျသော အချက်အလက်များပေါ်တွင် အခြေခံထားသည်ဟု ဖော်ပြထားသည်။

အကြံပြုချက်များတွင် ပြည်တွင်းနှင့် ပြည်ပခေါ်ဆိုခများ ကွာဟနေခြင်းသည် တရားမဝင်ခေါ်ဆိုမှုများကို တားဆီးနိုင်မည်မဟုတ်ကြောင်း၊ ပြည်ပဆက်သွယ်မှုအတွက် Skype ၊ Viber စသည်တို့ကို အသုံးပြုစေခြင်းသည် အော်ပရေတာများ၏ ကျဆင်းနေသော ပြည်ပဆက်သွယ်ရေး ဝန်ဆောင်မှု ရောင်းအားကို ပိုမိုဆိုးရွားစေကြောင်း ပါရှိသည်။

MIDO ၏ အကြံပြုချက်များအရ မူကြမ်းတွင် Data Communication ကဏ္ဍကို အလေးထား ဖော်ပြထားခြင်းမရှိကြောင်း၊ မြန်မာနိုင်ငံအနေဖြင့် ဟောင်ကောင်နှင့် ဘင်္ဂလားဒေ့ရှ် ကဲ့သို့သော အမှားများကို ထပ်မံမှားယွင်းစွာ မပြုလုပ်ရန် အရေးကြီးကြောင်း စသည်တို့ကို အချက်အလက်ကိန်းဂဏန်းများနှင့် ဖော်ပြထားသည်။

International Gateway တည်ဆောက်ခြင်းအတွက် မူကြမ်းကို ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနက ၎င်း၏ဝက်ဘ်ဆိုက်တွင် ဖော်ပြထားပြီး အဆိုပါမူကြမ်းနှင့် ပတ်သက်၍ အကြံပေးလိုပါက ဇန်နဝါရီလ ၃၁ ရက် နောက်ဆုံးထား၍ ပြန်လည်ပေးပို့နိုင်ကြောင်း ကြေညာထားသည်။

အဆိုပါမူကြမ်းနှင့် ပတ်သက်၍ ရှင်းလင်းပွဲတစ်ခုကို ယခုလ ပထမအပတ်အတွင်း နေပြည်တော်၌ ကျင်းပခဲ့ပြီး အဆိုပါရှင်းလင်းပွဲသို့ ကာကွယ်ရေးဝန်ကြီးဌာန ဆက်သွယ်ရေး ညွှန်ကြားရေးမှူးရုံးမှ ကိုယ်စားလှယ်များနှင့် အော်ပရေတာများ၊ ဆက်သွယ်ရေး လိုင်စင်ရရှိထားသော ကုမ္ပဏီများ၊ ဆက်သွယ်ရေးလိုင်စင် လျှောက်ထားဆဲ ကုမ္ပဏီများမှ တာဝန်ရှိသူများ တက်ရောက်ခဲ့ကြသည်။