S Pen ပြဿနာ ဖြေရှင်းရန်အတွက် Note 5 ၏ hardware ကို ပြောင်းလဲခဲ့ကြောင်း Samsung ပြောကြား

note5-5.0.0.jpg

ပြီးခဲ့သည့်နှစ်က Samsung သည် ၎င်း၏ Galaxy Note 5 တွင် S Pen ကို ဘက်မှားထည့်သွင်းမှုကြောင့် feature များ အသုံးပြု၍ မရသည့် ပြဿနာအချို့နှင့် တွေ့ကြုံခဲ့ရသည်။ သို့သော်လည်း ယခုအခါတွင် အဆိုပါ ပြဿနာကို ရှောင်လွဲနိုင်ရန်အတွက် Note 5 ၏ အတွင်းပိုင်းစက်ကိရိယာကို ပြောင်းလဲပြင်ဆင်ခဲ့ကြောင်း ကုမ္ပဏီမှ ပြောကြားခဲ့သည်။

အဆိုပါ ပြောင်းလဲပြင်ဆင်မှုကို အမည်မဖော်ပြသော Phandroid စာဖတ်ပရိသတ်တစ်ဦးက ပထမဦးဆုံး တွေ့ရှိခဲ့ခြင်းဖြစ်ပြီး ၎င်းက မပြင်ဆင်မီနှင့် ပြင်ဆင်ပြီးနောက် ရိုက်ကူးထားသော Note 5 ဆားကစ်ပြား ဓာတ်ပုံများကို Phandroid ဆိုက်ထံ ပေးပို့ခဲ့သည်။ အဆိုပါ ဓာတ်ပုံများအရ Note 5 တွင် ပါဝင်လာသော S Pen ကို အရှိန်ဖြင့်ထုတ်ပေးသည့် ကိရိယာသစ်သည် ၎င်းကို ပြောင်းပြန်တပ်ဆင်မိသည့်အခါတွင် အန္တရာယ်ကင်းစွာ ပြန်ထုတ်ပေးနိုင်ကြောင်း သိရသည်။

ထို့နောက် Samsung က Note 5 ၏ ဒီဇိုင်းအားနည်းချက်ကို ပြင်ဆင်ခဲ့ကြောင်း အတည်ပြုခဲ့သည်။ “Samsung အနေနဲ့ Note 5 မှာပါဝင်တဲ့ S Pen ကို ဘက်မှားတပ်ဆင်မိတဲ့အခါမှာ ပြဿနာမဖြစ်စေဖို့အတွက် S Pen စက်ကိရိယာကို ပြင်ဆင်ခဲ့တဲ့အပေါ်မှာ အတည်ပြုပြောကြားလိုပါတယ်။ S Pen ကို သိမ်းဆည်းတဲ့အခါမှာ သင့်လျော်တဲ့ လမ်းညွှန်ချက်တွေအတိုင်းပြုလုပ်ဖို့ ကျွန်တော်တို့ အကြံပြုလိုပါတယ်” ဟု ကုမ္ပဏီမှ ပြောကြားခဲ့သည်။

Ref: TheVerge