ပြည်ဝင်ဗီဇာစနစ်သစ် အသေးစိတ်နှင့်ပတ်သက်၍ ဝက်ဘ်ဆိုက်တွင်ထုတ်ပြန်

jpe1.jpg

ပြည်ဝင်ဗီဇာစနစ်သစ် အသေးစိတ်နှင့်ပတ်သက်၍ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ ဝက်ဘ်ဆိုက်တွင် ထုတ်ပြန်ထားသည်။

မြန်မာနိုင်ငံသို့ အကြောင်းအမျိုးဖြင့် လာရောက်လိုသည့် နိုင်ငံခြားသားများအတွက် လက်ရှိအသုံးပြု လျက်ရှိသော ပြည်ဝင်ခွင့် ဗီဇာ ခြောက်မျိုးအစား ခေတ်နှင့် အညီ ပြောင်းလဲကျင့်သုံးမည့် ပြည်ဝင်ခွင့်ဗီဇာ ၁၂ မျိုးနှင့် ပြည်ပြန်ဝင်ခွင့်ဗီဇာ သုံးမျိုးတို့အား စတင်ခွင့်ပြုမည် ဖြစ်သည်။ ထိုသို့ခွင့်ပြုခြင်းကို ဇန်နဝါရီလ ၁၁ ရက်မှစ၍ ခွင့်ပြုပေးသွားမည်ဖြစ်ကြောင်း၊ ပြည်ဝင်ခွင့်ဗီဇာစနစ်သစ်နှင့် ပတ်သက်၍ အသေးစိတ်ကို လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ ၀က်ဘ်ဆိုက် www.mip.gov.mm တွင် ဝင်ရောက်ကြည့်ရှုနိုင်ကြောင်း ထုတ်ပြန်ထားသည်။

ပြည်ဝင်ခွင့်ဗီဇာ (Entry Visa) ၁၂ မျိုးမှာ သံသမန်/သံအဖွဲ့ဗီဇာ၊ နိုင်ငံတကာအဖွဲ့အစည်းများဗီဇာ၊ ကမ္ဘာလှည့်ဗီဇာ၊ လုပ်ငန်းဗီဇာ၊ အလုပ်သမားဗီဇာ၊ လူမှုရေးဗီဇာ၊ သာသနာရေးဗီဇာ၊ ပညာရေးဗီဇာ၊ စာနယ်ဇင်း/မီဒီယာဗီဇာ၊ ယာဉ်အမှုထမ်းဗီဇာ၊ အလုပ်ရုံ/ဆွေးနွေးပွဲ/အစည်းအဝေး/သုတေသနဗီဇာ၊ ဖြတ်သန်း ဗီဇာတို့ဖြစ်ကြောင်း တွေ့ရသည်။ ယင်းဗီဇာများအား သက်ဆိုင်ရာနိုင်ငံများရှိ မြန်မာသံရုံးများတွင် လျှောက်ထားရမည်ဖြစ်ကြောင်း သိရသည်။ eVisa လျှောက်ထားမှုမှာ လက်ရှိအတိုင်း ပြောင်းလဲမှုမရှိကြောင်း သိရသည်။

ပြည်ပြန်ဝင်ခွင့်ဗီဇာ (Re-entry Visa) ၃ မျိုးမှာ အကြိမ်ကြိမ်အထူးပြည်ပြန်ဝင်ခွင့်ဗီဇာ၊ အထူး ပြည်ပြန်ဝင်ခွင့်ဗီဇာ (သို့မဟုတ်) တစ်ကြိမ်၊ ပြည်ပြန်ဝင်ခွင့်ဗီဇာ (ပြည်တွင်းတွင်နေထိုင်သည့် အအမြဲနေ အရည်အချင်းရှိ နိုင်ငံခြားသားများအတွက်သာ) တို့ဖြစ်သည်။ ယင်းအမျိုးအစားများအား နိုင်ငံခြားသားများ ရေးရာဌာနခွဲတွင် သတ်မှတ်ချက်များနှင့်အညီ လျှောက်ထားနိုင်ကြောင်း သိရသည်။