နှစ်ပတ်အတွင်း FAA တွင် မှတ်ပုံတင်သည့် ဒရုန်းအရေအတွက် ၁၈၁,၀၀၀ စင်းအထိရှိလာ

151223181253-faa-drone-registration-780x439.jpg

ဒီဇင်ဘာလ ၂၁ နေ့မှစတင်၍ ဒရုန်းပေါင်း ၁၈၁,၀၀၀ စင်းအထိ မှတ်ပုံတင် စာရင်းသွင်းထားကြောင်း FAA က ပြောကြားခဲ့သည်။

FAA သည် ဒီဇင်ဘာလက အဝေးထိန်းလေယာဉ် ဝါသနာရှင်များအတွက် ဒရုန်းအသုံးမပြုမီ မှတ်ပုံတင်ရမည် ဖြစ်ကြောင်း ကြေညာချက်ထုတ်ပြန်ခဲ့သည်။ “ကျွန်တော်တို့အနေနဲ့ မှတ်ပုံတင်တဲ့ ဒရုန်းအရေအတွက်ကြောင့် စိတ်အားတက်မိပါတယ်” ဟု FAA အုပ်ချုပ်ရေးမှူး မိုက်ကယ်ဟွာတာက လတ်စ်ဗီးဂတ်မြို့ရှိ CES ပွဲတွင်သတင်းထောက်များကို ပြောကြားခဲ့သည်။

ထို့အပြင် FAA က ဒရုန်းပိုင်ဆိုင်သူများ ဥပဒေချိုးဖောက်မိခြင်းကို ရှောင်လွှဲနိုင်ရန် ကူညီပေးမည့် B4UFLY app ကို Apple နှင့် Android ထုတ်ကုန်များအတွက် မိတ်ဆက်ပေးခဲ့သည်။

“B4UFLY က ဒရုန်းတွေကို လေထဲမှာ လုံခြုံစွာ ပျံသန်းစေဖို့အတွက် အများပြည်သူထံ အသိပညာပေးဖို့ ကူညီနိုင်မယ်လို့ မျှော်လင့်ပါတယ်။ ဒါကလည်း အဝေးထိန်းလေယာဉ်သုံးစွဲတဲ့ လူမှုအဖွဲ့အစည်းအတွက် မှီခိုအားထားနိုင်မှုနဲ့ လုံခြုံမှုစတဲ့ ယဉ်ကျေးမှု ထွန်းကားစေဖို့ ကြိုးပမ်းတဲ့ အရေးအကြီးဆုံး အစိတ်အပိုင်းပါ” ဟု ဟွာတာက ပြောဆိုခဲ့သည်။ အဆိုပါ app က သုံးစွဲသူများကို မည်သည့်နေရာတွင် ဒရုန်းပျံသန်းနိုင်ခြင်း ရှိ၊မရှိ အသိပေးသွားမည် ဖြစ်သည်။ ၎င်း app သည် ဖုန်း၏ တည်နေရာကို အသုံးချ၍ အနီးအနားရှိ ကန့်သတ်လေကြောင်းနယ်နမိတ်၊ လေဆိပ် သို့မဟုတ် မှုခင်းဖြစ်ပွားရာနေရာအနီးတွင် လေကြောင်းပျံသန်းမှု ယာယီကန့်သတ်ဧရိယာများကို ရှာဖွေပေးမည် ဖြစ်သည်။ ထို့ပြင်သုံးစွဲသူများသည် ဆိုက်ရောက်လာမည့် လေယာဉ်များအတွက် တည်နေရာ သို့မဟုတ် အချိန်ကန့်သတ်မှုများကို မြင်တွေ့နိုင်မည့် planner mode လည်း ပါဝင်လာသည်။

FAA ၏ မှတ်ပုံတင်သည့် လုပ်ငန်းစဉ်သည် ဒရုန်းပိုင်ရှင်များက တာဝန်ယူ မှတ်ပုံတင်ရသည့် စနစ်ဖြစ်သည်။ မှတ်ပုံမတင်ထားသည့် ဒရုန်းများကို အသုံးပြုပါက ထောင်ဒဏ် ၃ နှစ်သို့မဟုတ် ဒဏ်ကြေးငွေ ကန်ဒေါ်လာ ၂၅၀,၀၀၀ ပေးဆောင်ရမည် ဖြစ်သည်။

Ref: CNNMoney