မြင်းခြံတွင် Telenor ၏ အလင်းအိမ် စင်တာဖွင့်

12189406_877913865656234_5508593812007774806_o.jpg

မြင်းခြံတွင် Telenor ၏ အလင်းအိမ်စင်တာ( Light House) စတင်ဖွင့်လှစ်လိုက်ကြောင်း သိရသည်။

အဆိုပါ စင်တာမှာ Telenor ၏ ၃၇ ခုမြောက်စင်တာဖြစ်ကြောင်း၊ ယင်းစင်တာများသည် လူမှုစီးပွားရေး လုပ်ငန်းများဖြစ်ပြီး တစ်နိုင်ငံလုံးရှိ မြို့ပြနှင့်ကျေးလက်နေပြည်သူများ အတွက် အင်တာနက်ပေါ်တွင် ရှာဖွေတွေ့ရှိနိုင်သည့် လူမှုရေးနှင့် စီးပွားရေးဆိုင်ရာ အကျိုးရှိစေမည့် သတင်းအချက်အလက်များ အကြောင်းကို အသိပညာ ပေးအပ်နိုင်ရန် အတွက် ရည်ရွယ်ကြောင်း သိရသည်။ “ဒီအလင်းအိမ်စင်တာ တွေက မြန်မာနိုင်ငံမှာ စမတ်ဖုန်းနှင့် ကွန်ပျူတာအသုံးပြုမှုမှာ ကျေးလက်နဲ့ မြို့ပြမှာ မတူညီဘဲ ကွာခြားနေတဲ့ အနေအထားကို လျော့ချ သွားနိုင်ဖို့ တည်ထောင်ထားတဲ့ ရေရှည် လည်ပတ်သွားနိုင်မယ့် လူမှုစီးပွားရေး လုပ်ငန်းဖြစ်ပါတယ်။ တယ်လီနောရဲ့ နည်းပညာ၊ ကျွမ်းကျင်မှု၊ နည်းလမ်းတွေနဲ့ လူမှုလုပ်ငန်း ရင်းနှီးမြှုပ်နှံမှုတွေကို အသုံးပြုပြီး စင်တာတွေမှာ ပြည်တွင်း ဈေးကွက်ရှာဖွေရေး လုပ်ငန်းတွေနဲ့ ပုံမှန် ဝင်ငွေ ရရှိမယ့် အခွင့်အလမ်းတွေနဲ့ ပံ့ပိုးပေးထားပြီး လူမှုရေးဦးစားပေး စွန့်ဦးတီထွင် လုပ်ငန်းရှင်များကိုယ်တိုင် ဒစ်ဂျစ်တယ် ကျွမ်းကျင်မှု အတတ်သင် သင်ရိုးနဲ့ သင်ကြားပေးအပ်သွား မှာဖြစ်ပါတယ်” ဟု တယ်လီနောမြန်မာမှ လူမှုအကျိုးပြုဌာနမှူး ဖြစ်သူ ကိုမင်းသူကပြောကြားသည်။

ယခု ဖွင့်လှစ်ခဲ့သော စင်တာ အပါအဝင် အလင်းအိမ် စင်တာများသည် မြန်မာနိုင်ငံတဝန်းရှိ မန္တလေး၊ ရန်ကုန်၊ ရှမ်း၊ ပဲခူး၊ မကွေး၊ ဧရာဝတီ၊ ကရင်၊ မွန်နှင့် နေပြည်တော်အစရှိသည့် တိုင်းနှင့်ပြည်နယ် ၉ ခုတွင်သတင်းအချက်အလက် ဝန်ဆောင်မှုများနှင့် ဒစ်ဂျစ်တယ် ကျွမ်းကျင်သင်တန်းများကို ပေးအပ်ပို့ချနေကြောင်း၊ Telenor အနေဖြင့် Myanmar ICT for Development Organization (MIDO) နှင့် ပူးပေါင်းကာ မြန်မာနိုင်ငံတွင် အလင်းအိမ် စင်တာများကို တည်ထောင်ခဲ့ကြောင်း သိရသည်။ ၂၀၁၈ အကုန်တွင် အလင်းအိမ်စင်တာ အရေအတွက် ၂၀၀ အထိ တည်ထောင်သွားရန် ရည်မှန်းထားသည်ဟု သိရသည်။

အလင်းအိမ် စင်တာများတွင် လေ့ကျင် သင်ကြားပေးသည့် သင်တန်းအမျိုးအစားများမှာ မိုဘိုင်းအခြေခံ အင်တာနက် ကျွမ်းကျင်မှု သင်တန်းများနှင့် ကွန်ပျူတာ သင်တန်းများဖြစ်ကြောင်း၊ မိုဘိုင်းအခြေခံ သင်တန်းများတွင် မိုဘိုင်းဖုန်းများကို ထိရောက်စွာ အသုံးပြုနည်း၊ မိုဘိုင်းအင်တာနက် အသုံးပြုနည်း၊ Viber, အီးမေးလ်နှင့် ဖေ့စ်ဘွတ် အသုံးပြုနည်း၊ လိုအပ်သော အချက်အလက်များကို အင်တာနက်တွင် ရှာဖွေနည်းနှင့် အင်တာနက်မှ တဆင့် အင်္ဂလိပ်စာဘာသာရပ်ကို ကိုယ်တိုင် သင်ယူလေ့လာနည်း စသည်တို့ ပါဝင်ကြောင်း၊ ကွန်ပျူတာ သင်တန်းများတွင် အခြေခံ ကွန်ပျူတာ အသုံးပြုနည်း၊ Microsoft Word, Excel နှင့် Powerpoint အသုံးပြုနည်းများကို သင်ကြားပေးခြင်းဖြစ်ကြောင်း သိရသည်။