ပြည်တွင်း၌ နည်းပညာဆိုင်ရာ Data Center တစ်ခုကို ဂျပန်နိုင်ငံ၏အကူအညီဖြင့် တည်ဆောက်သွားမည်

မြန်မာနိုင်ငံ၏ စီးပွားရေး၊ လူမှုရေး၊ ပညာရေး၊ ကျန်းမာရေးအစရှိသောကဏ္ဍများ အပါအဝင် အခြားအရေးကြီးကဏ္ဍများနှင့် သက်ဆိုင်သည့် အသေးစိတ် အချက်အလက်များကို သိမ်းဆည်းထားနိုင်မည့် နည်းပညာ ဆိုင်ရာ Data Center   တစ်ခုကို တည်ဆောက်ရန် အတွက် ဂျပန်နိုင်ငံမှ အကူအညီကို ရယူသွားမည်ဖြစ်ကြောင်း ဆက်သွယ်ရေးနှင့် သတင်းအချက်အလက်၊ နည်းပညာဝန်ကြီးဌာနမှ စုံစမ်း သိရသည်။

ပြည်တွင်း၌ ကဏ္ဍအသီးသီးမှ အများပြည်သူနှင့်သက်ဆိုင်သည့် စီမံကိန်းကြီးများ ပြုလုပ်လာသည့် အခါတွင် လိုအပ်သည့် အချက်အလက်မှန်သမျှကို  အလွယ်တကူရရှိ နိုင်စေရန်အတွက် ယခုကဲ့သို့ Data Center တစ်ခုတည်ဆောက်ရန် စီစဉ်ရခြင်းဖြစ်ကြောင်းသိရသည်။

ဂျပန်နိုင်ငံ၏ အကူအညီဖြင့် နည်းပညာဆိုင်ရာ Data Center တည်ဆောက်ရန်အတွက် သိပ္ပံနှင့် နည်းပညာဝန်ကြီးဌာနမှ အဓိကစီစဉ်ဆောင်ရွက်နေခြင်းဖြစ်ပြီး အဆိုပါဝန်ကြီးဌာနအနေဖြင့် Data Center တည်ဆောက်မှု အတွက် အခြားဝန်ကြီးဌာနများ၏ အကူအညီများနှင့် ပုဂ္ဂလိကအဖွဲ့အစည်းများထံမှ အချက်အလက်များကိုလည်း အကူအညီတောင်းခံသွားမည်ဖြစ်ကြောင်း အထက်ပါဝန်ကြီးဌာနမှတာဝန်ရှိသူ တစ်ဦးက ပြောကြားသည်။

၂၀၁၅ ခုနှစ်တွင် စတင်အကောင်အထည်ဖော်တည်ဆောက်မည့် အဆိုပါ Data Center တွင်ပြည်တွင်း လမ်းပန်းဆက်သွယ်ရေးနှင့် သက်ဆိုင်သည့် အသေးစိတ် အချက်အလက်များနှင့် မြို့တစ်မြို့ချင်းစီ၏ အဓိက အချက်အလက်များလည်း ပါဝင်လာမည်ဖြစ်သည်။

ဂျပန်နိုင်ငံသည် မြန်မာနိုင်ငံ၏ ဆက်သွယ်ရေး ကဏ္ဍအတွင်းသို့ ယခုနှစ်မှစတင်၍ သိသိသာသာ ဝင်ရောက်လာနေခြင်းဖြစ်ပြီး ပြည်တွင်းဆက်သွယ်ရေး၊ သတင်းအချက်အလက်နှင့် နည်းပညာဆိုင်ရာအခြားသော ကဏ္ဍများတွင်လည်း ထောက်ပံ့မှုများပေးထားသည်။