ဆက်သွယ်ရေးကော်မရှင်ဖွဲ့စည်း

12118803_10207620061080780_4791980486158684305_n.jpg

မြန်မာနိုင်ငံ ဆက်သွယ်ရေးကော်မရှင်ကို ဖွဲ့စည်းလိုက်ကြောင်း သိရသည်။

ပြည်ထောင်စုအစိုးရအဖွဲ့အနေဖြင့် ဆက်သွယ်ရေးဝန်ဆောင်မှု လုပ်ငန်းများနှင့်စပ်လျဉ်း၍ ဆက်သွယ်ရေးဥပဒေပါ လုပ်ငန်းတာဝန်များကို ဆောင်ရွက်နိုင်ရန် ဖွဲ့စည်းလိုက်ခြင်းဖြစ်ကြောင်း သတင်းထုတ်ပြန်သည်။ အဆိုပါ မြန်မာနိုင်ငံ ဆက်သွယ်ရေးကော်မရှင်ကို အောက်တိုဘာလ ၈ ရက်နေ့မှ စတင်၍ ဖွဲ့စည်းလိုက်ကြောင်း အောက်တိုဘာ ၂၈ ရက် နိုင်ငံပိုင်သတင်းစာမှတစ်ဆင့် ထုတ်ပြန်ကြေညာသည်။

ဆက်သွယ်ရေး ဥပဒေပုဒ်မ ၈၆ အရ အပ်နှင်းထားသော လုပ်ပိုင်ခွင့်ကို ကျင့်သုံး၍ မြန်မာနိုင်ငံ ကွန်ပျူတာ ဖွံ့ဖြိုးရေးကောင်စီဥက္ကဌ၊ ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာန ပြည်ထောင်စု ဝန်ကြီးဦးဆောင်သည့် အဖွဲ့ဝင်ငါးဦးပါဝင်သော မြန်မာနိုင်ငံ ဆက်သွယ်ရေးကော်မရှင်ကို ဖွဲ့စည်းလိုက်ခြင်း ဖြစ်ကြောင်း သိရသည်။

ဆက်သွယ်ရေး ဥပဒေအရ ပြည်ထောင်စု အစိုးရအဖွဲ့သည် ဥပဒေပြဋ္ဌာန်းပြီး နှစ်နှစ်အတွင်း လွတ်လပ်သော မြန်မာနိုင်ငံ ဆက်သွယ်ရေးကော်မရှင်တစ်ရပ်ကို ပြည်ထောင်စုအဆင့်ရှိ ပုဂ္ဂိုလ်တစ်ဦး ဦးဆောင်စေ၍ ဖွဲ့စည်းပေးရမည် ဖြစ်သည်။ ဆက်သွယ်ရေးဥပဒေကို ၂၀၁၃ ခုနှစ် အောက်တိုဘာလ ၈ ရက်တွင် ပြည်ထောင်စုလွှတ်တော်မှ ပြဋ္ဌာန်းခဲ့ပြီးဖြစ်သည့်အတွက် ဥပဒေအရ လွှတ်လပ်သော မြန်မာနိုင်ငံ ဆက်သွယ်ရေးကော်မရှင်ကို ၂၀၁၅ ခုနှစ် အောက်တိုဘာလ ၈ ရက် တွင် ဖွဲ့စည်းလိုက်ခြင်း ဖြစ်သည်။

မြန်မာနိုင်ငံ ဆက်သွယ်ရေးကော်မရှင် အဖွဲ့အစည်းသည် ပြည်တွင်း၌ လုပ်ကိုင်လျက်ရှိသည့် ဆက်သွယ်ရေးကုမ္ပဏီများ၏ လုပ်ဆောင်နေမှုများအား စောင့်ကြည့် အကဲဖြတ်သွားမည်ဖြစ်ပြီး ဆက်သွယ်ရေးလုပ်ငန်းနှင့်ပတ်သက်သည့် ဆုံးဖြတ်ချက်များကိုလည်း ကော်မရှင်ပါ တာဝန်ရှိသူများက အဆုံးအဖြတ်ပေးခြင်းကို ဆောင်ရွက်မည်ဟုသိရသည်။