ဧရာဝတီဘဏ်နှင့် VMware တို့ ပူးပေါင်းကာ နည်းပညာ မြှင့်မည်

11794438_870113523102935_3773022771513421095_o.jpg

ဧရာဝတီဘဏ်နှင့် VMware တို့ပူးပေါင်းကာ ဘဏ်၏ နည်းပညာပိုင်း ဆိုင်ရာများ၊ ဝန်ဆောင်မှုများကို မြှင့်တင်မည်ဖြစ်ကြောင်း အောက်တိုဘာလ (၂၀) ရက်နေ့က နိုဗိုတယ်ဟိုတယ်တွင် ကျင်းပခဲ့သည့် ဧရာဝတီဘဏ်နှင့် VMware ပူးပေါင်း၍ ဝန်ဆောင်မှုများကို မြှင့်တင်မည့် စာနယ်ဇင်း အသိပေးပွဲ အခမ်းအနားမှ သိရှိရသည်။

ဧရာဝတီဘဏ် (AYA Bank) အနေဖြင့် နည်းပညာကုမ္ပဏီ VMware နှင့် လုပ်ငန်း အကျိုးတူ ပူးပေါင်းကာ အိုင်တီစနစ်များ ပြောင်းလဲသုံးစွဲနိုင်ရန် ဆောင်ရွက်သွားမည်ဖြစ်ကြောင်း၊ AYA Bank ၏ data center များ၊ network infrastructure များကို virtual နည်းပညာများ ပြောင်းလဲ တပ်ဆင်သွားမည်ဖြစ်ကြောင်း သိရသည်။

“VMware ရဲ့နည်းပညာတွေကို အသုံးပြုပြီး မြန်မာနိုင်ငံက ရုံးခွဲ ၁၂၄ ခုမှာ ပိုမြန်ဆန်စိတ်ချရတဲ့ ဝန်ဆောင်မှုတွေ ပေးသွားမှာပါ၊ အိုင်တီနည်းပညာနဲ့ သုံးစွဲသူ ဝန်ဆောင်မှုတွေ၊ လုံခြုံမှုတွေ ပိုကောင်းမွန်တဲ့ တွန်းအား တစ်ခုလို့ မြင်ပါတယ်” ဟု ဧရာဝတီဘဏ်မှ မန်နေဂျင်းဒါရိုက်တာ ဦးဖြိုးအောင်ကပြောသည်။

လုပ်ငန်းဖွံ့ဖြိုးလာသည်နှင့်အမျှ များပြားလာသော အချက်အလက်များကို သက်သာ အဆင်ပြေသော နည်းလမ်းများနှင့် ဆောင်ရွက် ဖြေရှင်းနိုင်ရန်အတွက် အရည်အသွေးပိုင်းဆိုင်ရာ အထောက်အပံ့များ လိုအပ်လာသောကြောင့် ယင်းကြောင့် ယခုကဲ့သို့ ပူးပေါင်းဆောင်ရွက်ခြင်းဖြစ်ကြောင်း သိရသည်။

VMware မှာ Cloud infrastructure နည်းပညာနှင့် မိုဘိုင်းလုပ်ငန်း စီးပွားရေး ဝန်ဆောင်မှုများ ဆောင်ရွက်နေသော ကုမ္ပဏီဖြစ်ပြီး ၎င်း၏ ဝန်ဆောင်မှုကိုသုံးစွဲသူ ငါးသိန်းကျော်နှင့် လုပ်ငန်း မိတ်ဖက်ပေါင်း ၇၅၀၀၀ ကျော် ရှိကြောင်း သိရသည်။ VMware ၏ ရုံးချုပ်ကို Silicon Valley တွင် အခြေစိုက်လျက် ရှိပြီး ရုံးခွဲများ ကမ္ဘာအနှံ့ဖွင့် လှစ်ထားသည်။