လူသုံးကုန် အဝေးထိန်း လေယာဉ်များကို လာမည့်နှစ်တွင် GoPro ဖြန့်ချိမည်

phantom-drone.jpg

အားကစားကို စိတ်ပါဝင်စား သူများနှင့် ဗီဒီယိုရိုက်ကူးခြင်းကို နှစ်သက်သူများအတွက် ကင်မရာများ ထုတ်လုပ်ရာတွင် နာမည်ကျော်သည့် GoPro ကုမ္ပဏီသည် high-definition ဗီဒီယိုကင်မရာများ ပါဝင်သော လူသုံးကုန် အဝေးထိန်း လေယာဉ်များကို ဖန်တီးလျက်ရှိကြောင်း Wall Street Journal မှဖော်ပြခဲ့သည်။

အဆိုပါ ထုတ်ကုန်သည် အဝေးထိန်း လေယာဉ်လုပ်ငန်းတွင် အကြီးဆုံး ကုမ္ပဏီများဖြစ်သည့် တရုတ်အခြေစိုက် DJI, ပြင်သစ်ကုမ္ပဏီ Parrot နှင့် ကယ်လီဖိုးနီးယား အခြေစိုက် 3D Robotics တို့နှင့်ယှဉ်ပြိုင် နိုင်မည်ဖြစ်သည်။ တန်ဖိုးအနေဖြင့် ဒေါ်လာ ၅၀၀ မှ ၁၀၀၀ အထိရှိနိုင်ပြီး လာမည့်နှစ်ကုန်ပိုင်းတွင် ရောင်းချမည်ဖြစ်ကြောင်း Wall Street Journal မှဖော်ပြခဲ့သည်။

GoPro သည် အဝေးထိန်း လေယာဉ်ဈေးကွက်သို့ ထုတ်ကုန်နှစ်မျိုးဖြင့် ဝင်ရောက်ရန် စီစဉ်ထားသည်။ ကုမ္ပဏီသည် ယခုနှစ်တွင် ကင်မရာ ၂.၄ သန်းကို ရောင်းချထားပြီး ၎င်းသည်ပြီးခဲ့သည့် နှစ်ထက် ၁၅ ရာခိုင်နှုန်း မြင့်တက်လာခဲ့ သော်လည်း သာမန် အီလက်ထရွန်နစ် ကုမ္ပဏီများနှင့် Sony, Polaroid ကဲ့သို့သော ပြိုင်ဘက် ကင်မရာများနှင့် ယှဉ်ပြိုင်မှုကို တိုးမြှင့်ဆောင်ရွက်ခဲ့သည်။

GoPro အနေဖြင့် အဝေးထိန်း လေယာဉ်ဈေးကွက်သို့ ဝင်ရောက်ခြင်းသည် အဆိုပါ လုပ်ငန်းတိုးတက်မှု၏ လက္ခဏာ တစ်ရပ်လည်း ဖြစ်သည်။ အဝေးထိန်း လေယာဉ်လုပ်ငန်းသည် လာမည့်နှစ်တွင် အမေရိကန်ဒေါ်လာ ၂.၂ ဘီလီယံအထိ မြင့်တက်လာရန် ရည်မှန်းထားပြီး ၂၀၂၅ ခုနှစ်တွင် ၁၀ ဘီလီယံထိ ရှိလာရန် မျှော်မှန်းထားကြောင်း Unmanned Vehicle Systems International အဖွဲ့မှ ပြောကြားခဲ့သည်။

-နောင်နောင်
Ref : CNET