မိုဘိုင်းတွင် သတင်းများ လျင်မြန်စွာ ဖတ်ရှုနိုင်မည့် Google ၏ Accelerated Mobile Pages နည်းပညာ

Google-Accelerated-Mobile-Pages-iPhone-screenshot-SH-idownloadblog-2015oct8.jpg

မိုဘိုင်းတွင် သတင်းများ လျင်မြန်စွာ ဖတ်ရှုနိုင်မည့် Google ၏ Accelerated Mobile Pages နည်းပညာ Google သည် ပြီးခဲ့သည့် ဗုဒ္ဓဟူးနေ့က စမတ်ဖုန်းပေါ်တွင် သတင်းများလျင်မြန်စွာ ဖတ်ရှုနိုင်ရန် ဖန်တီးပေးမည့် AMP သို့မဟုတ် Accelerated Mobile Pages ဟုအမည်ရသည့် နည်းပညာကို မိတ်ဆက်ခဲ့သည်။

အဆိုပါ AMP နည်းပညာဖြင့် Twitter, The New York Times, The Guardian, Buzzfeed, Vox Media နှင့် Daily Mailအပါအဝင် အဖွဲ့အစည်းတချို့မှ သတင်းများကို ဖတ်ရှုနိုင်ပြီ ဖြစ်သည်။ ပြီးခဲ့သည့်လက ၎င်းနည်းပညာကို အကြိုပြသခဲ့ပြီး နောက်ပိုင်းတွင် လူသိရှင်ကြား မိတ်ဆက်သွားမည် ဖြစ်ကြောင်း သတင်းတစ်ခုက ဖော်ပြခဲ့ဖူးသည်။ “မိုဘိုင်းနဲ့ web အသုံးပြုမှုဟာ သုံးစွဲသူတွေ မျှော်မှန်းထားသလောက် စိတ်ကျေနပ်မှု မပေးပါဘူး။ မြန်နှုန်းကလည်း ရှိသင့်သလောက် မရှိပါဘူး။ စာမျက်နှာတွေ load ပြုလုပ်ရာတာ နှေးကွေးသလို အပြောင်းအလဲလည်း မြန်ပါတယ်။ ဒါဟာအကောင်းဆုံး အနေအထားမဟုတ်ပါဘူး” ဟု Google ၏ သတင်းအကြီးအကဲ ရစ်ချတ်ဂျင်ဂရာ့စ်က သတင်းစာရှင်းလင်းပွဲအတွင်း ပြောကြားခဲ့သည်။

မိုဘိုင်းဖြင့် web များ အသုံးပြုမှုကို အားပေးရန်အတွက် Google က AMP ကိုဖန်တီးခဲ့ခြင်း ဖြစ်သည်။ ဝက်ဘ်စာမျက်နှာများကို စံသတ်မှတ်ရာတွင် အတွေ့အကြုံရှိသည့် Google သည် load ပြုလုပ်သည့် အချိန်လျှော့ချနိုင်ရန် လုပ်ဆောင်ခဲ့သည်။ ဥပမာအားဖြင့် AMP နည်းပညာ ထောက်ပံ့ထားသော စာမျက်နှာသည် သုံးစွဲသူက scroll down မပြုလုပ်မချင်း ဗီဒီယို သို့မဟုတ် ဓာတ်ပုံတို့ကို ဖော်ပြပေးမည် မဟုတ်ဘဲ ဝက်ဘ်ဆိုက်များ၏ ထိပ်ဆုံးပိုင်းကို မြန်ဆန်စွာ load ပြုလုပ်ပေးမည် ဖြစ်သည်။

ထို့အပြင် Google သည် တစ်စက္ကန့်လျှင် ရှာဖွေမှု မေးခွန်းပေါင်း ၆  သန်းကို ကိုယ်တွယ်ရန် တည်ဆောင်ထားသော ဆာဗာများတွင် ဝက်ဘ်စာမျက်နှာ cache များ သိမ်းဆည်းပေးမည် ဖြစ်သောကြောင့် သတင်းများကို မြန်ဆန်စွာဖတ်ရှု နိုင်မည်ဖြစ်သည်။

Ref : CNET