Ooredoo က အင်တာနက် အသုံးပြုခများကို ဈေးနှုန်းပြောင်းလဲ

12068505_1169020143113512_5781534270751824581_o.jpg

Ooredoo သည် လက်ရှိအချိန်၌ မိုဘိုင်းဖုန်း ငွေဖြည့်သွင်းခြင်းကို ၅၀ ရာခိုင်နှုန်း ပရိုမိုရှင်းပေးအပ် လိုက်သည့် နောက်ပိုင်း ၎င်းတို့၏ အင်တာနက်အသုံးပြုခ Plan များကို ဈေးနှုန်းမြှင့်တင်လိုက်သည်ဟု သိရသည်။

တစ်လတာအတွင်း အသုံးပြုရသည့် 1GB Plan ကို ယခင်က ၆,၉၀၀ ကျပ် သတ်မှတ်ထားရာမှ ယခုအခါ ၈,၀၀၀ ကျပ်အဖြစ်သို့ ပြောင်းလဲသတ်မှတ်ခဲ့ပြီး 2GB Plan အတွက် ယခင်က ၁၂,၉၀၀ ကျပ် သတ်မှတ်ထားရာမှ ယခုအခါ ၁၅,၀၀၀ ကျပ် သတ်မှတ်လိုက်သည်ဟု သိရသည်။

အလားတူ 5GB Plan အတွက် ယခင်က ၂၉,၉၀၀ ကျပ် သတ်မှတ်ထားရာမှ ယခုအခါ ၂၅,၀၀၀ ကျပ် အဖြစ်သို့ ပြောင်းလဲသတ်မှတ်လိုက်သည်ဟု သိရသည်။ Ooredoo သည် ယခင်က လစဉ် Plan အနေဖြင့် အင်တာနက် အသုံးပြုသူများကို Double Bonus ပေးအပ်ခဲ့သော်လည်း ယခုအခါ အဆိုပါအစီအစဉ်ကိုပါ ဖျက်သိမ်းခဲ့သည်ဟု သိရသည်။

“သီတင်းကျွတ်ပရိုမိုးရှင်း လုပ်နေပါတယ်။ ဈေးက အရင်တုန်းက ဖလန်းဖလန်းအစီအစဉ်ကြောင့် ပရိုမိုရှင်းပေးခဲ့တာပါ။ အခုက ပုံမှန်ဈေးပါ။ ဈေးမတက်ပါဘူး” ဟု အင်တာနက်အသုံးပြုမှု ဈေးနှုန်းအပြောင်း အလဲနှင့် ပတ်သက်၍ Ooredoo ၏ Call Center က ပြောကြားသည်။

Ooredoo ၏ အင်တာနက် ဈေးနှုန်းအပြောင်းအလဲကို အသုံးပြုသူများက ဆိုရှယ်စာမျက်နှာပေါ်တွင် ဝေဖန်မှုများပြုလုပ်ခဲ့သော်လည်း Ooredoo အနေဖြင့် ၎င်းတို့၏ သီတင်းကျွတ်ပရိုမိုးရှင်း၏ ဈေးနှုန်းသက်သာခြင်းကို ကြော်ငြာခဲ့ကြသည်။

Ooredoo ၏ သီတင်းကျွတ်ပရိုမိုးရှင်းသည် အောက်တိုဘာလ တစ်လအတွင်း ရရှိနိုင်သည့် ပရိုမိုရှင်းဖြစ်ပြီး ဘီလ်ဖြည့်သွင်းသည့် ပမာဏ၏ ၅၀ ရာခိုင်နှုန်း အပိုထပ်ဆောင်း ရရှိမည်ဖြစ်သည်။ ကန့်သတ်ချက်အနေဖြင့် အပိုရရှိလာသည့် ၅၀ ရာခိုင်နှုန်းကို ၂၄ နာရီအတွင်း ပြန်လည်အသုံးပြုရမည်ဟု သိရသည်။

အပိုရရှိလာသည့် ၅၀ ရာခိုင်နှုန်း Bonus ကို ၂၄ နာရီအတွင်း ပြန်လည်အသုံးပြုရမည်ဟူသော အစီအစဉ်ကို အသုံးပြုသူများက ကြိုက်နှစ်သက်ခြင်း မရှိခဲ့သော်လည်း Ooredoo ၏ ခွင့်ပြုချက်အရ အပိုရရှိလာသော Bonus ကို အသံခေါ်ဆိုမှုနှင့် အင်တာနက် အသုံးပြုမှု နှစ်ခုစလုံး အသုံးပြုနိုင်သည်ဟု သိရသည်။