မော်တော်ယာဉ်များအား ခြေရာခံနိုင်မည့် စနစ် ပြည်တွင်း၌ ဝန်ဆောင်မှုပေးရန် စီစဉ်

IMG_2663.jpg

မော်တော်ယာဉ်သွားရာ လမ်းကြောင်းများအား ခြေရာခံသိရှိနိုင်သည့်စနစ် (Tracking System) အား ဝန်ဆောင်မှုပေးရန် စီစဉ်နေကြောင်း VMG Telecom မှ မန်နေဂျင်းဒါရိုက်တာ မစမိုင်းလ်က ပြောသည်။

မော်တော်ယာဉ်သွားရာ လမ်းကြောင်းအတိုင်း ညွှန်ပြပေးထားမည်ဖြစ်ပြီး အဆိုပါမော်တော်ယာဉ်နှင့် ပတ်သက်သည့် အချက်အလက်များကို နာရီတိုင်းသိရှိနိုင်မည်ဖြစ်ကြောင်း ဆိုသည်။

“အင်တာနက်နဲ့ ချိတ်ထားမယ်။ Tracking System က ဘာဖြစ်သွားလဲဆိုတော့ ဒီကားကို Track လုပ်ပြီး တောက်လျှောက် လိုက်မယ်။ ဒီကားက ကီလို ၂၀ ထက်ပိုပြီး မောင်းနေသလား၊ အဲ့လိုမောင်းနေရင် Base လုပ်ထားတဲ့ နေရာကနေသိမယ်။ ပြီးတော့ ဒီကားက ဧရိယာ ရှစ်မိုင်၊ ဆယ်မိုင် သတ်မှတ်ထားတယ်ဆိုရင် သတ်မှတ်ထား တာထက် မောင်းတာကျော် သွားတယ် ဆိုရင် အဲဒါတွေ အားလုံး record ကို နာရီတိုင်းမှာတောက် လျှောက်သိနေမယ်” ဟု ပြောကြားသည်။

မော်တော်ယာဉ်နှင့် ပတ်သက်သည့် အချက်အလက်များအားလုံးကို Server မှကြည့်ရှုနိုင်မည်ဖြစ်သည်။ အဆိုပါဆောင်ရွက်ချက်အတွက် ဘတ်စ်ကားဆိုင်ရာ အသင်းအဖွဲ့အချို့နှင့် ညှိနှိုင်းနေကြောင်း၊ တက္ကစီ ပိုင်ရှင်များနှင့်လည်း ညှိနှိုင်းနေကြောင်း သိရသည်။

“အစ်မတို့ဆီမှာ ပစ္စည်းတွေအကုန်လုံးရှိပြီးသား။ အားလုံးက လုပ်ဖို့ပဲလိုတယ်။ အကောင်အထည်ဖော်ဖို့အတွက် သက်ဆိုင်ရာတချို့နဲ့ ညှိနှိုင်းနေတယ်” ဟု ဆက်လက်ပြောကြားသည်။

တက္ကစီယာဉ်ပိုင်ရှင်များအတွက် အကောင်အထည်ဖော်ရန်မှာ တက္ကစီအရေအတွက် အနည်းအများ ပိုင်ဆိုင်သည့်အပေါ်မူတည်၍ နှုန်းထားသတ်မှတ်ရမည်ဖြစ်ကြောင်း သိရသည်။

အဆိုပါဝန်ဆောင်မှုကို အသုံးပြုသည့် မော်တော်ယာဉ်များအနေဖြင့် ဝန်ဆောင်ခကို လစဉ်ကြေးပုံစံဖြင့် သွားမည်ဖြစ်ကြောင်း၊ ဝန်ဆောင်ခကို လတ်တလောတွင် ညှိနှိုင်းနေဆဲဖြစ်ကြောင်း သိရသည်။