အကြီးမားဆုံးစိန်ခေါ်မှုမှာ အခြေခံ အဆောက်အဦ တည်ဆောက်ခြင်းဟု အော်ပရေတာများပြောကြား

11893830_854820511298903_8809911118033485380_o.jpg

ဆက်သွယ်ရေးကွန်ရက်များ တစ်နိုင်ငံလုံး ဖြန့်ကြက်နိုင်ရန် အတွက် အကြီးမားဆုံး စိန်ခေါ်မှုမှာ အခြေခံအဆောက်အဦ တည်ဆောက်ခြင်း ဖြစ်ကြောင်း အော် ပရေတာများက ပြောကြားသည်။

စက်တင်ဘာလ ၁၄ ရက်က ကျင်းပသော Myanmar Connect 2015 အခမ်းအနားတွင် ပြောကြားခဲ့ကြခြင်း ဖြစ်သည်။

“နိုင်ငံတစ်ဝန်းလုံး ကွန်ရက်ဖြန့်ကြက်နိုင်ဖို့က အခြေခံအဆောက်အဦ တည်ဆောက်ခြင်းပါပဲ။ အဲဒါက ကျွန်တော်တို့အတွက် အကြီးမားဆုံး စိန်ခေါ်မှုတစ်ရပ်ပါ။ ဒါက မြန်မာ တစ်နိုင်ငံတည်းမှာပဲ မဟုတ်ပါဘူး။ တစ်ခြားနိုင်ငံတွေမှာလည်း ဖြစ်တတ်ပါတယ်။ အာဖရိကနိုင်ငံ တစ်ခုမှာလည်း အလားတူစိန်ခေါ်မှုမျိုး ဖြစ်ခဲ့တယ်” ဟု Ooredoo Myanmar ၏ CEO ဖြစ်သူ Mr.Rene Meza ကပြောသည်။

မြန်မာနိုင်ငံအတွင်း ဆက်သွယ်ရေးဝန်ဆောင်မှုအတွက် အဓိကကျသော စိန်ခေါ်မှုမှာ အခြေခံအဆောက်အဦဟု Telenor Myanmar ၏ CEO ဖြစ်သူPetter Furberg ကလည်း ပြောကြားသည်။

“အဓိကစိန်ခေါ်မှုတွေကတော့ အော်ပရေတာတွေမှာ အတူတူပါပဲ။ မြန်မာ့ဆက်သွယ်ရေးလုပ်ငန်းက လက်ရှိမှာ အကြီးမားဆုံးကွန်ရက်ဆိုပေမယ့် ကျွန်တော်တို့ရဲ့ကွန်ရက်ကို ထပ်မံ တိုးချဲ့ဖို့လုပ်တဲ့အခါ အခက်အခဲတွေ အများကြီး ကြုံရပါတယ်။ အဲဒါက မြန်မာနိုင်ငံမှာတင် မဟုတ်ပါဘူး။ ဂျပန်နိုင်ငံမှာလည်း ကြုံရပါတယ်”ဟု MPT/KDDI/Sumitomo Corporation တို့၏ Joint Operation CEO ဖြစ်သူ Mr.Takashi Nagashima ကပြောသည်။

မြန်မာနိုင်ငံအတွင်း ဆက်သွယ်ရေး အော်ပရေတာလေးခု ထားရှိမည်ဟု ကြေညာထားပြီး ပြည်ပမှ ဆက်သွယ်ရေး အော်ပရေတာ နှစ်ခုနှင့် ပြည်တွင်းမှ ဆက်သွယ်ရေးအော်ပရေတာ တစ်ခုတို့ကို လိုင်စင် ပေးအပ်ထားပြီးဖြစ်သည်။

တယ်လီကွန်းအော်ပရေတာ လုပ်ငန်းဆိုသည်မှာ Fixed Lines ဆက်သွယ်ရေးလုပ်ငန်း၊ မိုဘိုင်း ဆက်သွယ်ရေးလုပ်ငန်း အပါအဝင် ဆက်သွယ်ရေးနှင့် ဆက်စပ်နေသော လုပ်ငန်းများ အားလုံးကို အပြည့်အဝ လုပ်ကိုင်ခွင့်ရရှိမည့် အနေအထားဖြစ်ကြောင်း သိရသည်။

လက်ရှိ အဆိုပါ တယ်လီကွန်း အော်ပရေတာလုပ်ငန်းများကို MPT, Telenor နှင့် Ooredoo တို့က လုပ်ကိုင်လျက်ရှိသည်။