အဝေးထိန်းလေယာဉ် ကုမ္ပဏီတစ်ခုကို တည်ထောင်ရန် Sony နှင့် ZMP ပူးပေါင်း

sonyzmp-SH-pcmag-2015jul23-.jpg

Sony ၏မိုဘိုင်းဌာနခွဲ Sony Mobile သည် ဂျပန်အခြေစိုက် စက်ရုပ်များ ထုတ်လုပ်သော ZMP ကုမ္ပဏီနှင့် ပူးပေါင်း၍ Aerosense အဝေးထိန်း လေယာဉ်ကုမ္ပဏီကို တည်ထောင်ခဲ့ကြောင်း ကုမ္ပဏီ နှစ်ခုက အသီးသီး ထုတ်ပြန်သွားခဲ့သည်။

Sony အနေဖြင့် လုပ်ငန်းများကို ဝန်ဆောင်မှုပေးရန် အဝေးထိန်း လေယာဉ်ကုမ္ပဏီသစ် Aerosense ကို စတင်သွားမည် ဖြစ်သည်။ Aerosense ကုမ္ပဏီသည် အဝေးထိန်းလေယာဉ် သို့မဟုတ် ဒရုန်းများ အသုံးပြု၍ လေ့လာမှုများ ပြုလုပ်ခြင်း၊ စစ်ဆေးခြင်း၊ တိုင်းတာခြင်းနှင့် စာရင်းကောက်ယူမှုများ ပြုလုပ်ကာ ဖောက်သည်များကို ကူညီပေးပြီး ဝန်ဆောင်မှုများအတွက်  အချက်အလက်နှင့် ဓာတ်ပုံများ မှတ်တမ်းတင်ပေးမည် ဖြစ်သည်။ Aerosense သည် အဝေးထိန်း လေယာဉ်အသုံးပြု၍ ဝန်ဆောင်မှုများကို ရောင်းချသွားမည် ဖြစ်ကြောင်း Sony ၏ ပြောရေးဆိုခွင့်ရှိသူက The Wall Street Journal သို့ ပြောကြားခဲ့ သည်။ Aerosense သည် ၂၀၁၆ ခုနှစ်တွင် လုပ်ငန်းများသို့  ဝန်ဆောင်မှု စတင်ပေးရန် ရည်မှန်းထားသည်။ မြေပြင်အနေအထားကို စာရင်း ကောက်ယူရန်အတွက် စက်မှုလုပ်ငန်းများမှ ဆက်သွယ်ရေး လုပ်ငန်းများ လုပ်ကိုင်လျက်ရှိသော ကုမ္ပဏီများသည် Aerosense အတွက် အလားအလာ ရှိသည့် ဖောက်သည်များ ဖြစ်လာနိုင်သည်။

Sony သည် အဝေးထိန်း လေယာဉ် သို့မဟုတ် ဒရုန်းဈေးကွက်တွင်းသို့ ဝင်ရောက်လာသော ကုမ္ပဏီများအနက် တစ်ခုဖြစ်ပြီး Amazon နှင့် Google တို့သည်လည်း ပစ္စည်းများကို အဝေးထိန်း လေယာဉ်များဖြင့် ပေးပို့ရန် သုတေသန ပြုလုပ်လျက်ရှိသည်။ အခြားကုမ္ပဏီ များဖြစ်သော Airware နှင့် Skycatch တို့သည် အဝေးထိန်း လေယာဉ်အခြေစိုက် ဝန်ဆောင်မှုများကို လုပ်ငန်းများအတွက် လုပ်ဆောင်ပေးလျက် ရှိကြသည်။

Ref : CNET