စာပို့တိုက်ဥပဒေ (မူကြမ်း) နှင့် စပ်လျဉ်း၍ အကြံပြုနိုင်

Post1.jpg

စာပို့တိုက်ဥပဒေ (မူကြမ်း) နှင့်စပ်လျဉ်း၍ အကြံပြုနိုင်ကြောင်း ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနမှ သတင်းထုတ်ပြန်သည်။

စာပို့တိုက် ဥပဒေမူကြမ်းကို ပြုစုထားပြီး အကြံပြုလိုသည်များကို [email protected] နှင့် [email protected] များသို့ ပေးပို့နိုင်ကြောင်း၊ ဆက်သွယ်ရေးနှင့် သတင်းအချက်အလက် နည်းပညာ ဝန်ကြီးဌာနမှ ဆက်သွယ်ရေးညွှန်ကြားမှု ဦးစီးဌာနအနေဖြင့် အများပြည်သူများမှ ကြိုတင် သိရှိ၍ လေ့လာနိုင်ရန်၊ အကြံပြုနိုင်ရန်အတွက် စာပို့တိုက် ဥပဒေမူကြမ်းကို ပြုစုထားခြင်းဖြစ်ကြောင်း၊ အဆိုပါ ဥပဒေနှင့်ပတ်သက်၍ အကြံပြုလိုသည်များကို သြဂုတ်လ ၂၁ ရက် နောက်ဆုံးထား၍ ဆက်သွယ်ပေးပို့နိုင်ကြောင်း သိရသည်။ ယင်းစာပို့တိုက် ဥပဒေမူကြမ်းအား အင်္ဂလိပ်ဘာသာဖြင့် www.mcit.gov.mm တွင် လွှင့်တင်ထားကြောင်း တွေ့ရသည်။

လက်ရှိ စာပို့တိုက်ဥပဒေသည် ခေတ်ကာလ ဈေးကွက်အခြေအနေကို ကောင်းစွာလွှမ်းခြုံနိုင်ခြင်း မရှိတော့ဘဲ လက်ရှိအခြေအနေအထိ စာပို့တိုက်ကဏ္ဍတွင် ထိရောက်သည့် စာတိုက်မူဝါဒနှင့် မဟာဗျူဟာများ ချမှတ်၍ စာပို့တိုက်ဝန်ဆောင်မှုများကို စနစ်တကျ ထိန်းကွပ်ပေးသည့် ဥပဒေနှင့် နည်းဥပဒေများ မရှိခဲ့သည့် အတွက် စာပို့တိုက် ဥပဒေသသစ်ကို ကမ္ဘာ့ဘဏ်၏ အကူအညီဖြင့် နယ်သာလန်နိုင်ငံမှ စာပို့တိုက် အတိုင်ပင်ခံနှစ်ဦးတို့မှ ရေးဆွဲလျက်ရှိကြောင်း ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာန ပြည်ထောင်စုဝန်ကြီး ဦးမြတ်ဟိန်းက ပြောသည်။

ဇွန်လ ၁၆ ရက်က နေပြည်တော်တွင် ကျင်းပခဲ့သည့် စာပို့တိုက်ဥပဒေ ရေးဆွဲရေးနှင့် ငွေရေးကြေးရေး ကဏ္ဍဆိုင်ရာ ညှိနှိုင်း အစည်းအဝေးတွင် ပြည်ထောင်စု ဝန်ကြီးက ပြောကြားခဲ့ခြင်းဖြစ်ကြောင်း သိရသည်။

စာတိုက်လုပ်ငန်း ဝန်ဆောင်မှုများအား ပုဂ္ဂလိကသို့ ဖိတ်ခေါ်၍ ဆောင်ရွက်နေခြင်းများ ရှိသော်လည်း တရားမဝင် လုပ်ကိုင်နေသည့် လုပ်ငန်းများ ရှိကြောင်းကိုလည်း ကြားသိရကြောင်း၊ ဥပဒေသစ် ပေါ်ပေါက်လာပါက တရားမဝင် ဆောင်ရွက်ချက်များကို အရေးယူ ဖော်ထုတ်နိုင်မည်ဖြစ်ကြောင်း သိရသည်။

မြန်မာတစ်နိုင်ငံလုံးတွင် စာတိုက်ပေါင်း ၁,၃၈၄ ခု ရှိကြောင်းသိရသည်။ ခေတ်မီအိုင်တီ နည်းပညာဖြစ်သော အီးမေးလ်၊ အင်တာနက်များ ပေါ်ပေါက် လာသောကြောင့် စာတိုက်လုပ်ငန်းသည် အသုံးပြုသူများ နည်းပါး လာကြောင်း၊ သို့သော် အင်တာနက်၊ အီးမေးလ်တို့မှတစ်ဆင့် ဆက်သွယ်၍ ဖြစ်ထွန်းအောင်မြင် လာသော စီးပွားရေးလုပ်ငန်းများ၏ ကုန်သွယ်မှုဆိုင်ရာ ပစ္စည်းများ၊ မူရင်းစာချုပ်၊ စာရွက်စာတမ်းများ၊ ထိတွေ့ကိုင်တွယ်၍ရသော လူ့အသုံးအဆောင်များကို သယ်ယူပို့ဆောင်ပေးနေသည့် စီးပွားရေး ကဏ္ဍတွင် သော်လည်းကောင်း၊ လူမှုရေး ကဏ္ဍတွင်သော်လည်းကောင်း၊ ဝေးလံခေါင်ဖျားသည့် ဒေသများသို့ ဆက်သွယ်ပေးပို့ရသည့် ကဏ္ဍတွင်သော်လည်းကောင်း စာတိုက်လုပ်ငန်းကပင် သယ်ယူပို့ဆောင်ပေး၍ ရှိနေသောကြောင်း ပျောက်ပျက်သွားမည် မဟုတ်ကြောင်း ဆိုသည်။