ရေဒါအစား တီဗွီလှိုင်းများ အသုံးပြု၍ လေယာဉ်များ ခြေရာခံမည့် စမ်းသပ်မှုကို Nats ကုမ္ပဏီပြုလုပ်

_83515402_029a8739-eb9a-4a9a-b104-d8bfd4bb0745.jpg

လေကြောင်း ထိန်းချုပ်ရေးဆိုင်ရာ ပစ္စည်းများကို ထောက်ပံ့သည့် Nats ကုမ္ပဏီနှင့် ၎င်း၏စီးပွားတူများသည် ရေဒါအသုံးပြုခြင်းမှ ဈေးနှုန်းပိုမိုသက်သာသည့် တီဗွီလှိုင်းများဖြင့် လေယာဉ်များကို ခြေရာခံနိုင်သော စမ်းသပ်မှုများကို ပြုလုပ်ခဲ့သည်။

အဆိုပါ တီဗွီလှိုင်းများသည် ရေဒါနှင့်မတူညီဘဲ ရေဒီယိုလှိုင်းများ၏ မတူညီသော အစိတ်အပိုင်းကို အသုံးပြုပြီး ၎င်းလှိုင်းများမှာ ခိုင်မာတောင့်တင်းသော အရာများကို ခြေရာခံနိုင်စွမ်းရှိသည်။ ယခုစမ်းသပ်မှုတွင် အထူး receiver များကို အသုံးပြုခဲ့ပြီး တီဗွီလှိုင်းများသည် အမြင့်ပေ ၁၀,၀၀၀ တွင်ပျံသန်းလျက်ရှိသော လေယာဉ်ပေါင်း ၃၀ ကို တစ်ပြိုင်နက်တည်း ခြေရာခံနိုင်ကြောင်း  သုတေသီများက ပြောကြားခဲ့သော်လည်း စမ်းသပ်မှုများ ထပ်မံပြုလုပ် ရမည်ဖြစ်ကြောင်းလည်း ၎င်းတို့က ပြောဆိုခဲ့သည်။ ရုပ်သံထုတ်လွှင့်သူများနှင့် အကြိုသဘောတူမှုများ ပြုလုပ်ရန် လိုအပ်ကြောင်း စမ်းသပ်မှုခံနိုင်ခြင်းနှင့် ဝန်ဆောင်မှု စံသတ်မှတ်ချက်များနှင့် ပတ်သက်သော မေးခွန်းများကို ဖြေကြားရန်လိုအပ်နေ သေးသော်လည်း ယခုအစီအစဉ်သည် အလွန်စိတ်ဝင်စားစရာ ကောင်းကြောင်းနှင့် လာမည့် ၅ နှစ်အတွင်း ယခုစိတ်ကူးကို တိုးတက်အောင် ဆက်လက်ဆောင်ရွက် သွားမည်ဖြစ်ကြောင်း Nats ကုမ္ပဏီမှ အင်ဂျင်နီယာ နစ်ခ်ယန်းဆိုသူက ပြောကြားခဲ့သည်။

ယခုစမ်းသပ်မှုတွင် လန်ဒန်ရှိ Crystal Palace မှအသံလွှင့်စက်ရုံမှ တီဗွီလှိုင်းများ ထုတ်လွှင့်ပေးခဲ့သည်။ စမ်းသပ်မှုအတွင်း အထူး receiver ၃ ခုသည် လေယာဉ်ကို ခြေရာခံရာမှ ပြန်ကန်ထွက်လာသည့် လှိုင်းများကို တိုင်းတာရန် အသုံးပြုခဲ့သည်။ အဆိုပါ လှိုင်းများမှ လက်ခံရရှိသော မတူညီသည့် တိုင်းတာချက်များကို အခြားတီဗွီလှိုင်းများနှင့် နှိုင်းယှဉ်တိုင်းတာခဲ့သည်။ ထိုသို့နေရာ ၃ ခုမှရရှိသည့် သတင်းအချက်အလက်များမှ အမျိုးမျိုးသော လေယာဉ်တည်နေရာများကို ကောက်ချက်ချ ပေးမည်ဖြစ်သည်။

Ref: BBC