ပြည်ပခရီးသွားစဉ် MPT မိုဘိုင်း အသုံးပြုခြင်း အတွက် သီးသန့် လျှောက်ထားရန် မလိုတော့

IMG_1618.jpg

မြန်မာ့ဆက်သွယ်ရေးလုပ်ငန်း၏ ဖုန်းများကို ပြည်ပသို့ သယ်ဆောင်အသုံးပြုခွင့် (Roaming) အတွက် သီးသန့်လျှောက်ထားခဲ့ရသော်လည်း ယခုအခါ မလိုတော့ကြောင်း သိရသည်။

ပြည်ပခရီးထွက်ပါက မိမိလက်ရှိ အသုံးပြုနေသောဖုန်းကို ဆက်လက်သုံးစွဲနိုင်ပြီဖြစ်ကြောင်း၊ အဆိုပါ ဝန်ဆောင်မှုကို GSM နှင့် WCDMA ဖုန်းအသုံးပြုသူများ ရရှိမည်ဖြစ်ပြီး ဖုန်းခေါ်ဆိုခြင်း၊ စာတိုပေးပို့ခြင်းတို့ လုပ်ဆောင်နိုင်မည်ဖြစ်ကြောင်း သိရသည်။ သွားရောက်သော နိုင်ငံအပေါ်မူတည်၍ တစ်မိနစ် အတွက် ကောက် ခံသောနှုန်းထား ကွာခြားမည်ဖြစ်သည်။ International Roaming Outbound သွားရောက် သုံးစွဲနိုင်သော နိုင်ငံ ၃၅ နိုင်ငံ၊ အော်ပရေတာစုစုပေါင်း ၃၇ ခုရှိကြောင်း မြန်မာ့ဆက်သွယ်ရေးလုပ်ငန်းမှ ထုတ်ပြန်ခဲ့ဖူးသည်။ အဆိုပါနိုင်ငံများတွင် အိမ်နီးချင်းနိုင်ငံများဖြစ်သည့် ထိုင်း၊ စင်ကာပူ၊ လာအို၊ ကမ္ဘောဒီးယား အစရှိသည်တို့ ပါဝင်သကဲ့သို့ ပြင်သစ်၊ ဂျာမနီ၊ ရုရှား၊ အီဂျစ် အစရှိသည့် နိုင်ငံများလည်း ပါဝင်သည်ကို တွေ့ရသည်။

မြန်မာ့ဆက်သွယ်ရေး လုပ်ငန်း၏ ဖုန်းများအား International Outbound Roaming ဝန်ဆောင်မှုအတွက် ယခင်က သတ်မှတ်နေရာများတွင် အခမဲ့ လျှောက် ထားနိုင်ရန် ဆောင်ရွက်ခဲ့သည်။ ထိုကဲ့သို့ လျှောက်ထားရာတွင် ကြိုတင်ငွေဖြည့်ကတ်သုံး မိုဘိုင်းဖုန်းများအတွက် မိမိသုံးစွဲမည့် အခြေအနေအရ ကျသင့်မည့် ဘီလ်ပမာဏကို ခန့်မှန်းကာ ကြိုတင်ငွေဖြည့်ထားရန် လိုအပ်မည်ဖြစ်ကြောင်း၊ International Outbound Roaming ဖွင့်ရန် မြန်မာ့ဆက်သွယ်ရေးလုပ်ငန်း၊ ရုံးချုပ် အခြေစိုက် မိုဘိုင်းဆက်သွယ်ရေးစခန်း၊ ရန်ကုန်မြို့တွင် ဆောင်ရွက်ရမည်ဖြစ်ကြောင်း ၊ ဘီလ်စနစ်သုံး မိုဘိုင်းဖုန်းများအတွက်မူ နေပြည်တော်၊ ရန်ကုန်၊ မန္တလေး တို့ရှိ မြန်မာ့ဆက်သွယ်ရေးလုပ်ငန်း ငွေလက်ခံကောင်တာများ၊ သက်ဆိုင်ရာပြည်နယ်နှင့် တိုင်းဒေသကြီး မန်နေဂျာရုံး၊ ငွေစာရင်းဌာနများတွင် သတ်မှတ်ထားသော ကြိုတင်ငွေပေးသွင်းရန် လိုအပ်မည်ဖြစ်ကြောင်း ထုတ်ပြန်ခဲ့ဖူးသည်။

မြန်မာနိုင်ငံသို့လာရောက်ပြီး Inbound စနစ် အသုံးပြုလိုပါကလည်း ဆောင်ရွက်ထားပြီးဖြစ်ကာ MPT GSM, MPT, MM900 စသည့် ကွန်ရက်များထဲမှ တစ်ခုခု ကို ရွေးချယ် အသုံးပြုနိုင်မည်ဖြစ်သည်။ ယူဆောင်လာသော ဖုန်း၏ သက်ဆိုင်ရာနိုင်ငံတွင်း ဝန်ဆောင်မှုပေးသောကုမ္ပဏီမှ ကျသင့်ငွေကို ကောက်ခံ မည် ဖြစ်ကြောင်း သိရသည်။