ယူကေဗီဇာ လတ်တလော လျှောက်ထားလိုသူများ ထိုင်းနိုင်ငံရှိ VFS တွင် လျှောက်ထားနိုင်

VFS-Thailand.jpg

မြန်မာနိုင်ငံတွင် ယူကေ ဗီဇာလျှောက်ထားရန် စင်တာအသစ်ကို ဇွန်လလယ်တွင် ဖွင့်လှစ်သည့် အချိန်မတိုင်မီ အရေးပေါ်ဗီဇာ လိုအပ်သူများအနေဖြင့် ထိုင်းနိုင်ငံ ဘန်ကောက်မြို့ရှိ VFS ဗီဇာလျှောက်ထားမှု စင်တာ (http://www.vfsglobal.co.uk/thailand/) တွင် လျှောက်ထားရမည်ဖြစ်ကြောင်း သိရသည်။

လက်ရှိတွင် သံရုံးရှိ ဗီဇာဌာနတွင် ဗီဇာလျှောက်လွှာတင်ရန် ရက်ချိန်းများ ပြည့်လျက်ရှိပြီး ဗီဇာစင်တာ အသစ်မှာလည်း လျှောက်လွှာသစ်များလက်ခံရန် အဆင်သင့် မဖြစ်သေးသောကြောင့် ဖြစ်ကြောင်း သိရသည်။

ဘန်ကောက်တွင် လူကိုယ်တိုင် သွားရောက်ကာ ဗီဇာလျှောက်ထားသည့် မြန်မာနိုင်ငံမှ ဗီဇာလျှောက်ထားသူများကို ဦးစားပေးသွားမည်ဖြစ်ပြီး အဆိုပါ လျှောက် ထားမှုများကို တတ်နိုင်သမျှမြန်မြန် ဆောင်ရွက်ပေးသွားမည်ဖြစ်သည်။ ထိုသို့ အမြန် ဆောင်ရွက်ပေးသည့် ဝန်ဆောင်မှုအတွက် ထပ်ဆောင်း ကုန်ကျစရိတ် ပေးရန် မလိုအပ်ကြောင်း သိရသည်။

“ယူကေရဲ့ အဓိကကျောင်းဖွင့်ချိန်က စက်တင်ဘာလဖြစ်တဲ့ အတွက် ကျောင်းတက်မယ့် ကလေးတွေကိုတော့ ထိခိုက်မှုမရှိပါဘူး။ အဲလိုမဟုတ်ဘူး၊ အင်္ဂလိပ်စာနဲ့ သွားတာတို့၊ ဇူလိုင်လမှာဖွင့်မယ့် Short Course သွားတက်တာမျိုး ဆိုရင်တော့ နည်းနည်းအခက်အခဲ ရှိနိုင်ပါတယ်။ အစ်မတို့ဆီက ကလေးတွေကတော့ ကြိုပြီး ပြင်ဆင်ထားတဲ့ အတွက်ကြောင့်မို့ ထိုင်းအထိတော့သွားပြီး လျှောက်စရာမလိုပါဘူး။ ဒီကြားထဲမှာ အရေးတကြီးသွားမယ့်သူတွေ၊ ကြိုတင်မပြင်ဆင်ထား တဲ့သူတွေ အတွက်ကတော့ ထိုင်းအထိ သွားလျှောက်ရမှာပါ” ဟု Regent မှ ပညာရေးအတိုင်ပင်ခံ ဒေါ်လွင်လွင်အောင်က ပြောသည်။

ယူကေဗီဇာ လျှောက်လွှာတင်ထားပြီးသူများနှင့် လျှောက်လွှာတင်ပြီး ဗီဇာစာရွက် စာတမ်းများကို  စောင့်ဆိုင်းနေသူများအနေဖြင့် မိမိတို့၏ စာရွက်စာတမ်းများကို ဗီဇာလျှောက်ထားမှု စင်တာသစ် မဖွင့်လှစ်မီအထိ ဗြိတိသျှသံရုံးတွင် ထုတ်ယူနိုင်မည်ဖြစ်သည်။ ဗီဇာလျှောက်ထားသူများ အနေဖြင့် သတင်း အချက်အလက်များနှင့် ဗီဇာလျှောက်ထားမှု စင်တာအသစ်နှင့် စပ်လျဉ်းသည့်  အကြောင်းအရာသစ်များကို သိရှိနိုင်ရန် www.gov.uk/world/burma ဝက်ဘ်ဆိုက်တွင် လေ့လာနိုင်ပြီး ဗီဇာလျှောက်ထားမှု ဝန်ဆောင်မှုများကို သိရှိလိုပါက အပြည်ပြည်ဆိုင်ရာ စုံစမ်းမေးမြန်းမှု ဝန်ဆောင်မှု https://ukvi-international.faq-help.com/ သို့ ဆက်သွယ်မေးမြန်းနိုင်သည်။