မြန်မာကျောင်းသားများအတွက် IELTS For UKVI ဖြေဆိုရန် လျှောက်ထားရမည့်ပုံစံ ပြောင်းလဲကျင့်သုံးမည်

IELTS.jpg

မြန်မာကျောင်းသား၊ ကျောင်းသူများ နိုင်ငံတကာတက္ကသိုလ်၊ ကောလိပ်များသို့ သွားရောက် ပညာသင်ကြားရာတွင် လိုအပ်သည့် IELTS For UKVI (UK Visa and Immigration) ဖြေဆိုရန် လျှောက်ထားမှု ပုံစံစနစ်သစ်ကို လာမည့် ဇွန်လ ၂၇ ရက်မှ စတင် ပြောင်းလဲ ကျင့်သုံးသွားမည်ဖြစ်ကြောင်း သိရသည်။

နိုင်ငံတကာတက္ကသိုလ် Foundation Program နှင့် Pre-Master Program များကို လျှောက်ထား တက်ရောက်မည့် မြန်မာကျောင်းသား၊ ကျောင်းသူများအတွက် IELTS For UKVI ကိုဖြေဆိုရန် လိုအပ်မည်ဖြစ်ကြောင်း သိရသည်။

“ဒီလို ကျောင်းသားတွေက အရင်တုန်းက ပုံမှန် တစ်လ ၂ ကြိမ် စစ်ဆေးပေးတဲ့ IELTS စာမေးပွဲကို ဝင်ဖြေလို့ရတယ်။ အခုကတော့ ယူကေတက္ကသိုလ်တွေကို သွားတဲ့ လမ်းကြောင်းတွေကနေ တစ်ဆင့် တက္ကသိုလ်တက်ဖို့ ကြိုးစားတဲ့ ကျောင်းသူ၊ ကျောင်းသားတွေက အခုစတင်ကျင့်သုံးမယ့် စနစ်အတိုင်း လိုက်နာရမှာဖြစ်ပါတယ်။ ဒီနေရာမှာ IELTS For UKVI ကို သီးသန့်ဖြေဆိုဖို့ မလိုတဲ့ အချို့ ယူကေတက္ကသိုလ်တွေလည်း ရှိပါတယ်” ဟု CROWN Education မှ နိုင်ငံတကာပညာရေး အကြံပေးအတိုင်ပင်အရာရှိ ဦးအောင်ကျော်ဆန်းက ပြောသည်။

၂၀၁၅ ခုနှစ် ဇွန်လ ၂၇ ရက်တွင် စတင်ကျင့်သုံးမည့် IELTS For UKVI စာမေးပွဲကို ဖြေဆိုရန်အတွက် မြန်မာကျောင်းသား၊ ကျောင်းသူများသည် အွန်လိုင်းမှ မိမိကိုယ်ပိုင် အမြဲသုံးသည့် အီးမေးလ်ကို အသုံးပြု၍ မှတ်ပုံတင်ရမည်ဖြစ်ပြီး ၃ ရက်အတွင်း MFTB တွင် အမေရိကန်ဒေါ်လာ ၃၁၀ ပေးသွင်းရမည်ဖြစ်သည်။ အဆိုပါ ငွေသွင်းထားမှု အထောက်အထားပြေစာကိုလည်း ရန်ကုန်မြို့ရှိ ဗြိတိသျှကောင်စီတွင် တင်ပြပြီးမှသာ မိမိ၏ IELTS For UKVI စာမေးပွဲဖြေဆိုရန် မှတ်ပုံတင်ခြင်းလုပ်ငန်းစဉ်ပြီးမြောက်မည်ဖြစ်ပြီး ဇွန် ၂၇ ရက်မှ စတင်ကာ http://takeielts.britishcouncil.org/ အွန်လိုင်းမှ စတင်လျှောက်ထားနိုင် မည် ဖြစ်ကြောင်း သိရသည်။