မိုဘိုင်း လုပ်ငန်းများနှင့် ဂြိုဟ်တု ဆက်သွယ်ရေးဆိုင်ရာ ပြပွဲကျင်းပမည်

connet.jpg

မိုဘိုင်းလုပ်ငန်းများနှင့် ဂြိုဟ်တုဆက်သွယ်ရေး ဆိုင်ရာများ၊ အိုင်စီတီကဏ္ဍများရှိ အော်ပရေတာများ ဆိုင်ရာပြပွဲ ကျင်းပမည် ဖြစ်ကြောင်း သိရသည်။

အဆိုပါ  CommuniCast 2014 ပြပွဲကို နိုဝင်ဘာလ ၁၈ ရက်မှ ၂၀ ရက်နေ့အထိ ရန်ကုန်မြို့ Myanmar Event Park ၌ကျင်းပ သွားမည်ဖြစ်ကြောင်း၊ မြန်မာနိုင်ငံ၌ လာရောက်ကျင်းပသည့် ပထမဆုံး ဆက်သွယ်ရေး ဆိုင်ရာပစ္စည်း ပြပွဲဖြစ်ကြောင်း သိရသည်။ မိုဘိုင်း၊ ဂြိုဟ်တုနှင့် ဆက်သွယ်ရေး လုပ်ငန်းများမှ ကုမ္ပဏီပေါင်း ၉၀ ကျော်ပါဝင်မည် ဖြစ်ကြောင်းသိရသည်။ တက်ရောက်ရန်အတွက် စာရင်းပေးသွင်း ရမည်ဖြစ်ပြီး အွန်လိုင်းမှ သော်လည်းကောင်း၊ ပြပွဲရက်များ၌ ပွဲသို့လာရောက်စဉ်တွင် လည်းကောင်း အခမဲ့ပေးသွင်း နိုင်မည်ဖြစ်သည်။ ပြပွဲ၏အသေးစိတ် အကြောင်းအရာများကို www.com-municastmyanmar.com  တွင်ကြည့်ရှုနိုင်ကြောင်း သိရသည်။

“ဒီပွဲမှာပါဝင်တဲ့ နိုင်ငံခြား ကုမ္ပဏီတွေ အားလုံးက ဈေးကွက် အသစ်ရှာဖွေကြမယ်၊ ပူးပေါင်းဆောင်ရွက်မယ့်သူ ရှာဖွေကြမယ်၊ တစ်ဖက်ကလည်း ပြရုံသက်သက် မဟုတ်ဘဲ နည်းပညာတွေကိုပါ မိတ်ဆက်မယ့် ပွဲလေးတွေ ပါဝင်မှာဖြစ်ပါတယ်။ ပြပွဲသက်သက် မဟုတ်ပါဘူး၊ ဟောပြောပွဲတွေ၊  Seminar တွေဆောင်ရွက်ထားတယ်”ဟု မြန်မာနိုင်ငံ ကွန်ပျူတာအသင်းချုပ်မှ တာဝန်ရှိသူတစ်ဦးဖြစ်သည့် ဦးဇော်မင်းဦးက ပြောသည်။ အဆိုပါ ပြပွဲတွင် မိုဘိုင်းဟောပြောပွဲနှင့် ဂြိဟ်တုဆိုင်ရာ ဆွေးနွေးပွဲတို့ အပါအဝင် ကွန့်ဖရင့်နှင့် ဟောပြောပွဲများလည်း ပါဝင်မည်ဖြစ်ကြောင်း သိရသည်။

အဆိုပါ ပြပွဲကို Allworld Exhibitions Alliance ၏ အဖွဲ့ဝင် Bangkok Exhibition Services Ltd မှစီစဉ်ခြင်းဖြစ်ကြောင်း သိရသည်။ Allworld Exhibitions အနေဖြင့် အာရှနှင့်အရှေ့အလယ် ပိုင်းတွင်ပြပွဲများ စီစဉ်ခြင်းဖြစ်ပြီး CommunistCast Myanmar မှာ ၂၀၁၄   ခုနှစ်တွင် ပြသသည့်ခြောက်ခုမြောက် ပြပွဲဖြစ်ကြောင်း၊  အဆိုပါ ပြပွဲတွင် နောင်လာမည့် သုံးနှစ်ခန့်တွင် ပြည်တွင်း၌ ဆက်သွယ်ရေး နည်းပညာနှင့် ပတ်သက်၍ ၈၀ ရာခိုင်နှုန်း ထိုးဖောက်နိုင်မည့် ဈေးကွက် အခွင့်အလမ်းများကို ပြသသွားမည် ဖြစ်ကြောင်းသိရသည်။

-ထွန်းထွန်း