စားသုံးသူများထံမှ ၅ ရာခိုင်နှုန်းကို အော်ပရေတာများ မဖြစ်မနေ ကောက်ခံရမည်

Update-News_5.jpg

မိုဘိုင်းဖုန်းလိုင်း အသုံးပြုရန် ဘီလ်ဖြည့်သွင်းသည့် ပမာဏအပေါ် မူတည်၍ အခွန် ၅ ရာခိုင်နှုန်း ကောက်ခံခြင်းသည် ဥပဒေအရ ပြဋ္ဌာန်းထားခြင်း ဖြစ်သည့်အတွက် ဆက်သွယ်ရေး အော်ပရေတာ များသည် အဆိုပါအခွန်ကို မဖြစ်မနေ ကောက်ခံရမည်ဟု သိရသည်။

“ဥပဒေမှာ စားသုံးသူတွေဆီက ကောက်ခံရမှာလို့ ပြဋ္ဌာန်းထားပါတယ်။ အော်ပရေတာတွေအနေနဲ့ ပြည်သူတွေဆီက မကောက်ဘဲ ကိုယ်တိုင်ပဲပေးလိုက်မယ် ဆိုတာကတော့ ဥပဒေအရ လုပ်ပိုင်ခွင့် မရှိပါဘူး” ဟု ဆက်သွယ်ရေးညွှန်ကြားမှု ဦးစီးဌာနမှ ညွှန်ကြားရေးမှူး ဦးသန်းထွန်းအောင်က ပြောသည်။

ဆက်သွယ်ရေး အော်ပရေတာများအကြား တစ်ဦးနှင့်တစ်ဦး ဈေးကွက်ပြိုင်ဆိုင်မှုများ ပြုလုပ်နေကြသော်လည်း စားသုံးသူ ပေးဆောင်ရသည့် အခွန်နှင့် ပတ်သက်၍ ကောက်ခံခြင်း မပြုဘဲ ပြိုင်ဆိုင်နိုင်မည် မဟုတ်ကြောင်း ဦးသန်းထွန်းအောင်က ပြောဆိုခြင်းဖြစ်သည်။

ဆက်သွယ်ရေးစနစ်အတွက် အသုံးပြုသည့် ဘီလ်ပမာဏအပေါ် အခွန် ၅ ရာခိုင်နှုန်း ပေးဆောင်လိုက် သော်လည်း အဆိုပါအခွန်ကို ပြည်ထောင်စုအစိုးရ လက်ဝယ် သို့ ရောက်ရှိသည်၊ မရောက် ရှိသည်နှင့် ပတ်သက်၍ အဆိုပါ ကိစ္စရပ်သည် ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနမှ ပုံစံအသစ် တီထွင်၍ ကောက်ခံခြင်းမျိုး မဟုတ်ဘဲ အခြားသော စားသုံးသူ ပေးဆောင်ရသည့် အခွန်များအတိုင်း ဘဏ္ဍာအခွန်နှင့် စီးပွားရေးလုပ်ငန်းရှင်များအကြား ပေးဆောင်ရသည့် ပုံစံမျိုးသာဖြစ်ကြောင်း ဦးသန်းထွန်းအောင်က ဆိုသည်။

“ဘယ်လောက်အထိ ကောက်ခံရရှိတယ်ဆိုတာကလည်း ဆက်သွယ်ရေး အော်ပရေတာတွေရဲ့ Report တွေကို ကြည့်ရင်သိနိုင်ပါတယ်” ဟု ၎င်းက ဆိုသည်။

စားသုံးသူများ ပေးဆောင်ရသည့် အခွန် ၅ ရာခိုင်နှုန်းနှင့် ပတ်သက်၍ ဆက်သွယ်ရေး အခန်းကဏ္ဍအတွက် နိုင်ငံတော်မှ တစ်နှစ်ဆိုင်းငံ့ထားခြင်းဖြစ်ပြီး ယခု ၂၀၁၅ – ၂၀၁၆ ဘဏ္ဍာရေးနှစ်မှ စတင်၍ အခွန်ကောက်ခံတော့မည် ဖြစ်ကြောင်း ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနက ကြေညာခဲ့သည်။

အသုံးပြုသည့် ဘီလ်ပမာဏအပေါ် အခွန်ကောက်ခံခြင်းနှင့် ပတ်သက်၍ မိုဘိုင်းဖုန်း အသုံးပြုသူများက လူမှု ကွန်ရက်ပေါ်တွင် ဝေဖန်နေကြသော်လည်း ယခု ကောက်ခံတော့မည့် အခွန် ၅ ရာခိုင်နှုန်းသည် အခြားသော နိုင်ငံများနှင့် နှိုင်းယှဉ်ပါက သက်သာသော အခွန်နှုန်းထားဖြစ်သည်ဟု ဆက်သွယ်ရေးနှင့် သတင်းချက်အလက် နည်းပညာ ဝန်ကြီး ဌာနမှ အမြဲတမ်းအတွင်းဝန်ဖြစ်သူ ဦးခင်မောင်သက်က ပြောသည်။

တယ်လီဖုန်းကွန်ရက်ကို အသုံးပြုသည့် ဘီလ်ပမာဏ အပေါ် အခွန် ၅ ရာ ခိုင်နှုန်း ကောက်ခံရာတွင် မိုဘိုင်းဖုန်းလိုင်းများအတွက် Prepaid ဖုန်းလိုင်းများအပြင် Postpaid ဖုန်းလိုင်းများ အတွက်ပါ ကောက်ခံမည်ဖြစ်ပြီး မြန်မာ့ဆက်သွယ်ရေး၏ လက်အောက်ခံ MEC ဖုန်းလိုင်းများနှင့် အော်တို ဖုန်းလိုင်းများကိုလည်း အခွန်ကောက်ခံမည် ဖြစ်ကြောင်း သိရသည်။