နီပေါတွင် NASA ၏ရေဒါ နည်းပညာသစ်ဖြင့် လူလေးဦးကို ကယ်ဆယ်နိုင်ခဲ့

2015-05-07-2-quake-2-980x420.jpg

NASA ၏နောက်ဆုံးပေါ် နည်းပညာသည် နီပေါတွင် လတ်တလော လှုပ်ခတ်သွားသော ငလျင်ကြောင့် အုတ်ကျိုး အုတ်ပဲ့များအတွင်း ပိတ်မိနေသော လူလေးဦး၏ အသက်များကို ကယ်ဆယ်နိုင်ခဲ့ကြောင်း သိရသည်။

NASA  သည်အရေးပေါ် အခြေအနေနှင့် သဘာဝ ဘေးအန္တရာယ် ခံစားရသည့် လူများကို မိုက်ခရိုဝေ့ဗ် ရေဒါအသုံးပြု၍ လူ့နှလုံးခုန်နှုန်းကို ခြေရာခံကာ ရှာဖွေပေးနိုင်သော နည်းပညာကို အသုံးပြုထားသည်။ အဆိုပါ ရှေ့ပြေးပုံစံ ထုတ်ကုန်များကို NASA နှင့် အမေရိကန် နိုင်ငံတော် လုံခြုံရေးဌာန၏ သိပ္ပံနှင့် နည်းပညာ ဦးစီးဌာနတို့မှ ပူးပေါင်းဖန်တီး ထားခြင်းဖြစ်သည်။ ၎င်းထုတ်ကုန်၏ အရွယ်အစားမှာ လက်ဆွဲ သေတ္တာခန့်သာရှိပြီး နီပေါနိုင်ငံသို့ လူသားချင်းဆိုင်ရာ စာနာမှု အကူအညီများ ထောက်ပံ့ရာတွင် အဆိုပါ ကိရိယာနှစ်လုံးကို ထောက်ပံ့ ပေးခဲ့ခြင်းဖြစ်သည်။ NASA ၏ FINDER အမည်ရှိ ကိရိယာသည် အပျက်အစီး အောက် ပေ ၃၀ အနက်၊ ကွန်ကရစ်အထူ ပေ ၂၀ နှင့် အပြင်ဘက် ပေ ၁၀၀ ပတ်လည်မှ နှလုံးခုန်နှုန်းများကို ခြေရာခံနိုင်သည်။ ထို့အပြင် ၎င်းကိရိယာသည် ငါးပေအကွာ ပတ်လည်ရှိ အသက်ရှင်နေသည့် လူတစ်ဦး၏ တည်နေရာကို အတိအကျ ဖော်ပြပေးနိုင်သည်။ FINDER သည်လူနှင့် တိရစ္ဆာန်တို့၏ နှလုံးခုန်ပုံကို ခွဲခြားနိုင်သည်။

FINDER ကိရိယာသည် ရှေ့ပြေးပုံစံသာ ရှိသေးပြီး NASA အနေဖြင့် ၎င်း tool ကိုစီးပွားဖြစ် ရောင်းချသွားရန် အစီအစဉ်များရှိကြောင်း သိရသည်။ NASA က နီပေါရှိ ချာတာရာရွာကဲ့သို့ ဝေးလံပြီး  ငလျင်ဒဏ် ခံစားရသည့် ဧရိယာများမှ မြေပုံများရရှိရန် ဂြိုဟ်တုများကို အသုံးပြုခဲ့ကြောင်း သိရသည်။

Ref : SlashGear