ရတနာပုံတယ်လီပို့၏ Network Facilities Service လိုင်စင်သစ်ဖြင့် ဝန်ဆောင်မှုပိုကောင်းအောင် လုပ်ရန်ရှိဟုဆို

IMG_9807.jpg

ရတနာပုံတယ်လီပို့၏ Network Facilities Service လိုင်စင်သစ်ဖြင့် ဝန်ဆောင်မှုပိုကောင်းအောင် လုပ်ရန်ရှိကြောင်း တာဝန်ရှိသူက ပြောကြားသည်။

“အခုလက်ရှိမှာ ရတနာပုံတယ်လီပို့အနေနဲ့ လိုင်စင်အသစ်ရပြီဖြစ်တဲ့အတွက် အခုထက်ပိုကောင်းအောင် လုပ်ဖို့ရှိတယ်။ လိုင်စင်သစ်က NFS လိုင်စင်ဆိုတော့ လိုင်စင်ထဲမှာက Application ပိုင်း၊ Infrastructure တည်ဆောက်တဲ့အပိုင်းတွေ လုပ်ခွင့်ရှိတယ်။ အဓိကအနေနဲ့ အင်တာနက်ဝန်ဆောင်မှု ISP အပိုင်းရယ်၊ Application Service ပိုင်းတွေရယ်မှာ ပိုပြီးတော့ ကျယ်ကျယ်ပြန့်ပြန့် ဝန်ဆောင်ခွင့်ရလာမယ်။ Value added service တွေ ဘာတွေ ပါတာပေါ့။ အဲဒါတွေကို အစတည်းကလည်း ဝန်ဆောင်မှုပေးနေတာပဲ၊ Ring Tune တို့ ၊ မီတာဘေလ်ဆောင်တာတို့၊ ဖုန်းဘေလ်ဆောင်တာတို့၊ နောက်ထပ်လည်း ISP ဝန်ဆောင်မယ့်သူတွေကို ထပ်ပြီး လိုင်စင်ချပေးနေတယ်ဆိုတော့ ကျွန်တော်တို့ဘက်ကလည်း ယှဉ်ပြိုင်ရမှာပါပဲ” ဟု အထက်ပါ တာဝန်ရှိသူက ပြောသည်။

ရတနာပုံတယ်လီပို့ကုမ္ပဏီအနေဖြင့် Network Facilities Service (Individual) License ကို ရရှိခဲ့ပြီးဖြစ်သည်။

“လက်ရှိမှာ ကျွန်တော်တို့ ဝန်ဆောင်မှု သုံးနေတဲ့သူတွေက လိုင်းမကောင်းဘူးတို့၊ ဘာတို့ ရှိနေပေမယ့် တကယ်တမ်း ကွန်ရက်ချဲ့ထွင်မှုတွေ ပြီးသွားတဲ့အခါကျရင်တော့ ဒီလိုမျိုး လိုင်းမကောင်းတာတွေက နည်းသွားမှာပါ။ လိုင်စင်သစ်ရပြီးမှ မကောင်းရင်တော့ service provider ရဲ့ တာဝန်ပါ” ဟု ဆက်လက် ပြောကြားသည်။

မြန်မာနိုင်ငံ၏ စတုထ္ထမြောက် အော်ပရေတာဖြစ်လာမည့် Royal ရတနာပုံကုမ္ပဏီမှာ ရတနာပုံတယ်လီပို့အပြင် အခြားလုပ်ငန်းအဖွဲ့များလည်း ပါဝင်မည်ဟု သိရသည်။ အဆိုပါ ကုမ္ပဏီ အနေဖြင့် ပြည်တွင်း ဒုတိယမြောက် အော်ပရေတာဖြစ်လာမည်ဖြစ်ကာ တယ်လီကွန်း အော်ပရေတာ လုပ်ငန်းများအား ဆောင်ရွက်ခွင့်ရမည် ဖြစ်သည်။

တယ်လီကွန်းအော်ပရေတာ လုပ်ငန်းဆိုသည်မှာ Fixed Lines ဆက်သွယ်ရေးလုပ်ငန်း၊ မိုဘိုင်း ဆက်သွယ်ရေးလုပ်ငန်း အပါအဝင် ဆက်သွယ်ရေးနှင့် ဆက်စပ်နေသော လုပ်ငန်းများအားလုံးကို အပြည့်အဝလုပ်ကိုင်ခွင့်ရရှိမည့် အနေအထားဖြစ်ကြောင်း သိရသည်။