လုပ်ငန်းခွင်အကြို မူလတန်းဆရာ အတတ်ပညာ သင်တန်း အတွက် လျှောက်လွှာခေါ်ယူ

wwwasianchildrensmissionorg.jpg

၂၀၁၅-၂၀၁၆ ပညာသင်နှစ်အတွက် ပညာရေးကောလိပ်များတွင် လုပ်ငန်းခွင်အကြို မူလတန်းဆရာ အတတ်ပညာ သင်တန်း (PPTT) အမှတ်စဉ် (၂/၁၅) အား ဇွန်လတွင် ဖွင့်လှစ် သင်ကြားပို့ချ ပေးသွားမည် ဖြစ်သည့် အတွက် လျှောက်လွှာများ ခေါ်ယူနေကြောင်း သိရသည်။

လျှောက်ထားလိုသူများသည် တက္ကသိုလ်တစ်ခုခုမှ ဘွဲ့တစ်ခုခု ရရှိပြီးသူဖြစ်ရမည် ဖြစ်ပြီး  ပြင်ပဘွဲ့ရများ လျှောက်ထားလိုပါက အသက် ၃၀ နှစ် ဖြစ်ရမည်ဖြစ်သည်။ ဝန်ထမ်းဖြစ်ပါက အမြဲတမ်းဝန်ထမ်းအဖြစ် လုပ်သက် အနည်းဆုံး နှစ်နှစ် တာဝန်ထမ်းဆောင်ခဲ့ပြီး အသက် ၃၅ နှစ်ထက် မကြီးသူ ဖြစ် ကြောင်းနှင့် သက်ဆိုင်ရာ ဌာန၏ ခွင့်ပြုချက်ကို ပူးတွဲတင်ပြရမည် ဖြစ်သည်။

ဝန်ထမ်းများမှာ လစာမဲ့ခွင့်ဖြင့် သင်တန်းတက်ရမည်ဖြစ်ပြီး သက်ဆိုင်ရာ ခရိုင်များတွင်ရေးဖြေ ဖြေဆိုရမည် ဖြစ်သည်။ လျှောက်ထားသူများသည် ဝင်ခွင့်ရေးဖြေနှင့် လူတွေ့နှုတ်ဖြေကို ဖြေဆိုကြရမည်ဖြစ်ပြီး မေလ ၅ ရက်တွင် ရေးဖြေစာမေးပွဲ (အင်္ဂလိပ် စာနှင့် အထွေထွေ ဗဟုသုတ)ကို ဖြေဆိုရမည်ဖြစ်သည်။

ရေးဖြေစာမေးပွဲများကို တိုင်းဒေသကြီး/ပြည်နယ်များရှိ ခရိုင်စာစစ်ဌာန ဖွင့်လှစ်ထားသည့် အခြေခံ ပညာကျောင်းများ၌ ဖြေဆိုရမည်ဖြစ်ပြီး ရွေးချယ်ခံရသူများစာရင်းကို မြို့နယ်ရုံးများ၊ ခရိုင်နှင့် တိုင်းဒေသကြီး/ပြည်နယ် ပညာရေးညွှန်ကြားရေးမှူး ရုံးများတွင် ထုတ်ပြန်ကြေညာပေးမည်ဖြစ်သည်။

လျှောက်လွှာနှင့်အတူ တက္ကသိုလ်ဝင်စာမေးပွဲအောင်မြင်ကြောင်း ထောက်ခံစာ၊ ဘွဲ့လက်မှတ်၊ နိုင်ငံသား စိစစ်ရေး ကတ်ပြားနှင့် ကျန်းမာကြောင်း ထောက်ခံစာမိတ္တူတို့ကို ပူးတွဲတင်ပြရမည်ဖြစ်သည်။

လျှောက်ထားသူများသည် လျှောက်လွှာကို ၂၀၁၅ ခုနှစ် ဧပြီလ ၂ ရက်မှ စတင်၍ မြို့နယ်ပညာရေးမှူး ရုံးများသို့ တင်ပြ လျှောက်ထားရမည်ဖြစ်သည်။ လူတွေ့စစ်ဆေးရန် လာရောက်သည့်အခါ တက္ကသိုလ်ဝင် စာမေးပွဲ အောင်မြင်ကြောင်း ထောက်ခံစာ (မူရင်း)၊ ဘွဲ့လက်မှတ် (မူရင်း)၊ နိုင်ငံသားစိစစ်ရေး ကတ်ပြား (မူရင်း) နှင့် ကျန်းမာကြောင်း ထောက်ခံစာ (မူရင်း) တို့ကို ယူဆောင်ရမည် ဖြစ်ပြီး ဆရာတစ်ဦးတွင် ရှိသင့်၊ ရှိထိုက်သည့် သွင်ပြင်လက္ခဏာအင်္ဂါရပ်နှင့် ကျန်းမာရေး အခြေအနေတို့ကို လူတွေ့စစ်ဆေးမည် ဖြစ်သည်။

လျှောက်ထားသူသည် သတ်မှတ်ထားသော သင်တန်းဝင်ခွင့်လျှောက်လွှာ ပုံစံအတိုင်း ကိုယ်တိုင် ရေးသား ဖြည့်သွင်းကာ ခြောက်လ အတွင်း ရိုက်ကူးထားသည့် ပတ်စပို့ အရွယ် ဓာတ်ပုံ  (မျက်မှန်တပ်သူ ဖြစ်ပါက မျက်မှန်နှင့် တစ်ပုံ၊ မျက်မှန်မပါတစ်ပုံ) ကို ကပ်၍ တင်ပြရမည့် အထောက်အထားများကို ပူးတွဲလျက် ၂၀၁၅ ခုနှစ် ဧပြီလ ၉ ရက် နောက်ဆုံးထား၍ သက်ဆိုင်ရာ မြို့နယ်ပညာရေးမှူးရုံးများသို့ လျှောက်ထားနိုင်ကြောင်း သိရသည်။