အဆင့်မြင့် ကွန်ပျူတာတက္ကသိုလ်ကို သတင်းအချက်အလက် နည်းပညာတက္ကသိုလ်ဟု အမည်ပြောင်းလဲ

Update-News_5.jpg

၂၀၁၂ ခုနှစ်မှ စတင်၍ ရန်ကုန်ကွန်ပျူတာတက္ကသိုလ် လက်အောက်၌ စတင် ဖွင့်လှစ်ခဲ့သည့် အဆင့်မြင့်ကွန်ပျူတာတက္ကသိုလ် (ဗဟန်း) ကို သတင်းအချက်အလက်နှင့် နည်းပညာ တက္ကသိုလ်ဟူ၍ ဧပြီလ ၁ ရက်မှ စတင်ကာ အမည်ပြောင်းလဲလိုက်ပြီဖြစ်ကြောင်း အဆိုပါ တက္ကသိုလ်မှ ဒုတိယပါမောက္ခချုပ်ဖြစ် သူ ဒေါက်တာစောစန္ဒာအေး က ပြောသည်။

အဆင့်မြင့်ကွန်ပျူတာတက္ကသိုလ်သည် တက္ကသိုလ်ဝင်တန်းစာမေးပွဲ၌ ရမှတ်ပေါင်း ၄၈၀ နှင့်အထက် ရရှိသူများကိုသာ တက်ရောက်ခွင့်ပြုခဲ့သည့် တက္ကသိုလ်တစ်ခုဖြစ်ပြီး လက်ရှိအချိန်၌ ရန်ကုန်ကွန်ပျူတာ တက္ကသိုလ်လက်အောက်မှ ခွဲထွက်၍ ကိုယ်ပိုင်အမည်သစ်ဖြင့် ပြောင်းလဲဖွင့်လှစ်သွားတော့မည်ဖြစ်ကြောင်း ဒေါက်တာစောစန္ဒာအေးက ဆိုသည်။

အစိုးရ၏ ပြုပြင်ပြောင်းလဲရေး လုပ်ငန်းစဉ်အရ ဝန်ကြီးဌာနအသီးသီး၏ လက်အောက်၌ ဖွင့်လှစ်ထားကြသော တက္ကသိုလ်အားလုံးတို့သည် ပညာရေးဝန်ကြီးဌာန လက်အောက်သို့ တစ်စုတစ်ဝေးတည်း ပြောင်းလဲလာရမည်ဖြစ်ပြီး နောင်တစ်ချိန်၌ လွတ်လပ်သော တက္ကသိုလ်များအဖြစ် ပြောင်းလဲ၍ သင်ကြားမှုများနှင့် စီမံမှုများကို စိတ်ကြိုက်လုပ်ဆောင်နိုင်တော့မည်ဟု သိရသည်။

ကျောင်းသား၊ ကျောင်းသူ လူဦးရေ ၅၀၀ ခန့်ကို လက်ခံသင်ကြားပေးနေသည့် အဆင့်မြင့် ကွန်ပျူတာတက္ကသိုလ်သည် သတင်းအချက်အလက် နည်းပညာတက္ကသိုလ်ဟု အမည်ပြောင်းလဲသွား သော်လည်း သင်ကြားမှုများနှင့် ကျောင်းသား၊ ကျောင်းသူ လက်ခံခြင်း ကိစ္စရပ်မှာ ပြောင်းလဲသွားမည် မဟုတ်ကြောင်း ဒေါက်တာစောစန္ဒာအေး က ပြောသည်။

သတင်းအချက်အလက် နည်းပညာတက္ကသိုလ်ကို လက်ရှိအချိန်၌ ယခင် အဆင့်မြင့် ကွန်ပျူတာတက္ကသိုလ်ဖွင့်ခဲ့သည့် ဗဟန်းမြို့နယ်အတွင်း ဆက်လက် ဖွင့်လှစ်သွား မည်ဖြစ်သော်လည်း လာမည့် ပညာသင်နှစ်မှစတင်၍ ရန်ကုန်တက္ကသိုလ် လှိုင်နယ်မြေသို့ ပြောင်းရွှေ့ဖွင့်လှစ်သွားမည်ဟု သိရသည်။

သတင်းအချက်အလက် နည်းပညာတက္ကသိုလ်၌ ကျောင်းသားနှစ်ဦးလျှင် ကွန်ပျူတာတစ်လုံးစီပေးအပ်၍ သင်ကြားမှုများကို လက်တွေ့အနေဖြင့် လုပ်ဆောင်နေသည်ဟု သိရသည်။