တရုတ်နိုင်ငံ ဆင်ဆာဆန့်ကျင်ရေးအဖွဲ့ DDoS တိုက်ခိုက်မှုနှင့် ကြုံတွေ့ခဲ့ရ

11070175_10152792693852825_1074081893228039134_n.jpg

တရုတ်နိုင်ငံ အွန်လိုင်းဆင်ဆာနှင့် ပတ်သက်၍ မကြာသေးမီက ဖော်ပြခဲ့သော Wall Street Journal ၏ ဆောင်းပါးတစ်ပုဒ်တွင် ရည်ညွှန်းဖော်ပြခံခဲ့ရသည့် Greatfire သည် DDoS တိုက်ခိုက်မှုတစ်ရပ်နှင့် ကြုံတွေ့ခဲ့ရကြောင်း သိရသည်။

Greatefire.org သည် သုံးစွဲသူများက Great Firewall ဟု လူသိများသည့် တရုတ်အစိုးရ၏ ဆင်ဆာတားမြစ်ချက်များကို သိရှိနိုင်ရန် ဝက်ဘ်ဆိုက်များနှင့် keyword များကို အသုံးပြုကာ ရှာဖွေနိုင်စေမည့် ဝက်ဘ်ဆိုက်ဖြစ်သည်။ ၎င်းဝက်ဘ်ဆိုက်တွင် Google, Boxun နှင့် microblogging ဝက်ဘ်ဆိုက် Weibo ကဲ့သို့သော နာမည်ကျော် ဝက်ဘ်ဆိုက်များ၏ mirror များ ပါဝင်သောကြောင့် သုံးစွဲသူများက ၎င်းတို့ကို ကန့်သတ်တားမြစ်မှုများ မရှိဘဲ အသုံးပြုနိုင်သည်။

အဆိုပါ ဝက်ဘ်ဆိုက်သည် ၂၀၁၄ ခုနှစ်တွင် Bloomberg ဆောင်းပါးတစ်ပုဒ်၌ ထည့်သွင်းဖော်ပြခံရသည်အထိ အောင်မြင်မှု ရရှိခဲ့သည်။

DDoS တိုက်ခိုက်မှုသည် အင်္ဂါနေ့တွင် စတင်ဖြစ်ပွားခဲ့ပြီး ဆိုက်၏ mirror များထံ တစ်နာရီလျှင် request ၂.၆ ဘီလီယံ ပေးပို့ကာ တိုက်ခိုက်ခဲ့ကြောင်း Greatfire မှ ပြောကြားခဲ့သည်။

Greatfire blog post တွင်မူ မိမိတို့အနေဖြင့် ယခု တိုက်ခိုက်မှုအတွက် တာဝန်ရှိသူကို မသိရှိရသေးကြောင်း၊ သို့သော်လည်း ၎င်းတိုက်ခိုက်မှုသည် ပြီးခဲ့သည့်လအနည်းငယ်က မိမိတို့၏ အဖွဲ့အစည်းအပေး ဖိအားပေးမှုများ တိုးမြှင့်ပြုလုပ်ချိန်နှင့် တိုက်ဆိုင်နေကြောင်း၊ တရုတ်နိုင်ငံ၏ ကွန်ပျူတာဆက်သွယ်မှု အုပ်ချုပ်ရေးအဖွဲ့ (CAC) က မိမိတို့ ဝက်ဘ်ဆိုက်ကို တရုတ်အဖွဲ့အစည်းကို ဆန့်ကျင်သည့် ပြည်ပမှ တည်ထောက်ထားသည့် ဝက်ဘ်ဆိုက်တစ်ခုဟု ခေါ်ဆိုခဲ့ကြောင်း၊ CAC က မိမိတို့နှင့် လက်တွဲဆောင်ရွက်နေသည့် အိုင်တီကုမ္ပဏီများကို လက်တွဲဆောင်ရွက်မှု ရပ်ဆိုင်းရန် ဖိအားပေးခဲ့ကြောင်း၊ မကြာသေးမီက မိမိတို့၏ encrypt လုပ်ထားသော အီးမေးလ်များကို ကြားဖြတ်ရယူရန် တစ်စုံတစ်ယောက်က ကြိုးပမ်းခဲ့သည်ကို သတိပြုမိကြောင်း ဖော်ပြခဲ့သည်။

Ref: PCMag