တရားမဝင် အသုံးပြုနေသည့် Spectrum များကို စစ်ဆေး တွေ့ ရှိသည်ဟုဆို

20150116_090156.jpg

တရားမဝင် အသုံးပြုနေသည့် Spectrum များကို လိုက်လံစစ်ဆေးလျက်ရှိကြောင်း၊ လတ်တလော စစ်ဆေးချက်များအရ ရန်ကုန်နှင့် မန္တလေးမြို့ကြီးများ၌ တရားမဝင် အသုံးပြုနေသည့် Spectrum များကို စစ်ဆေးတွေ့ရှိခဲ့ကြောင်း သိရသည်။

“တရားမဝင် အသုံးပြုနေတာတွေ တွေ့တယ်။ ဘာတွေတွေ့လဲ ဆိုတာကတော့ အရေးယူရမယ့် ကိစ္စရပ်တွေရှိနေတော့ ထုတ်ပြီးမပြောသင့်သေးဘူး။ အရေးယူတယ်ဆိုတဲ့နေရာမှာ ဆက်သွယ်ရေး ဥပဒေထဲမှာ ပါတဲ့အတိုင်းပဲ လုပ်ဆောင်ရမှာပါ” ဟု ဆက်သွယ်ရေးညွှန်ကြားမှုဦးစီးဌာနမှ ညွှန်ကြားရေးမှူး ဦးသန်းထွန်းအောင်က ပြောသည်။

Spectrum နှင့်ပတ်သက်၍ အများပြည်သူ အသုံးပြုနိုင်ရန် Wifi စနစ်နှင့် Bluetooth Device များကို ခွင့်ပြုထားပြီး ဖြစ်သော်လည်း သုံးစွဲခွင့်မရှိသည့် Frequency များကို မိုဘိုင်း ကွန်ရက်များ အတွင်းမှ ဝင်ရောက်၍ Walki Talki နှင့် Tow- Way Radio များ အသုံးပြုနေသည်ကို စစ်ဆေးတွေ့ရှိခဲ့ရကြောင်း သိရသည်။

Spectrum နှင့်ပတ်သက်၍ ငှားရမ်းအသုံးပြုခများနှင့် အသုံးပြုရန် အသေးစိတ် အချက်အလက်များကို နည်းဥပဒေဖြင့် ပြဋ္ဌာန်းသွားမည်ဖြစ်ပြီး အဆိုပါနည်းဥပဒေသည် လက်ရှိအချိန်၌ မူကြမ်း အဖြစ် ရေးဆွဲပြီးစီးခဲ့ပြီ ဖြစ်ကြောင်း ဆက်သွယ်ရေးညွှန်ကြားမှု ဦးစီးဌာနက သတင်းထုတ်ပြန်သည်။

လက်ရှိအချိန်၌ Spectrum ငှားရမ်းအသုံးပြုခအနေဖြင့် တယ်လီကွန်း အော်ပရေတာများဖြစ်ကြသည့် Ooredoo နှင့် Telenor နှစ်ခုတည်းကိုသာ အစိုးရအနေဖြင့် ငွေကြေးကောက်ခံထားပြီး အခြားသော ဆက်သွယ်ရေး အော်ပရေတာများနှင့် ဆက်သွယ်ရေးလုပ်ငန်း လုပ်ကိုင်နေသူများကို Spectrum အသုံးပြုခ ကောက်ခံထားခြင်းမရှိသေးကြောင်း ဦးသန်းထွန်းအောင်က ပြောသည်။

Spectrum နည်းဥပဒေကို ပြဋ္ဌာန်းနိုင်ရန်အတွက် ဆက်သွယ်ရေး ညွှန်ကြာမှုဦးစီးဌာနသည် ရှေ့နေချုပ်ရုံးနှင့် ဆက်လက်ညှိနှိုင်း ဆောင်ရွက်နေသည်ဟု သိရပြီး အဆိုပါ နည်းဥပဒေကို ITU အဖွဲ့အစည်းအပြင် အခြားသော နိုင်ငံတကာ အဖွဲ့အစည်းများမှ သတ်မှတ်ထားသည့် စံသတ်မှတ်ချက်များနှင့် ကိုက်ညီမှုရှိအောင် ရေးဆွဲထားသည်ဟု သိရသည်။