အွန်လိုင်းမှ လုပ်ငန်းဆိုင်ရာ လိုင်စင် လျှောက်ထားမှုများ မြို့နယ်သုံးဆယ်ကျော် ရရှိလာ

Untitled.jpg

အွန်လိုင်းမှ လုပ်ငန်းဆိုင်ရာ လိုင်စင် လျှောက်ထားမှုများကို မြို့နယ်သုံးဆယ်ကျော်မှ ဆောင်ရွက်နိုင်ပြီ ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီမှ သိရသည်။

အရှေ့ပိုင်း ခရိုင်တွင် တောင်ဥက္ကလာပ၊ ဒဂုံဆိပ်ကမ်း၊ ဒဂုံတောင်၊ ဒဂုံမြောက်၊ ဒဂုံအရှေ့၊ မြောက်ဥက္ကလာပ၊ သင်္ဃန်းကျွန်း တို့၌လည်းကောင်း၊ အနောက်ပိုင်း ခရိုင်တွင် ကျောက်တံတား၊ စမ်းချောင်း၊ ဒဂုံ၊ ပန်းဘဲတန်း၊ ဗဟန်း၊ လမ်းမတော်၊ လသာ၊ အလုံ၊ ကြည့်မြင်တိုင် တို့၌လည်းကောင်း၊ မြောက်ပိုင်းခရိုင်တွင် ကမာရွတ်၊ မင်္ဂလာဒုံ၊ မရမ်းကုန်း၊ ရွှေပြည်သာ၊ လှိုင်၊ လှိုင်သာယာ၊ အင်းစိန် တို့၌လည်းကောင်း၊ တောင်ပိုင်းခရိုင်တွင် ဆိပ်ကြီးခနောင်တို၊ တာမွေ၊ ဒလ၊ ပုဇွန်တောင်၊ ဗိုလ်တထောင်၊ ရန်ကင်း၊ သာကေတ၊ မင်္ဂလာတောင်ညွှန့်၊ ဒေါပုံ တို့၌လည်းကောင်း ဆောင်ရွက်နိုင်ပြီ ဖြစ်ကြောင်း သိရသည်။

လုပ်ငန်းဆိုင်ရာ လိုင်စင်များ ကို ၂၀၁၃ နိုဝင်ဘာလမှ စတင်ကာ ဆောင်ရွက် ပေးခဲ့ခြင်းဖြစ်ပြီး မြို့နယ်များ တိုးချဲ့ခဲ့ခြင်း ဖြစ်သည်။ လုပ်ငန်းလိုင်စင် လျှောက်ထားရန်အတွက် လုပ်ငန်းလိုင်စင် ဖောင်ကို www.ycdc.gov.mm တွင်ရယူနိုင်ပြီး အဆိုပါ နေရာမှ လျှောက်ထားနိုင်မည် ဖြစ်သည်။ လျှောက်ထားသည့် အချက်အလက် စုံလင်မှုအပေါ် မူတည်၍ ကြာမြင့်ချိန် ကွာခြားနိုင်ကြောင်း သိရသည်။ လုပ်ငန်းတည်နေရာ၊ လုပ်ငန်းဆိုင်ရာ အချက်အလက်၊ လုပ်ငန်းရှင် အချက်အလက် အစရှိသည်တို့ကို ဖြည့်စွက်လျှောက်ထား ရမည်ဖြစ်ကြောင်း သိရသည်။ လိုအပ်သည့် စာရွက်စာတမ်းများ တွဲပို့ရန်နေရာတွင် သက်ဆိုင်ရာ အချက်အလက်များကို ဖြည့်စွက်ပေးပို့ ရမည်ဖြစ်သည်။

လုပ်ငန်းလိုင်စင် အပြင် အစားအသောက်လိုင်စင်၊ တည်းခိုခန်း လိုင်စင်၊ ဘော်ဒါဆောင် လိုင်စင်၊ ယာဉ်ဖြင လှည့်လည် ရောင်းချခွင့် လိုင်စင်၊ ကိုယ်ပိုင်ဈေးလိုင်စင်၊ ယာယီဇာတ်ရုံ ပါမစ်တို့ကိုလည်း လျှောက်ထားနိုင်မည် ဖြစ်ကြောင်းသိရသည်။

-ထွန်းထွန်း