ကန်ဒေါ်လာ ၈၄၈ သန်း အသုံးပြု၍ ဆိုလာစက်ရုံ တည်ဆောက်ရန် Apple စီစဉ်

duratrack.jpg

ပြီးခဲ့သည့်ရက် အနည်းငယ်ခန့်က Apple သည် ကယ်လီဖိုး နီးယားပြည်နယ် မွန်တာရေးဒေသတွင် First Solar ကုမ္ပဏီနှင့် ပူးပေါင်း၍ မြေဧက ၁,၃၀၀ ၌ ကန်ဒေါ်လာ ၈၄၈ သန်းအသုံးပြု၍ အကြီးမားဆုံး ဆိုလာစက်ရုံ တည်ဆောက်သွားရန် စီစဉ်ထားကြောင်း ကုမ္ပဏီ၏ အမှုဆောင် အရာရှိချုပ် တင်မ်ကွတ်က ပြောဆိုခဲ့သည်။

အဆိုပါစက်ရုံမှ ထွက်ရှိသော စွမ်းအင်သည် Apple ၏ကယ်လီဖိုးနီးယားပြည်နယ် ကူပါတီနိုရှိ ရုံးချုပ်၊ နယူးဝါ့ခ်မြို့ရှိ data စင်တာအပြင် ကယ်လီဖိုးနီးယားရှိ Apple ရုံးနှင့် စတိုး ၅၂ ခုကိုလည်း ထောက်ပံ့ပေးသွား မည်ဖြစ်သည်။ ထို့အပြင် Apple ကုမ္ပဏီအတွက် အရေးပါသည့် စွမ်းအင်သုံးစွဲမှုကိုလည်း သက်သာစေမည်ဖြစ်ကြောင်း တင်မ်ကွတ်က ပြောကြားခဲ့သည်။ ၎င်းဆိုလာ စီမံကိန်းသည် မွန်တာရေး ဒေသရှိမြေဧက ၇၃,၀၀၀ ပေါ်တွင် တည်ဆောက်မည့် ကယ်လီဖိုးနီယား မြေယာစီမံကိန်းမှ အစီအစဉ် တစ်စိတ်တစ်ပိုင်း ဖြစ်သည်။ အဆိုပါ ဆိုလာစီမံကိန်းသည် ကယ်လီဖိုးနီးယား ပြည်နယ်သို့ ဆိုလာစွမ်းအင် မီဂါဝပ် ၁၃၀ အထိ ထုတ်လုပ်ပေးမည်ဖြစ်ပြီး ပြည်နယ်အတွင်းရှိ အိမ်အလုံးရေ ၅၀,၀၀၀ ကိုစွမ်းအင် လုံလောက်စွာ ပေးနိုင်မည်ဖြစ်သည်။ ကမ္ဘာ့အကြီးဆုံး ဆိုလာစက်ရုံကို ကယ်လီဖိုးနီးယား ပြည်နယ်တောင်ပိုင်းတွင် တည်ဆောက်သွားမည် ဖြစ်ကြောင်း သတင်းများ ထွက်ပေါ်လာပြီးနောက် First Solar ကုမ္ပဏီ၏ရှယ်ယာ ဈေးနှုန်းမှာလည်း မြင့်တက်လာခဲ့သည်။

အမေရိကန် ပြည်ထဲရေးဝန်ကြီး ဆယ်လီဂျူဝဲလ်သည် ကယ်လီဖိုးနီးယားပြည်နယ် Joshua Tree ပြည်သူ့ရင်ပြင် အနီးရှိ Desert စင်တာတွင် ကျင်းပခဲ့သည့် ၅၅၀ မီဂါဝပ်အထိ စွမ်းအင်ထုတ်လုပ်ပေးမည့် Desert  Sunlight  စီမံကိန်းအခမ်းအနားကို ဖွင့်လှစ်ပေးခဲ့သည်။ First Solar ကုမ္ပဏီမှ တည်ဆောက်မည့် ၎င်းစီမံကိန်းသည်လည်း ကယ်လီဖိုးနီးယား ပြည်နယ်ရှိ အိမ်ရာ ၁၆၀,၀၀၀ ကိုစွမ်းအင် လုံလောက်စွာ ပေးနိုင်ကြောင်း သိရှိရသည်။

Ref: USAToday