ချစ်သူခင်သူများအား အပေးချင်ဆုံး ကားအမျိုးအစားအကြောင်း motors.com.mm မှ စစ်တမ်းကောက်ယူ

10448787_615927645185989_4946733546870049045_n.jpg

ချစ်သူခင်သူများအား အပေးချင်ဆုံး ကားအမျိုးအစားအကြောင်း motors.com.mm မှ စစ်တမ်းကောက်ယူ လိုက်ကြောင်း သိရသည်။

၂၀၁၅ ခုနှစ် ချစ်သူများနေ့အတွက် ပျော်ရွှင်ဖွယ်ရာ အစီအစဉ်အဖြစ် ချစ်သူများနေ့ စစ်တမ်းကောက်ယူမှုကို Motors.com.mm က ပြုလုပ်ခဲ့ခြင်းဖြစ်သည်။ ချစ်သူများနေ့တွင် မိမိ၏ချစ်သူ၊ ခင်သူအား လက်ဆောင်အဖြစ် အပေးချင်ဆုံး ကားအမျိုးအစားအကြောင်းကို အဓိကထား မေးမြန်းခဲ့ရာတွင် Motors.com.mm ၏ ချစ်သူများနေ့ အထူးစစ်တမ်းအရ ဖြေဆိုသူ ၃၁ ရာခိုင်နှုန်းက ဂျာမန်ထုတ် ဇိမ်ခံကား BMW 3 Series ကို ရွေးချယ်ခဲ့ကြကြောင်းသိရသည်။ BMW 3 Series ကို ရွေးချယ်ရသည့် အကြောင်းအရင်းမှာ ဇိမ်ခံကား အမျိုးအစားဖြစ်ခြင်း၊ အဆင့်မြင့် ဘေးကင်းလုံခြုံရေး စနစ်များပါဝင်ခြင်း၊ အရည်အသွေး ကောင်းမွန်ခြင်းကြောင့်ဟု ဖြေဆိုကြသည်ဟု ဆိုသည်။

လက်ဆောင်အဖြစ် အပေးချင်ဆုံး ဒုတိယမြောက်ကားအဖြစ် ဂျပန်ကားတစ်စီးဖြစ်သည့် Honda CR-V ကို ရွေးချယ်ခဲ့ကြကြောင်း၊ Honda CR-V သည် လမ်းအမျိုးအစားမရွေး အသုံးပြုနိုင်ခြင်း၊ အရွယ်အစား ကြီးမားသော သာမန် SUV များထက် အနည်းငယ်သေးငယ်သည့်အတွက် မိန်းကလေးအချို့၏ နှစ်သက်မှုကို ရရှိထားခြင်းကြောင့် ရွေးချယ်ခြင်းဖြစ်ကြောင်း ဖြေဆိုထားသည်။ ကမ္ဘာကျော် ပြိုင်ကား Ferrari LaFerrari ကို ဖြေဆိုသူ ၉ ရာခိုင်နှုန်းက တတိယမြောက်လက်ဆောင် အပေးချင်ဆုံး ကားအဖြစ် ရွေးချယ်ကြပြီး နာမည်ကြီး ပြိုင်ကားဖြစ်သောကြောင့် လက်ဆောင်မပေးချင်ဘဲ ကိုယ်တိုင်သာ မောင်းနှင်ချင်ကြောင်း ဖြေဆိုသူအများစုက မှတ်ချက်ပြုသည်ဟု သိရသည်။

ပူးတွဲတတိယမြောက်လက်ဆောင် အပေးချင်ဆုံးကားအဖြစ် ဖြေဆိုသူ ၉ ရာခိုင်နှုန်းက ၂၀၁၄ ခုနှစ်၏ ရောင်းအားအကောင်းဆုံး ကားဖြစ်သည့် Toyota Corolla ကို ရွေးချယ်ခဲ့ကြကြောင်း သိရသည်။ အခြား အမျိုးအစားများထက် ဆီစားသက်သာခြင်း၊ ငွေကြေးချွေတာနိုင်ခြင်း၊ မြန်မာနိုင်ငံ၏ ဈေးကွက်အနေအထားနှင့် ကိုက်ညီခြင်းကြောင့် ရွေးချယ်ရခြင်းဖြစ်ကြောင်း အများစုက ဖြေဆိုကြသည် ဟုဆိုသည်။ ချစ်သူများနေ့ စစ်တမ်းကို Offline/Online ပုံစံနှစ်မျိုးဖြင့် ပြုလုပ်ခဲ့ပြီး ဖြေဆိုသူဦးရေ ၂၀၀ ကျော်က ဖြေဆိုခဲ့ကြောင်း၊ ကမ္ဘာကျော် ပြိုင်ကား Ferrari LaFerrari ၊ ဂျာမန်ထုတ် ဇိမ်ခံကား BMW 3 Series ၊ ဂျပန် SUV ကားတစ်စီးဖြစ်သည့် Honda CR-V ၊ ၂၀၁၄ ခုနှစ်၏ ရောင်းအားအကောင်းဆုံးကားဖြစ်သည့် Toyota Corolla တို့ကို စံအဖြစ်ထားရှိ ရွေးချယ်စေခဲ့ကြောင်း သိရသည်။

အဆိုပါစစ်တမ်းကို အမျိုးသား ၈၀ ရာခိုင်နှုန်း၊ အမျိုးသမီး ၂၀ ရာခိုင်နှုန်းက ဖြေဆိုခဲ့ပြီး အသက် (၂၀ -၂၅) နှစ်အတွင်း ဖြေဆိုသူ ၃၀ ရာခိုင်နှုန်း၊ အသက် (၂၅ – ၃၀) နှစ်အတွင်း ဖြေဆိုသူ ၂၇ ရာခိုင်နှုန်း၊ အသက် (၃၀ – ၃၅) နှစ်အတွင်း ဖြေဆိုသူ ၂၅ ရာခိုင်နှုန်း၊ အသက် ၄၀ အထက် ဖြေဆိုသူ ၁၀ ရာခိုင်နှုန်းနှင့် အသက် (၂၀) နှစ်အောက် ဖြေဆိုသူ ၈ ရာခိုင်နှုန်းရှိကြောင်း သိရသည်။