အမုန်းစကားများအတွက် Google နှင့် Facebook တို့ တာဝန်ယူမှု ရှိစေချင်ဟု ပြင်သစ် ထုတ်ပြန်

france.jpg

ပြင်သစ်အစိုးရသည် အစွန်းရောက်ပြောဆိုမှုများနှင့် ပတ်သက်နေသည့် ဝက်ဘ်ဆိုက်ကုမ္ပဏီများကို တာဝန်ယူမှုရှိလာအောင် ပြုလုပ်ပေးမည့် အစီအစဉ်တစ်ခုကို ထုတ်ပြန်သွားခဲ့ကြောင်း Bloomberg မှဖော်ပြခဲ့သည်။

ပြင်သစ်သမ္မတ ဖရန့်ဆွာဟော်လန်ဒီက လူမှုရေးမီဒီယာသုံးစွဲသူများသည် အစိုးရသို့ဦးတည်၍ အစွန်းရောက် အကြောင်းအရာများကို အွန်လိုင်းတွင် တင်သည့်အခါ ၎င်းလုပ်ရပ်အတွက် Google နှင့် Facbook ကဲ့သို့ ကုမ္ပဏီများတွင် တာဝန်ရှိစေမည့် ဥပဒေတစ်ရပ်ကို တင်သွင်းလိုနေကြောင်း သိရသည်။

ပြီးခဲ့သည့် ရက်အနည်းငယ်က ထုတ်ပြန်ခဲ့သည့် ကြေညာချက်တွင် ဟော်လန်ဒီက  “ကျွန်တော်တို့အနေနဲ့ တရားဥပဒေဆိုင်ရာ လူမှုအဆောက်အုံကိုဖန်တီးဖို့ ဥရောပနဲ့ နိုင်ငံတကာအဆင့်ရှိ ဥပဒေတွေပြဋ္ဌာန်းဖို့ လုပ်ဆောင် ရပါမယ်။ ဒါမှပဲ လူမှုရေးမီဒီယာတွေပါဝင်တဲ့ အင်တာနက် platform များဟာ တာဝန်ယူ ရှိလာပြီး အရေးယူ ပိတ်ဆို့မှုတွေလည်းပြုလုပ်လို့ရမှာပဲ” ဟုပြော ကြားသွားခဲ့သည်။ ပြင်သစ်ပြည်ထဲရေးဝန်ကြီးဖြစ်သူ ဘားနတ်ကာ ဇန်နာဗီသည်လည်း Google, Microsoft, Facebook နှင့် Twitter အကြီးအကဲများနှင့်အတူ ယခုအဆိုပြုချက်ကို ဆွေးနွေးရန် အမေရိကန်သို့သွားရောက်မည် ဖြစ်သည်။

အဆိုပါကြေညာချက်သည် ပြင်သစ်သရော်စာ မဂ္ဂဇင်းတိုက် ချာလီဟတ်ဘိုတွင်ဖြစ်ပွားခဲ့သော အကြမ်းဖက်တိုက်ခိုက်မှုများ အပြီး ထွက်ပေါ်လာခြင်းဖြစ်သည်။ ထို့အပြင် ပြင်သစ်နိုင်ငံသည် လူမှုရေး မီဒီယာများကို တင်းတင်းကျပ်ကျပ် စောင့်ကြည့်သွားမည့် အကြမ်းဖက်မှု တိုက်ဖျက်ရေး အဆိုပြုချက်များကို အတည်ပြုရန် ကြိုးပမ်းနေသည်။

ပြင်သစ်နိုင်ငံရှိ နိုင်ငံရေးသမားများသည် လတ်တလောတွင် ဖြစ်ပွားခဲ့သော အကြမ်းဖက်တိုက်ခိုက်မှုမှ ဝမ်းနည်းစရာ အဖြစ်အပျက်များကိုတုံ့ပြန်သည့်အနေဖြင့် ဥရောပမျိုးချစ်စိတ်ဓာတ်ဆိုင်ရာ အက်ဥပဒေကို အပူတပြင်းပြဋ္ဌာန်းလိုနေသည်။ ထိုလုပ်ရပ်သည် အမေရိကန်နိုင်ငံ၌ စက်တင်ဘာ ၁၁ရက်တိုက်ခိုက်မှုများအပြီး အစိုးရကအကြမ်းဖက်မှုတိုက်ဖျက်ရေး ဥပဒေများပြုလုပ်သည့် အလားတူဖြစ်ရပ်နှင့်ဆင်တူလျက်ရှိသည်။

Ref: TheVerge