အဝေးသင်တက္ကသိုလ် စာမေးပွဲ အောင်ချက် ရာခိုင်နှုန်း နည်းမည်

YUDE.jpg

ရန်ကုန်အဝေးသင်တက္ကသိုလ် စာမေးပွဲ အောင်ချက်ရာခိုင်နှုန်းမှာ ယခင်နှစ်များထက် နည်းပါးသွားမည်ဖြစ်ပြီး ယခု နှစ်တွင် ၇၀ ရာခိုင်နှုန်းသာရှိမည်ဖြစ်ကြောင်း ရန်ကုန် အဝေးသင်တက္ကသိုလ် ပါမောက္ခချုပ် ဒေါက်တာလှတင့်က ပြောကြားခဲ့သည်။

၂၀၁၄-၂၀၁၅ ပညာသင်နှစ်မှ စတင်၍ အဝေးသင် ပညာရေးစနစ်အား သင်ကြားပို့ချသူ အရည်အသွေး မြှင့်ထားခြင်းနှင့် ကျောင်းသား၊ ကျောင်းသူများ၏ သင်ယူမှု စွမ်းရည်မြှင့်တင်ထားခြင်း တို့ကြောင့် အရည်အချင်းတစ်ခု သတ်မှတ်ထားပြီး စာမေးပွဲတွင် သတ်မှတ်ရမှတ်များ မရရှိပါကရှုံးနိမ့်မည်ဖြစ်ကြောင်း သိရသည်။

“အောင်ချက်က ဒီနှစ်နည်းပါတယ်။ တကယ် ထိုက်ထိုက်တန်တန် ရမှတ်ရတဲ့သူတွေပဲ အောင်မြင်မှာပါ။ ၇၀ ရာခိုင်နှုန်း ပတ်ဝန်းကျင် အောင်ချက်ရှိပါတယ်။ အရင်နှစ်တွေကတော့ ၈၀ ရာခိုင်နှုန်း၊ ၉၀ ရာခိုင်နှုန်း ရှိပါတယ်” ဟု ဒေါက်တာလှတင့်က ပြောကြားခဲ့သည်။

ယခုနှစ် ရန်ကုန်အဝေးသင်တက္ကသိုလ်စာမေးပွဲ စာမေးပွဲအောင်စာရင်းများကို ဖေဖေါ်ဝါရီလ ဒုတိယ ပတ်တွင် ထုတ်ပြန် ကြေညာသွားမည် ဖြစ်ကြောင်း သိရှိရသည်။