မိုဘိုင်းဖုန်းပေါ်မှ ငွေလွှဲပို့နိုင်သည့် ဝန်ဆောင်မှု ယခုနှစ်အတွင်း စတင်နိုင်ရန် Ooredoo Myanmar စီစဉ်

Update News_5_10.jpg

ပြည်တွင်းအခြေစိုက် ကာတာဆက်သွယ်ရေးကုမ္ပဏီ Ooredoo Myanmar သည် ၎င်းတို့၏ သုံးစွဲသူများ အတွက် မိုဘိုင်းဖုန်းပေါ်မှတစ်ဆင့် ငွေလွှဲခြင်း၊ ငွေပို့ခြင်းများကို ဆောင်ရွက်နိုင်မည့် Mobile Money ဝန်ဆောင်မှုသစ်တစ်ရပ်ကို ယခုနှစ်အတွင်း စတင်ပေးသွားမည်ဖြစ်ကြောင်း သတင်းရရှိသည်။

အဆိုပါ ပြည်ပဆက်သွယ်ရေးကုမ္ပဏီသည် Ooredoo ဆင်းမ်ကတ် သုံးစွဲသူများအနေဖြင့် တစ်ဦးနှင့် တစ်ဦး အပြန်အလှန် မိုဘိုင်းဖုန်းမှတစ်ဆင့် ငွေကြေးလွှဲပြောင်းပေးနိုင်မည့် အဆိုပါ ဝန်ဆောင်မှုကို ပေးနိုင်ရန်အတွက် ဗဟိုဘဏ်၏ ခွင့်ပြုချက်ကို စောင့်ဆိုင်းနေကြောင်း သိရသည်။

Mobile Money ဝန်ဆောင်မှုကို အသုံးပြုလိုသူများသည် ဘဏ်တွင် ကိုယ်ပိုင်စာရင်းနံပါတ်တစ်ခု ရှိရန်မလိုအပ်ဟု သိရသည်။

“သုံးစွဲသူတွေအနေနဲ့ ဘဏ် account တစ်ခု သီးသန့်ရှိစရာ မလိုပါဘူး။ ဘဏ်နဲ့ ချိတ်ဆက်တဲ့အပိုင်းကို Ooredoo Myanmar ဘက်က ဆောင်ရွက်မှာဖြစ်ပါတယ်” ဟု အဆိုပါ ဆက်သွယ်ရေးကုမ္ပဏီ၏ လူမှုဆက်ဆံရေးနှင့် ပြန်ကြားရေး အကြီးတန်းမန်နေဂျာ ဒေါ်သီရိကြာညိုက ပြောကြားသည်။

အဆိုပါ Mobile Money ဝန်ဆောင်မှုကို အသုံးပြုသူများသည် အဆိုပါ ဝန်ဆောင်မှုပေါ်မှတစ်ဆင့် မိမိ လက်ခံရရှိမည့် အီလက်ထရွန်နစ် ငွေသားကို ငွေသားအစစ်ဖြင့် နီးစပ်ရာ ကိုယ်စားလှယ်များထံတွင် သွားရောက် ထုတ်ယူနိုင်မည့်စနစ် ဖြစ်သည်။

Ooredoo Mobile Money ဝန်ဆောင်မှုသည် မိုဘိုင်းဖုန်းမှ စာတိုတစ်စောင်ပေးပို့သည့် အချိန်မျှသာ ကြာမြင့်မည်ဖြစ်ပြီး နိုင်ငံအတွင်း မည်သည့်နေရာတွင် နေထိုင်သူမဆို အသုံးပြုနိုင်မည် ဖြစ်သည်။ ထိုကဲ့သို့ နေရာမရွေး အသုံးပြုနိုင်ရန်အတွက် Ooredoo Myanmar ဆက်သွယ်ရေးကုမ္ပဏီအနေဖြင့် ၎င်းတို့၏ ကွန်ရက်ဖြန့်ကြက်မှုများကို နေ့စဉ်လုပ်ဆောင်နေကြောင်း သိရသည်။

အဆိုပါ မိုဘိုင်းဖုန်းပေါ်မှ ငွေလွှဲပို့ခြင်း ဝန်ဆောင်မှုအတွက် ကုမ္ပဏီအနေဖြင့် Mobile Money အရောင်းကိုယ်စားလှယ်များကို စတင်ခန့်အပ်နေပြီ ဖြစ်သည်။