ရန်ကုန်အဝေးသင်တက္ကသိုလ် ဝက်ဘ်ဆိုက် ထုတ်လွှင့်

UDE1.jpg

ရန်ကုန်အဝေးသင်တက္ကသိုလ်၏ ဝက်ဘ်ဆိုက်ဖြစ်သော www.yude.edu.mm ကို ၂၀၁၅ ခုနှစ်၊ ဇန်န၀ါရီလ ၁ ရက်နေ့မှစတင်ကာ သင်ခန်းစာပို့ချချက်များကို လွှင့်တင်ခဲ့ကြောင်း သိရသည်။

အဆိုပါဝက်ဘ်ဆိုက်တွင် အဝေးသင်တက္ကသိုလ်များ၏ သင်ခန်းစာပို့ချချက်များကို IPTV (Internet Protocol Television System) ဖြင့် ၂၄ နာရီ ထုတ်လွှင့်လျက် ရှိသည်။ ကျောင်းသားကျောင်းသူများ အနေဖြင့် သက်ဆိုင်ရာ ဘာသာရပ်များကို ဝက်ဘ်ဆိုက်တွင် သင်ယူလေ့လာနိုင်ပြီး အထူးပြုဘာသာသုံးခု၏ သင်ခန်းစာ အသစ်များကို နံနက် ၉ နာရီမှ ညနေ ၅ နာရီထိ ထုတ်လွှင့်ပေးမည်ဖြစ်ပြီး ညနေ ၅ နာရီမှ နံနက် ၉ နာရီ ထိပြန်လည်ထုတ်လွှင့်ပေးသွားမည်ဖြစ်သည်။ ဝက်ဘ်ဆိုက်တွင် ပညာသင် ဆု လျှောက်ထားခြင်း၊ စာမေးပွဲအချိန် စာရင်းများ၊ အောင်စာရင်းများ၊ ဘွဲ့နှင်းသဘင်အခမ်းအနားများ၊ သင်တန်းများကိုလည်း အချိန်နှင့်တပြေးညီ ဖော်ပြပေးထား မည် ဖြစ်သည်။
၎င်းဝက်ဘ်ဆိုက်အား Laptop ဖြင့်သာမက မည်သည့်ဖုန်းအမျိုးအစားနှင့်မဆို ဝင်ရောက်ကြည့်ရှုနိုင်မည် ဖြစ်သည်။

အဝေးသင်တက္ကသိုလ် ကျောင်းသားကျောင်းသူများ တိုက်ရိုက် သင်ကြားမှု ရရှိနိုင်ရန် အတွက် ၂၄ နာရီသင်ခန်းစာပို့ချချက်များကို ထုတ်လွှင့်ပေးခြင်းဖြစ်ပြီး နိုင်ငံတကာ အဝေးသင် တက္ကသိုလ်များနည်းတူ ခေတ်မီနည်းပညာကို အသုံးပြုပြီး သင်ကြားပို့ချနေခြင်းအား ပြသနိုင်ရန်အတွက် IPTV စနစ်ကို အသုံးပြုထုတ် လွှင့်ခြင်းဖြစ်ကြောင်း ရန်ကုန် အဝေးသင်တက္ကသိုလ် ပါမောက္ခချုပ် ဒေါက်တာ လှတင့်ကပြောသည်။

” မြန်မာ့ဆက်သွယ်ရေး ဟံသာဝတီမှာ ဆာဗာသုံးလုံးတပ်ဆင်ထားတယ်။ အဝေးသင်တက္ကသိုလ်မှာလည်း သုံးလုံးတပ်ထားတယ်။ ဆာဗာတစ်ခုခုချို့ယွင်းပျက်စီးသွားတဲ့အခါ အခြားတစ်လုံးကိုအစားထိုးတပ်ဆင်ပြုပြင် နိုင်အောင်ပါ။ ဝက်ဘ်ဆိုက်အကြာကြီး မရပ်ဆိုင်းဘဲ ဆက်ပြီး ထုတ်လွှင့်နိုင်အောင်စီစဉ်ထားတယ်” ဟု Winner Company နည်းပညာမန်နေဂျာ ဦးကျော်ကျော်ဝင်းက ပြောသည်။

မြန်မာ့အသံရုပ်မြင်သံကြားမှ နေ့စဉ် ထုတ်လွှင့်လျှက်ရှိသည့် ၁၅ မိနစ်စာ အဝေးသင် သင်ခန်းစာ ပို့ချချက်များသည် ကျောင်းသားကျောင်းသူများအတွက် မလုံလောက်သည့် အတွက် နိုင်ငံတကာ အဝေးသင်တက္ကသိုလ်များအတိုင်း ထိုဝက်ဘ်ဆိုက်မှ တစ်ဆင့် သင်ခန်းစာများကို ထုတ်လွှင့်ခြင်း ဖြစ်ကြောင်း သိရသည်။