နည်းပညာကို အခြေခံ၍ လူမှုအကျိုးပြုလုပ်ငန်းများ လုပ်ကိုင်ရန် Center For Civic Technology ကို ဖွဲ့စည်း

Update News_5.jpg

အိုင်တီနည်းပညာများကို အသုံးပြု၍ လူမှုအကျိုးပြုလုပ်ငန်းများ လုပ်ကိုင် ဆောင်ရွက်နိုင်ရန် ပြည်တွင်းရှိ အိုင်စီတီပညာရှင်များ ပူးပေါင်း၍ Center For Civic Technology ဟူသော အဖွဲ့ကို ဖွဲ့စည်းခဲ့သည်ဟု သိရသည်။

လက်ရှိ အချိန်၌ အဆိုပါ အဖွဲ့သည် Clean Up My City ဟူသော ဝက်ဘ်ဆိုက်တစ်ခုကို မိတ်ဆက်ပေးနိုင်ရန် စီစဉ်နေပြီး စိတ်တူကိုယ်တူ လူအများစုပေါင်း၍ ဒေသတွင်း အကျိုးပြု လုပ်ငန်းများ လုပ်ကိုင်သွားရန် စီစဉ်ထားသည်ဟု Center for Civic အဖွဲ့ဝင်တစ်ဦးဖြစ်သူ ကိုကိုရဲက ဆိုသည်။

“လူထုကို အခြေပြုတဲ့ သဘောပါ။ ဥပမာ – ဘယ်နေရာမှာတော့ လူတွေစုပြီး အမှိုက်ကောက်ကြမယ် ဆိုတာမျိုးတွေပေါ့။ ဒါကို နောက် သုံးလလောက်ကြာရင်တော့ မိတ်ဆက်ပေးနိုင်မှာပါ”ဟု Clean Up My City နှင့် ပတ်သက်၍ ကိုကိုရဲက ဆိုသည်။

Center For Civic အဖွဲ့ကို လွန်ခဲ့သည့် ခြောက်လခန့်က စတင်ဖွဲ့စည်းခဲ့ခြင်းဖြစ်ပြီး လက်ရှိအချိန်၌ Fix my street ဟူသော လူမှုအကျိုးပြု အစီအစဉ်တစ်ခုကိုလည်း အကောင်အထည် ဖော်ဆောင်နိုင်ရန် ကြိုးပမ်းနေသည်ဟု သိရသည်။ Fix my street သည် လူအများဝင်ရောက် အသုံးပြုနိုင်သည့် ဝက်ဘ်ဆိုက် စာမျက်နှာ တစ်ခုဖြစ်ပြီး လူမူ အကျိုးပြုသည့် ကိစ္စရပ်များကို နည်းပညာ ကြားခံ၍ သက်ဆိုင်ရာအဖွဲ့အစည်းထံ သတင်းအချက်အလက် ပေးပို့ခြင်းဖြစ်သည်ဟု သိရသည်။

“ဓာတ်တိုင်တွေလဲနေတာမျိုးကို သတင်းတင်မယ်ဆိုရင် လျှပ်စစ်ဌာနဆီကို ချက်ချင်း ရောက်သွားတာမျိုး၊ အမှိုက်တွေ မသိမ်းရသေးတာမျိုးကို သတင်းတင်လိုက်ရင် စည်ပင်ကို ရောက်သွားတာမျိုးပါ။ သွားရင်းလာရင်းနဲ့ လူမှုအကျိုးပြုတာတွေကို ဖော်ပြပေးတဲ့ သဘောပါ။ ဥပမာ – လမ်းမှာ ရန်ဖြစ်နေတယ် ဆိုရင်လည်း ရဲဌာနကို သတင်းရောက်သွားတာမျိုးပေါ့။ ဒါကိုတော့ Report တွေတင်တာ အရမ်းများလာမှာဆိုတော့ ပြန်စဉ်းစားနေတယ်” ဟု ကိုကိုရဲက ဆိုသည်။

အိုင်စီတီကို အသုံးပြု၍ လူမူအကျိုးပြုလုပ်ငန်းများ လုပ်ကိုင်ရာ၌ လွှတ်တော်နှင့် ပတ်သက်သည့် ဆွေးနွေးမှုများကိုလည်း လွယ်ကူစွာ ပြန်လည်ကြည့်ရှု လေ့လာနိုင်စေ ရန် ဆောင်ရွက်သွားမည်ဖြစ်ကြောင်း၊ နည်းပညာဖြင့် လူမှုအကျိုးပြုလုပ်ငန်းများကို လုပ်ကိုင်ရာ၌ ဝက်ဘ်ဆိုက်အပြင် မိုဘိုင်းအက်ပလီကေးရှင်းများ အနေဖြင့်ပါ ထုတ်ဝေ၍ လူထုအတွင်း ဖြန့်ချိပေးသွားမည် ဖြစ်ကြောင်း သိရသည်။