Intel ရဲ့14nm နည်းပညာသုံး CPU အသစ် Broadwell

CPU တွေ တစ်နည်းအားဖြင့် တစ်ပိုင်းလျှပ်ကူးပစ္စည်း (semi-conductor) ထုတ်လုပ်တဲ့ ကုမ္ပဏီတွေထဲမှာ သက်တမ်းကြာမြင့်စွာ ရပ်တည်နိုင်ခဲ့ပြီးတဲ့ Intel ကနေ 14nm နည်းပညာသုံး ထုတ်လုပ်တဲ့ CPU အသစ်တွေကို ဈေးကွက်တင်ထား ပါတယ်။

CPU တွေနဲ့ ပတ်သက်လာရင် လက်လွှတ်လို့ မရတဲ့ဥပဒေတစ်ခုက မိုးရဲ့ဥပဒေသ ( Moore’s law) ဖြစ်ပါတယ်။ ချစ်ပ်တွေအားလုံးဟာ ၁၂ လကနေ ၁၈ လအတွင်း သိပ်သည်းဆ နှစ်ဆနှစ်ဆ တိုးလာတယ်။  တစ်နည်းအားဖြင့် တစ်လက်မ ပတ်လည်မှာရှိတဲ့ ထရန်စစ္စတာတွေရဲ့အရေအတွက် နှစ်ဆတိုးလာတာ ဖြစ်ပါတယ်။ အခု Broad-well CPU တွေကလည်း ထရန်စစ္စတာတွေ တစ်ဘီလီယံကနေ နှစ်ဘီလီယံ တိုးလာတာမျိုး မဟုတ်ပေမဲ့ chip တွေရဲ့အရွယ်အစားက တစ်ဝက်နီးပါး ချုံ့လိုက်တာဖြစ်လို့ သူ့ရဲ့ဥပဒေသက အခုအထိတော့ မှန်နေတယ်လို့ ပြောနိုင်ပါတယ်။ ကျွမ်းကျင်သူ အများစုက သူ့ရဲ့ဥပဒေသဟာ နောက်ထပ် ဆယ်စုနှစ် နှစ်ခုလောက်အထိ မှန်နေနိုင်တယ်လို့ ခန့်မှန်းထားကြပြီး တချို့ကတော့ ၂၀၁၇ လောက်အထိပဲ မှန်မယ်လို့ ခန့်မှန်းထားတဲ့ သူတွေလည်း ရှိနေပါတယ်။

Intelရဲ့ 14nm process နဲ့ထုတ်လုပ်တဲ့ CPU တွေကို 14 nm အော်ရီဂွန် (Oregon) feb ကနေ ထုတ်လုပ်ထားပြီး 14 nm CPU တွေထဲက  ပထမဆုံး မိတ်ဆက်ပေးခဲ့တာက Broadwell-Y SKU စီးရီး CPU တွေဖြစ်ပါတယ်။ ၂၀၁၅ ခုနှစ်ထဲမှာတော့ ကျန်နေတဲ့ တခြား H စီးရီး၊ K စီးရီးတွေကို အမေရိကားက အရီဇိုးနားနဲ့  အိုင်ယာလန်က feb တွေကနေ ဆက်ထုတ် ပါလိမ့်မယ်။ 22nm CPU တွေကနေ 14nm CPU တွေပြောင်းလဲ ထုတ်လုပ်ဖို့ အဓိကကျတဲ့ အရွယ်အစား တိုင်းတာမှု ၃ မျိုးဖြစ်တဲ့ transistor fin pitch, gate pitch နဲ့ inter-connect pitch တွေကို ၂၂ ရာခိုင်နှုန်းကနေ ၃၅ ရာခိုင်နှုန်းလောက် လျှော့ချနိုင်တာ ဖြစ်ပါတယ်။

Intel ကနေ Broadwell-Y  စီးရီးကို OEM ကုမ္ပဏီတွေဆီကို အမြောက်အများ ရောင်းချပြီး အဲဒီ OEM တွေကနေ သူတို့ရဲ့ထုတ်ကုန် တွေကိုဈေးကွက် တင်ထားပြီး ဖြစ်ပါတယ်။ သူတို့ရဲ့ ရည်ရွယ်ချက်ကတော့ မိုဘိုင်းဈေးကွက်အတွက် ရည်ရွယ်ထားပါတယ်။ ARM ပစ္စည်းတွေ ဈေးကွက်ထဲမှာ အရှိန်အဟုန်မြင့် တိုးတက်လာခဲ့ပြီး သမားရိုးကျ သုံးစွဲခဲ့တဲ့ PC တွေရဲ့ရောင်းအားကလည်း သိသိသာသာ ကျဆင်းခဲ့ပါတယ်။ အဲဒီအချက်ဟာ CPU လောကကို ကြီးစိုးလာခဲ့တဲ့ Intel အတွက် အကြီးမားဆုံး ခြိမ်းခြောက်ခံရမှု ဖြစ်စေပါတယ်။ အဲဒီကိစ္စကို Intel ကနေတုံ့ပြန် လုပ်ဆောင်မှု နှေးကွေးနေပြီး၊ Intel ရဲ့ ဈေးကွက်ရှယ်ယာ ရရှိမှုတွေ လျော့လာစေပါတယ်။ တစ်ခုရှိတာကတော့ Intel ကနေ CPU ထုတ်လုပ်ခဲ့တဲ့ သမိုင်းတစ်လျှောက်မှာ ပိုသေးငယ်တဲ့အပြင် ပါဝါစားနှုန်း နိမ့်တဲ့ CPU တွေ ထုတ်လုပ်လာခဲ့တာ တွေ့ရပါမယ်။ အဲဒီပြောင်းလဲမှု တွေထဲက အဓိကကျတဲ့ လုပ်ဆောင်ချက်တွေက Scheduler တွေနဲ့ buffer တွေကို ပိုကြီးထားပြီး၊ CPU Core တွေကနေ သတင်းအချက် အလက်တွေ ပို့ရာမှာ ပိုပြီးအဆင်ပြေ ချောမွေ့အောင် လုပ်ထားတာမျိုး၊ Broadwell ရဲ့ out-of-order scheduling windows ကို ချဲ့ထားတဲ့အတွက် အစီအစဉ်တကျ ခိုင်းစေညွှန်ကြား ချက်တွေကို ပြန်လုပ်ဖို့ လုပ်ဆောင်ရာမှာ ခိုင်းစေ ညွှန်ကြားချက်တွေပိုများများ ဆံ့စေပါတယ်။ ပိုအလုပ်တွင် စေပါတယ်။ L2 Translation Lookaside Buffer (TLB) 1k ကနေ 1.5k အထိတိုးထားပါတယ်။ ဒါဟာ Address translation လုပ်ဆောင်မှုရဲ့ချို့ယွင်းမှုတွေကို လျှော့ချနိုင်စေပါတယ်။ အဲဒီလို အမှားနည်းအောင် လုပ်လိုက်တာဟာ CPU တွေရဲ့ စွမ်းဆောင်ရည် တိုးစေတာဖြစ်ပါတယ်။

Broadwell CPU Architechure

Intel   ကနေ ပတ်သက်ပြီး တည်ဆောက်မှု နည်းပညာပိုင်းဆိုင်ရာ အချက်အလက်တွေကို သိပ်သိစေချင်ပုံ မရပါဘူး။ ဒါပေမဲ့ အဲဒီ CPU အသစ်တွေရဲ့ တည်ဆောက်မှု နည်းပညာပြောင်းလဲ သွားတဲ့အကြောင်းတော့ အကန့်အသတ် တစ်ခုအတွင်းမှာ ပြောခဲ့ပါတယ်။ ဒါဟာ စွမ်းဆောင်ရည်နဲ့ ပတ်သက်ပြီး ရလဒ်တွေကို ပိုပြီးအသားပေး စေချင်လို့ ဖြစ်နိုင်ပါတယ်။

Intelရဲ့ Broadwell-Y စီးရီး CPU  တွေရဲ့ တည်ဆောက်မှု နည်းပညာ အကြောင်းမရေးခင် Intel ရဲ့ CPU တွေ ထုတ်လုပ်ခဲ့တဲ့ပုံစံ (tick နဲ့ tock) ကိုအရင်သိထား ရပါမယ်။ တတိယမျိုးဆက် Ivy Bridge နဲ့ ပဉ္စမမျိုးဆက် Broadwell  တွေဟာရှိပြီးသား တည်ဆောက်မှု နည်းပညာဖြစ်တဲ့  ဒုတိယမျိုးဆက် Sandy bridge  နဲ့ စတုတ္ထမျိုးဆက် Haswell ကိုချုံ့လိုက်တဲ့ tick အုပ်စုဖြစ်နေတာ တွေ့ရပါမယ်။ နောက်လာမယ့် Skylake ကတော့ Sandy Bridge, Haswell နဲ့အုပ်စုတူ တည်ဆောက်မှု နည်းပညာ အသစ်ဖြစ်ပြီး tock တွေဖြစ်ပါတယ်။ အဲဒီမှာ သတိထားရမှာက တည်ဆောက်မှု နည်းပညာအဟောင်းကို ချုံ့ပြီးထုတ်နိုင်တဲ့ မျိုးဆက်တိုင်းမှာ ပြုပြင်ပြောင်းလဲမှုတွေ လုပ်လေ့ရှိပါတယ်။ ရေးထားတဲ့ သဘောကတော့ A3 စာရွက်ကို A4 ချုံ့လိုက်တဲ့အတွက် A4 တစ်မျက်နှာစာ လွတ်သွားလို့ အဲဒီလွတ်နေတဲ့ ဧရိယာမှာ သင်ရေးချင်တာ ကူးချင်တာတွေ ကူးနိုင်၊ ရေးနိုင်တဲ့ သဘောဖြစ်ပါတယ်။ အရင်က အဲဒီလို nm process ကိုချုံ့လိုက်နိုင်တိုင်း နည်းပညာ ပိုင်းဆိုင်ရာ ပြုပြင်ပြောင်းလဲမှုတွေ လုပ်လေ့ရှိပြီး သာမန်သုံးစွဲသူတွေ အနေနဲ့ သိသာတဲ့ ပြောင်းလဲမှုတွေ၊ စွမ်းဆောင်ရည် မြင့်တာတွေကို သိရှိနိုင်ပါတယ်။ ဒါပေမဲ့ Broadwell-Y တွေမှာကတော့ စွမ်းဆောင်ရည်ထက်ကို ပါဝါစားနှုန်းကို လုံးဝသိသာ ခြားနားအောင် လျော့ချဖို့ လုပ်ထားပါတယ်။ အပူထုတ်မှု အပိုင်းတွေကို လျှော့ချနိုင်စေပြီး သူ့ရဲ့အကျိုးဆက် အနေနဲ့ ပန်ကာမပါတဲ့ တက်ဘလက်တွေ ထုတ်လုပ်နိုင်တဲ့ အဆင့်ရောက်လာတာ ဖြစ်ပါတယ်။

Core M SOC

SOC (System-On-a-Chip) ဆိုတာက Intelရဲ့ စားပွဲတင် PC အဆင့် CPU တွေထဲမှာ ပထမဦးဆုံးဖြစ်ပြီး အရင်က Atom CPU တွေကို ဝိတ်လျှော့ထားတဲ့ Windows 8.1 နဲ့ Android တက်ဘလက်တွေမှာ သုံးဖို့ ထုတ်လုပ်ခဲ့ပြီး အဲဒီပရိုဆက်ဆာတွေက ပီစီအဆင့် ပရိုဆက်ဆာတွေလို application တွေစိတ်ကြိုက် install လုပ်သုံးလို့ မရခဲ့ပါဘူး။ Core-M CPU တွေကတော့ ပီစီအဆင့် CPU တွေဖြစ်ပါတယ်။ SOC ဆိုတာက ဘာတွေ တိုးတက်လာသလဲ ဆိုတော့ Broadwell CPU ထဲမှာ PCH (Platform Controller Hub) ကိုထည့်ပေးထား ပါတယ်။ ဒါတင်မက သေးပါဘူး။ I/O (Input/Output) ကြိုးမဲ့ ဆက်သွယ်ရေးဆိုင်ရာ လုပ်ဆောင်ချက်တွေပါ တပါတည်း ထည့်ပေးထားတာ တွေ့ရပါတယ်။

Haswell vs Broadwell

အားလုံးခြုံကြည့်ရင် Haswell တွေထက် IPC ကို ၅ ရာခိုင်နှုန်းလောက် တိုးတက်ကောင်းမွန် လာစေပါတယ်။ ဒါဟာ Ivy Bridge တွေတုန်းက ၄ ရာခိုင်နှုန်းကနေ ၆ ရာခိုင်နှုန်းလောက် ပိုမိုကောင်းမွန် တိုးတက်လာတာနဲ့ တိုးတက်ပြောင်းလဲတဲ့ နှုန်းသိပ်မကွာပါဘူး။ Intel ကနေအခုလိုပဲ IPC တွေ တိုးတက်လာအောင် လုပ်ဖို့အတွက် တည်ဆောက်မှု နည်းပညာနဲ့ဆိုင်တဲ့ လုပ်ဆောင်ချက်တွေကို အများအပြား ပြုပြင်ပြောင်းလဲ ခဲ့ရပါတယ်။

လက်ရှိ ထုတ်လုပ်ထားတဲ့ Broadwell-Y တွေနဲ့ အနီးစပ်ဆုံးတူတဲ့ Haswell CPU တွေနဲ့နှိုင်းယှဉ် ကြည့်ရင် cache memory 3MB ကနေ 4MB တိုးထားပါတယ်။ အခုနမူနာ အနေနဲ့ နှိုင်းယှဉ်ပြထားတဲ့ ဇယားထဲမှာ ဂရပ်ဖစ်ပိုင်းဆိုင်ရာ လုပ်ဆောင်ချက်တွေကို ကြည့်ပါ။

လက်တွေ့ စမ်းသပ်ကြည့်တဲ့ တက်ဘလက်

Broadwell-Y CPU သုံးထားတဲ့ Intel ရဲ့ Llama Mountain တက်ဘလက်ကို Cinebench သုံးပြီး စမ်းသပ်ကြည့်ရာမှာ Core i3-3225 CPU သုံးထားတဲ့ စားပွဲတင် ကွန်ပျူတာထက် ၂၀ ရာခိုင်နှုန်း လောက်ပဲ ပိုနှေးတာ တွေ့ရပါတယ်။ အဲဒီစားပွဲတင် CPU က TDP 55W Broadwell-Y က 4.5w ပဲရှိလို့ TDP က ၁၀ ပုံပုံတစ်ပုံလောက် နည်းနေပါတယ်။

ဂရပ်ဖစ်ပိုင်းမှာ HD 5300 GPU ကိုပြောင်းသုံးထားပြီး  Haswell ရဲ့ GPU တည်ဆောက်မှု နည်းပညာကို ပြုပြင်ပြောင်းလဲ ထားတာတွေနဲ့ EU (Execution Units)၂၄ ခုသုံးထားတဲ့အတွက် 3D Mark IceStorm ရမှတ် ၅ သောင်းကျော် ရပါတယ်။ Tegra k1 GPU သုံးထားတဲ့ Nvidia Shield တက်ဘလက်ထက် ၆၀ ရာခိုင်နှုန်းလောက် ပိုမြန်နေပါတယ်။  3D Mark Firestrike စမ်းသပ်မှုမှာတော့ ရမှတ် ၃၀၉ မှတ်ပဲရတဲ့ Haswell Core i5-4210 ထက် ရမှတ်သိသိသာသာ ပိုကောင်းပြီး Broadwell-Y က  ၅၂၂ မှတ်ရတာ တွေ့ရပါတယ်။ (EU-၄၀ ရှိတဲ့) Intel HD 5000 GPU သုံးထားတဲ့ 15w Core i5- 4250 U ကတော့ ၇၇၁ မှတ်ရတာ တွေ့ရပါတယ်။ ပန်ကာသုံးစရာ မလိုတဲ့တက်ဘလက် အုပ်စုတွေထဲမှာလည်း GPU  စွမ်းဆောင်ရည် အမြင့်ဆုံး ဖြစ်နေပြီး Qualcomm Snapdragon 805 သုံးထားတဲ့ ပစ္စည်းတွေထက် CPU စွမ်းဆောင်ရည်က ၃ ဆလောက်၊ GPU စွမ်းဆောင်ရည် ၂ ဆလောက် ပိုမြန်နေပါတယ်။ အခုလို နှိုင်းယှဉ်ကြည့်တာကတော့ သိပ်နည်းလမ်း မကျပါဘူး။ ဘာဖြစ်လို့လဲ ဆိုတော့ Core M  တွေက Windows OS တွေ run ဖို့၊ ကျန်တာတွေက Android OS ကို run ဖို့လုပ်ထားတဲ့ တက်ဘလက်တွေ ဖြစ်နေလို့ပါ။

ဈေးနှုန်းအနေနဲ့ ကလည်း Windows 2in1 hybrid tablet တွေနဲ့ နှိုင်းယှဉ်ကြည့်ရင်  နည်းနည်းသက်သာပြီး Android တက်ဘလက်တွေ၊ Atom CPU သုံး Windows tablet တွေထက်တော့ ဈေးမြင့်နေပါတယ်။ Dell ရဲ့ Venue 11-7000 စီးရီးဟာ Core M CPU တွေသုံးထားပြီး၊ Spec အနိမ့်ဆုံး တက်ဘလက်က ဒေါ်လာ ၈၀၀ နဲ့ ရောင်းချထားပါတယ်။ Desktop အဆင့်သုံးနိုင်တဲ့ Windows 8.1 တက်ဘလက် တစ်လုံးကို ဒေါ်လာ ၈၀၀ လောက်နဲ့ ဝယ်နိုင်တယ်ဆိုတော့ ဈေးမများဘူးလို့ ပြောရပါမယ်။ အခုလောလောဆယ် ဈေးကွက်တင်ထားတဲ့ Core M CPU သုံးတက်ဘလက်တွေ၊ ဟိုက်ဘရစ် လက်ပ်တော့တွေက  Lenovo 11.6 -inch ThinkPad Helix 2 ($999), Dell 13.3-inch Latitude 13 7000 starts at ($1,199) HP 13.3-inch Envy X2 ( $1,050) တွေ ဈေးကွက်တင်ထားပြီး ၂၀၁၅ ထဲမှာတော့ အများအပြား ဈေးကွက်တင်လာ ပါလိမ့်မယ်။

ဖိုးနိုင်ဝင်း (မာစတာပိစ်)