မြန်မာဒစ်ဂျစ်တယ် အခွင့်အရေးဖိုရမ်က ၂၀၁၈ ခုနှစ်အတွက် သဘောတူညီထားသော အချက်များအား ဆွေးနွေးခဲ့

ဇန်နဝါရီ ၁၈ ရက် နဲ့ ၁၉ ရက်တွေက ကျင်းပခဲ့တဲ့ ဒုတိယအကြိမ် ဒစ်ဂျစ်တယ်အခွင့်အရေးဆိုင်ရာ ဆွေးနွေးပွဲမှာ ၂၀၁၈ ခုနှစ်အတွက် သဘောတူညီထားတဲ့ ဦးတည်ချက်တွေကို ဆွေးနွေးခဲ့တယ်လို့ သိရပါတယ်။

အနာဂတ်မှာ နိုင်ငံရဲ့ ICT ကိစ္စရပ်နဲ့ ပတ်သက်ပြီး ဆုံးဖြတ်ချက်ချရာမှာ ကိုးကားနိုင်ဖို့အတွက် ဒစ်ဂျစ်တယ် အခွင့်အရေးနဲ့ ဆိုင်တဲ့ အခြေခံမူတွေကို ဒစ်ဂျစ်တယ်အခွင့်အရေးဆိုင်ရာ ပဋိညာဉ် (Digital Rights Charter) တစ်ရပ် ပြုစုရန်ကိုလည်း တက်ရောက်လာကြသူတွေက သဘောတူညီခဲ့ကြတယ်လို့သိရပါတယ်။

ဒုတိယအကြိမ်အဖြစ် အဲဒီဖိုရမ်ကို ဖန်တီးရာ၊ ဖွံ့ဖြိုးမှု အတွက် မြန်မာ့ ICT အဖွဲ့၊ လွတ်လပ်သောထုတ်ဖော်ပြောဆိုခြင်းမြန်မာ၊ မြန်မာ့စီးပွားရေးကဏ္ဍ တာဝန်ယူမှုရှိရေး အထောက်အကူပြုဌာန (MCRB)၊ Engage-Media တို့ပူးပေါင်းပြီး ဆွီဒင်အစိုးရရဲ့ ထောက်ပံ့ကူညီမှုနဲ့ ကျင်းပခဲ့တာဖြစ်ကြောင်း၊ ပထမအကြိမ် ဒစ်ဂျစ်တယ်အခွင့်အရေးဆိုင်ရာ ဆွေးနွေးပွဲကို ၂၀၁၆ ခုနှစ်၊ ဒီဇင်ဘာ ၁၄ ရက်နဲ့ ၁၅ ရက်တွေမှာ ပြုလုပ်ခဲ့တာဖြစ်ကြောင်း သိရပါတယ်။

အဲဒီဆွေးနွေးပွဲမှာ အင်တာနက်ဆက်သွယ် ရရှိအသုံးပြုနိုင်မှု (Equality of Access) E-government ကို ပိုမိုဖြစ်ထွန်းလာပြီး အစိုးရနှင့် သက်ဆိုင်သော ဝက်ဆိုက်များသည် WCAG 2.0 (ဝဘ်ဆိုက်ပါ အကြောင်းအရာများ လွယ်ကူစွာ ယူအသုံးပြုနိုင်မှု လမ်းညွှန်များ) အတိုင်းလေးစား လိုက်နာမှုရှိရန်၊ စံစနစ်ယူနီကုတ်သို့ ပြောင်းလဲအသုံးပြုခြင်း အစီအစဉ်များကို အထောက်အကူဖြစ်စေရန်၊ မသန်စွမ်းသူများ၊ အမျိုးသမီးများနှင့် တိုင်းရင်းသားများ၏ အင်တာနက် ရရှိအသုံးပြုနိုင်စေရန် ဖော်ဆောင်မှုများကို အကူအညီ ဖြစ်စေရန်၊ လွတ်လပ်စွာ ထုတ်ဖော်ပြောဆိုရေးသားနိုင်မှု (Freedom of Expression) ဒစ်ဂျစ်တယ် သတင်းအချက်အလက်ကို ပိုမိုစီးဆင်းစေပြီး ဒစ်ဂျစ်တယ် ရပိုင်ခွင့်များကို ကာကွယ်ပေးမည့် လွတ်လပ်စွာ သတင်းအချက်အလက် ရယူပိုင်ခွင့် ဥပဒေကို ပြဌာန်းရန် အစရှိတဲ့ အချက်တွေပါဝင်ပါတယ်။

ဒါ့အပြင် ဆက်သွယ်ရေးဥပဒေ ပုဒ်မ ၆၆(ဃ) ကို ပယ်ဖျက်ရန်၊ လွှတ်တော်ကိုယ်စားလှယ်များနှင့် တရားသူကြီးများ အပါအဝင် ပြည်သူလူထု၏ ဒစ်ဂျစ်တယ်ဆိုင်ရာ အသိပညာများတိုးပွားရေး ဆောင်ရွက်ရန်၊ အွန်လိုင်းပေါ်ရှိ ကိုယ်ရေးကိုယ်တာ အချက်အလက် လုံခြုံရေး (Privacy) အင်တာနက် အသုံးပြုသူများ၏ ကိုယ်ရေးကိုယ်တာ အချက်အလက်များကို အကာအကွယ်ပေးသည့် ဥပဒေတစ်ရပ် ပြဋ္ဌာန်းရန်၊ တရားနည်းလမ်းကျသော ဆက်သွယ်ရေး ကြားဖြတ်နားထောင်ခြင်း မူဘောင်တစ်ရပ် (Lawful Interception Framework) ထားရှိရန် စတာတွေလည်း ပါဝင်ကြောင်း တွေ့ရပါတယ်။ အွန်လိုင်းပေါ်ရှိ ကိုယ်ရေးကိုယ်တာ အချက်အလက် လုံခြုံရေးနှင့် ပတ်သက်၍ ပြည်သူလူ ထု၏ အသိပညာကို တိုးမြှင့်ရန်၊ ဥပဒေသစ်များပြုစုခြင်းနှင့် ဥပဒေဟောင်းများ ပြင်ဆင်ရာတွင် အစိုးရအနေဖြင့် လူထုထံမှ အကြံဉာဏ်များ ရယူနေမှုပုံစံကို တိုးတက်ပြောင်းလဲလာစေရန်အတွက် တက်ရောက်သူတွေ ဦးစားပေးဆွေးနွေးခဲ့တယ်လို့ သိရပါတယ်။

-ကောင်းမြတ်ထွန်း